នាព្រឹកថ្ងៃទី៣ ខែឧសភា ឆ្នាំ២០២៤នេះ មន្ទីរការងារ និងបណ្តុះបណ្តាលវិជ្ជាជីវៈខេត្តសៀមរាប បានប្រារព្ភខួបលើកទី១៣៨ ទិវាពលកម្មអន្តរជាតិ ១ឧសភា ឆ្នាំ២០២៤ ក្រោមប្រធានបទ “សហគ្រាសមួយជាសហគមន៍សុខសាន្តមួយ” ដើម្បីជាការលើកកម្ពស់សិទ្ធិសេរីភាពលក្ខខណ្ឌការងារ និងជីវភាពរស់នៅរបស់កម្មករនិយោជិតនៅកម្ពុជា ក្រោមអធិបតីភាព ឯកឧត្តម កុយ សង សមាជិកក្រុមប្រឹក្សាខេត្ត និងលោកស្រី ម៉ននី រង្សី អភិបាលរងខេត្ត ដោយមានការចូលរួមពីអ្នកពាក់ព័ន្ធជាច្រើនរូប។
លោក ច័ន្ទ សុខុមចិត្តា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត មានប្រសាសន៍ ការប្រារព្ភទិវាពលកម្មអន្តរជាតិ ១ឧសភា នាឆ្នាំនេះ ក្នុងគោលបំណងដើម្បីរំលឹក និងឧទ្ទិសដឹងគុណដល់វីរៈភាពដ៏អង់អាចក្លាហាននៃកម្មករកម្មការនីដែលបានប្រឹងប្រែងតស៊ូពុះពារ និងប្ដូរជីវិត ដើម្បីការងារសិទ្ធិកម្មករទាំងមូល។ ទិវានេះដែរ គឺជាព្រឹត្តិការណ៍ដ៏សំខាន់មួយសម្រាប់កម្មករនិយោជិត ដែលតែងតែប្រារព្ធធ្វើជារៀងរាល់ឆ្នាំ គឺដើម្បីពង្រឹងរក្សាបាននូវទំនាក់ទំនងល្អរវាងកម្មករនិយោជិត ជាមួយនិយោជក និងរាជរដ្ឋាភិបាល ដើម្បីបន្តរក្សាបាននូវសន្តិភាព ស្ថិរភាពការងារ និងសន្តិសុខការងារនៅកម្ពុជា។
លោកស្រី ម៉ននី រង្សី អភិបាលរងខេត្ត មានប្រសាសន៍ថា រាជរដ្ឋាភិបាលកម្ពុជា អាណត្តិថ្មី បានយកចិត្តទុកដាក់កាន់តែខ្លាំងក្នុងការការពារប្រជាពលរដ្ឋ និងប្រទេសជាតិ ពិសេសការលើកកម្ពស់ជីវភាពសេដ្ឋកិច្ចប្រជាពលរដ្ឋ។ ស្ថិតនៅក្នុងជំហរដ៏ម៉ឺងម៉ាត់ និងឥតងាករេ ក្នុងការអនុវត្តយុទ្ធសាស្រ្តចតុកោណគ្រប់ដំណាក់កាល រាជរដ្ឋាភិបាលបានបង្កើតនូវបរិស្ថានអំណោយផល និងលក្ខខណ្ឌចាំបាច់ជាច្រើនដែលបាននាំកម្ពុជាបោះជំហានទៅមុខ ប្រកបដោយក្តីសង្ឃឹម និងជំនឿទុកចិត្តយ៉ាងមុតមាំ នៅលើមាគ៌ានៃការដឹកនាំ ការកែទម្រង់ និងការអភិវឌ្ឍស្របគ្នាជាមួយនឹងគោលបំណងឧត្តមគតិ និងការប្តេជ្ញារបស់រាជរដ្ឋាភិបាលកម្ពុជា ក្នុងការពុះពារបម្រើជាតិ និងប្រជាជនក្នុងគ្រប់កាលៈទេសៈស្របតាមសំណូមពរ និងបំណងប្រាថ្នារបស់ប្រជាជន។
ដើម្បីឆ្លើយតបទៅនឹងស្មារតីថ្ងៃទី ១ឧសភា ខួបលើកទី១៣៨ លោកស្រីអភិបាលរងខេត្ត បានអំពាវនាវដល់និយោជក កម្មករនិយោជិត និងអ្នកពាក់ព័ន្ធទាំងអស់ សូមយកចិត្តទុកដាក់ និងរក្សាឲ្យបានការសាមគ្គីភាពផ្ទៃក្នុងរវាងនិយោជក និងកម្មករនិយោជិត និងត្រូវមើលឃើញឱ្យច្បាស់អំពីផលប្រយោជន៍ផ្ទាល់ខ្លួន ក្រុមហ៊ុន ព្រមទាំងសង្គមទាំងមូល។ ត្រូវបង្កើតមនសិកាស្រឡាញ់រាប់អានគ្នា ចេះជួយគ្នាទៅវិញទៅមក ចេះទទួលខុសត្រូវចំពោះភារកិច្ចរបស់ខ្លួន ក្នុងការបង្កើនសកម្មភាពការងារបច្ចេកទេសវិជ្ជាជីវៈ ដើម្បីការរីកចម្រើន និងមានអនាគតរឹងមាំភ្លឺស្វាង។ ជាមួយនោះត្រូវខិតខំអនុវត្តច្បាប់ស្តីពីការងារ និងច្បាប់ស្តីពីរបបសន្តិសុខសង្គមសម្រាប់ជនទាំងឡាយ ដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ព្រមទាំងបទប្បញ្ញត្តិពាក់ព័ន្ធនានា ដើម្បីរក្សាស្ថេរភាព របស់សហគ្រាសគ្រឹះស្ថាន និងជីវភាពរបស់កម្មករនិយោជិត និងខិតខំពង្រឹងភាពសុខដុមនីយកម្មរវាងនិយោជក និងកម្មករនិយោជិត ដែលជាភាគីដៃគូដ៏សំខាន់ និងមិនអាចខ្វះបានសម្រាប់ស្ថិរភាពសង្គម និងរួមចំណែកអភិវឌ្ឍប្រទេសជាតិ។
លោកស្រីក៏បានស្នើឱ្យប្រតិបត្តិករទេសចរណ៍ ម្ចាស់សហគ្រាសអាជីវកម្ម ក៏ដូចជាកម្មករនិយោជិត និយោជកទាំងអស់ ត្រូវអនុវត្តឱ្យខ្ជាប់ខ្ជួននូវច្បាប់ ស្តីពីការងារនៃព្រះរាជជាណាចក្រកម្ពុជា ព្រមទាំងការអនុវត្ត អនុលោមតាមស្តង់ដារសេវាកម្មអាស៊ាន ដើម្បីធានាឱ្យការផ្តល់សេវាកម្មមានគុណភាព និងកាន់តែមានភាពទាក់ទាញភ្ញៀវទេសចរណ៍ឱ្យបានច្រើនជាបន្តបន្ទាប់ផងដែរ៕
អត្ថបទ និងរូបភាព៖ លោក មុី សុខារិទ្ធ, លោក ទ្រា ពន្លឺ
កែសម្រួល៖ លោក អ៊ុន ណារាជ្យ