នៅព្រឹកថ្ងៃទី២ ខែមេសា ឆ្នាំ២០២៤នេះ រដ្ឋបាលស្រុកបន្ទាយស្រី ខេត្តសៀមរាប ចាប់ផ្ដើមបើកដំណើរការគម្រោងសាកល្បងបង្រៀនបន្ថែមម៉ោងលើមុខវិជ្ជាភាសាអង់គ្លេស និងភាសាចិន ដល់សិស្សសាលាបឋមសិក្សាក្នុងសហគមន៍ នៃស្រុកបន្ទាយស្រី ដើម្បីលើកកម្ពស់ការសិក្សារបស់កុមារនៅកម្រិតបឋម និងឈានទៅរកកម្រិតបន្តបន្ទាប់ រហូតដល់ឧត្តមសិក្សា។
លោក សាំង វឌ្ឍនា អភិបាលរងស្រុកបន្ទាយស្រី មានប្រសាសន៍ថា ក្រៅពីការសិក្សាភាសាជាតិ កុមារក៏មានឱកាសជាច្រើនទៀតក្នុងការចាប់យកចំណេះដឹងពីភាសាបរទេស ដែលជាភាសាដែលមានតម្រូវការខ្ពស់។ ជាក់ស្ដែងការបើកដំណើរការគម្រោងសាកល្បងបង្រៀនបន្ថែមម៉ោងសិក្សាភាសាអង់គ្លេស និងភាសាចិន ដល់សិស្សសាលាបឋមសិក្សាក្នុងសហគមន៍ នៃស្រុកបន្ទាយស្រី នៅពេលនេះ គឺជាការចូលរួមចំណែកអភិវឌ្ឍធនធានមនុស្ស ឬមូលធនមនុស្ស ស្រមតាមគោលនយោបាយរបស់រាជរដ្ឋាភិបាល ដែលបានចាត់ទុកជាអាទិភាពសំខាន់ ក្នុងចំណោមអាទិភាពទាំង៥ រួមមាន៖ មនុស្ស ផ្លូវ ទឹក ភ្លើង និងបច្ចេកវិទ្យា។
លោកអភិបាលរងស្រុក បានបញ្ជាក់ថា ស្រុកបន្ទាយស្រី ជាស្រុកមានសក្តានុពលលើវិស័យទេសចរណ៍ ហើយចំនួនភ្ញៀវទេសចរបរទេសមកទស្សនាក្នុងរង្វង់១២០០នាក់/១ថ្ងៃ ហើយក្នុងនោះយើងត្រូវដឹងថា តើយើងគួរធ្វើអ្វីបានខ្លះ? ដើម្បីទាញប្រយោជន៍ពីសកម្មភាពទេសចរណ៍ពីភ្ញៀវទេសចរណ៍បរទេសសម្រាប់ជួយដល់ជីវភាពប្រចាំថ្ងៃរបស់បងប្អូនក្នុងមូលដ្ឋានយើង។ ដូច្នេះការផ្តល់ចំណេះដឹងភាសាបរទេសដល់ក្មេងៗក្នុងមូលដ្ឋាននេះ វាជាទុនសម្រាប់ជួយដល់ការសិក្សារៀនសូត្ររបស់ប្អូនៗនាពេលបច្ចុប្បន្ន ជាពិសេសទៅកម្រិតឧត្តមសិក្សាផងដែរ។
លោក ថាប់ សារ៉ន ប្រធានក្រុមប្រឹក្សាស្រុកបន្ទាយស្រី ថ្លែងដែរថា ជាការពិតណាស់បច្ចុបន្នភាសាអង់គ្លេស និងភាសាចិន ត្រូវបានគេចាត់ទុកជាភាសាសកលលោក ដែលមានតម្រូវការនៃការប្រើប្រាស់ខ្ពស់ជាងភាសានានា។ ក្រៅពីភាសាជាតិការចេះភាសាបរទេស នោះនាពេលអនាគតប្អូនៗ នឹងមានភាពងាយស្រួលក្នុងការទាក់ទងគ្នាជាមួយជាមួយជនបរទេស ព្រោះពួកយើងជាភ្នាក់ងារទេសចរណ៍ការងារក្នុងមូលដ្ឋាន។ ដូចនេះលោកសូមជំរុញឲ្យអាណាព្យាបាលសិស្សទាំងអស់ ព្យាយាមជំរុញបន្ថែម និងលើទឹកចិត្តកូនៗរបស់ខ្លួន ឲ្យចាប់យកភាសាបរទេសឲ្យបានច្រើន ក្រៅពីភាសាជាតិ ព្រោះវាវាពិតជាចាំបាច់ណាស់សម្រាប់អនាគតពួកគាតទាំងអស់គ្នា៕
អត្ថបទ៖ លោក អ៊ុន ណារាជ្យ
រូបភាព៖ លោក ហេង វ៉ាន្នី
