ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានជំរុញដល់អាជ្ញាធរគ្រប់លំដាប់ថ្នាក់ ពិសេសថ្នាក់ដឹកនាំសាខាកាកបាទក្រហមខេត្ត ក្រុងស្រុក ត្រូវយកចិត្តទុកដាក់តាមដានសភាពការណ៍ឲ្យបានជាប់ជាប្រចាំ ជាពិសេសករណីគ្រោះមហន្តរាយផ្សេងៗ ដែលបានកើតឡើងចំពោះប្រជាពលរដ្ឋក្នុងមូលដ្ឋាន ដើម្បីឆ្លើយតប និងដោះស្រាយជូនពលរដ្ឋឲ្យបានទាន់ពេលវេលា ស្របតាមប្រធានបទដែលបានលើកឡើង “ កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា មិនទុកនរណាម្នាក់ចោល ”។
ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី ថ្លែងបែបនេះនាឱកាសអញ្ជើញជាអធិបតី ក្នុងពិធីប្រារព្ធអបអរសាទរខួបលើកទី១៦១ ទិវាពិភពលោក កាកបាទក្រហម និងអឌ្ឍចន្ទក្រហម ៨ឧសភា២០២៤ ក្រោមប្រធានបទ “ រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ ” នៅខេត្តសៀមរាប នាព្រឹកថ្ងៃទី៥ ខែឧសភា ឆ្នាំ២០២៤នេះ។
ឯកឧត្តម ឧបនាយករដ្ឋមន្រ្តី មានប្រសាសន៍ថា ប្រធានបទសម្រាប់ឆ្នាំ២០២៤នេះ ពិតជាមានសារៈសំខាន់ណាស់សម្រាប់គ្រប់អ្នកពាក់ព័ន្ធក្នុងសកម្មភាពមនុស្សធម៌ សំដៅជួយដល់ប្រជាពលរដ្ឋរងគ្រោះដោយសារគ្រោះមហន្តរាយនានា និងការថែទាំសុខភាពតាមសហគមន៍ ព្រមទាំងសកម្មភាពមនុស្សធម៌ផ្សេងៗទៀត។ ក្នុងសកម្មភាពនេះ ក៏សូមឲ្យសប្បុរសជនទាំងអស់ បន្តចូលរួមចំណែកជួយ និងសហការគ្នាឲ្យបានយ៉ាងសកម្ម និងរស់រវើក សម្រាប់ការដោះស្រាយរាល់បញ្ហាប្រឈមទាំងឡាយរបស់ប្រជាជន ដោយឈរលើគោលការណ៍គ្រឹះទាំង៧ របស់ចលនា ក្នុងគ្រប់កាលៈទេសៈតាមទិសស្លោក “ ទីណាមានទុក្ខលំបាកទីនោះ មានកាកបាទក្រហមកម្ពុជា” “ រួមកម្លាំងគ្នា ដើម្បីមនុស្សធម៌” “ វប្បធម៌ ចែករំ លែកចាប់ ផ្តើមពីខ្ញុំ” “ រួមគ្នាអនុវត្ត” “ ថ្ងៃនេះថ្ងៃស្អែកគ្មានគ្រោះថ្នាក់ចរាចរណ៍ គ្មានគ្រោះអគ្គិភ័យ” “ ការលើកកម្ពស់សុខភាពស្ត្រី ទារក និងកុមារ គឺជាគន្លឹះដ៏សំខាន់ ក្នុងការអភិវឌ្ឍប្រកបដោយចីរភាព”៕
ព័ត៌មានជាតិ ថ្មីៗ
អត្ថបទ និងរូបភាព៖ សហការី
កែសម្រួល៖ លោក អ៊ុន ណារាជ្យ
