នៅព្រឹកថ្ងៃទី៤ ខែមិថុនា ឆ្នាំ២០២៤នេះ លោកជំទាវ ម៉ែន នារីសោភ័គ អគ្គលេខាធិការរងទី១ នៃកាកបាទក្រហមកម្ពុជា តំណាងដ៏ខ្ពង់ខ្ពស់របស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានដឹកនាំក្រុមការងារនាំយកថវិកាចំនួន ៥០.០០០ដុល្លារអាមេរិក រួមនឹងថវិកា និងស្បៀងអាហារមួយចំនួនទៀតរបស់សាខាកាកបាទក្រហមខេត្ដសៀមរាប ឧបត្ថម្ភដល់មន្ទីរពេទ្យកុមារអង្គរ ព្រមបន្តអញ្ជើញសួរសុខទុក្ខបងប្អូនជាស្ដ្រីមានផ្ទៃពោះចំនួន២៨០នាក់ ដែលកំពុងសម្រាកត្រៀមសម្រាលបុត្រនៅមន្ទីរពេទ្យកុមារគន្ធបុប្ផា ខេត្ដសៀមរាប។
មានប្រសាសន៍ក្នុងឱកាសនោះ លោកជំទាវ ម៉ែន នារីសោភ័គ បាននាំយកនូវក្តីនឹករលឹក ការផ្តាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះក្រុមគ្រូពេទ្យ និងបងប្អូនទាំងអស់ដែលកំពុងសម្រាកព្យាបាលជំងឺនៅមន្ទីរពេទ្យកុមារអង្គរ។ ក្នុងឋានៈជាប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែគិតគូរ យកចិត្តទុកដាក់បំផុតលើការលើកកម្ពស់សុខុមាលភាពរបស់ប្រជាពលរដ្ឋងាយរងគ្រោះបំផុត ដែលក្នុងនោះការរួមចំណែកជួយព្យាបាលកុមារកម្ពុជារាប់ម៉ឺននាក់ តាមរយៈការឧបត្ថម្ភដល់មន្ទីរពេទ្យកុមារអង្គរ និងមន្ទីរពេទ្យជ័យវរ្ម័នទី៧ ហើយនេះជាលើកទី៧ហើយ ដែលកាកបាទក្រហមកម្ពុជាបានប្រគល់ថវិកាដើម្បីចូលរួមជួយសម្រួលដល់មន្ទីរពេទ្យកុមារអង្គរ។
បើតាមលោក ងួន ច័ន្ទភក្រា្ដ នាយកមន្ទីរពេទ្យកុមារអង្គរ បានបញ្ជាក់ថា មន្ទីរពេទ្យមួយនេះ ពឹងផ្អែកទាំងស្រុងលើមូលនិធិសប្បុរសធម៌ ដៃគូផ្ដល់មូលនិធិ ការរៃអង្គាសថវិកា និងសប្បុរសជនទាំងក្នុង និងក្រៅប្រទេស ដើម្បីទ្រទ្រង់ដល់បេសកកម្មសេវាសុខភាពរបស់មន្ទីរពេទ្យ។ ចាប់តាំងពីឆ្នាំ២០១៦មក កាកបាទក្រហមកម្ពុជា បានផ្ដល់ការឧបត្ថម្ភដល់មន្ទីរពេទ្យកុមារអង្គរសរុប ២៤២.៥០០ដុល្លារអាមេរិក ដែលនេះបានឆ្លុះបញ្ចាំងពីគុណតម្លៃដ៏មហាប្រសើរ និងជាគំរូដ៏ល្អបំផុតសម្រាប់ប្រជាពលរដ្ឋកម្ពុជាក្នុងការចូលរួមចំណែកក្នុងសកម្មភាពសប្បុរសធម៌ ទំនួលខុសត្រូវសង្គម និងចេះជួយគ្នាទៅវិញទៅមក ដើម្បីសង្រ្គោះ និងលើកកម្ពស់សុខុមាលភាពកុមារកម្ពុជាដែលជាទំពាំងស្នងឫស្សី និងជាសសរទ្រូងនៃការអភិវឌ្ឍន៍ប្រទេសជាតិនាពេលអនាគត។ ការថែទាំ និងរក្សាសុខភាពកុមារកម្ពុជាឱ្យបានល្អប្រសើរ គឺជាកាតព្វកិច្ចរបស់យើងទាំងអស់គ្នា ដែលជាប្រជាពលរដ្ឋកម្ពុជា ដែលត្រូវចូលរួមទាំងអស់គ្នាដើម្បីកុមារកម្ពុជា ខណៈជារៀងរាល់ថ្ងៃមន្ទីរពេទ្យមួយនេះមានកុមារប្រមាណ ៣០០ទៅ៤០០នាក់ បានមកទទួលការព្យាបាលនៅក្នុងឆ្នាំ២០២៣កន្លងទៅ។
សូមជម្រាបថា នៅព្រឹកដដៃលនេះដែរ លោកជំទាវ ម៉ែន នារីសោភ័គ ក៏បានដឹកនាំក្រុមការងារបន្តចុះសួរសុខទុក្ខ និងនាំយកអំណោយមួយចំនួនចែកជូនដល់បងប្អូនជាស្ដ្រីមានផ្ទៃពោះចំនួន២៨០នាក់ ដែលកំពុងសម្រាកត្រៀមសម្រាលបុត្រ និងផ្ដល់អំណោយថវិកាមួយចំនួន នៅមន្ទីរពេទ្យកុមារគន្ធបុប្ផាសៀមរាប។ ជាមួយគ្នានោះលោកជំទាវ ក៏បានណែនាំដល់ស្ដ្រីដែលជិតសម្រាលកូន ឱ្យចេះថែរក្សាសុខភាពខ្លួនឯងផង និងកូនក្នុងផ្ទៃផងដែរ។
តាមរបាយការណ៍មន្ទីពេទ្យគន្ធបុប្ផា បានឲ្យដឹងថា នៅឆ្នាំ២០២៣កន្លងទៅ ក្នុងមួយថ្ងៃៗមន្ទីរពេទ្យគន្ធបុប្ផាសៀមរាប និងភ្នំពេញ បានទទួលបម្រើសេវាព្យាបាលជំងឺ និងពិនិត្យជំងឺទាំងក្នុង និងក្រៅលើកុមារ ៣.០០០ទៅ៥.០០០នាក់ មានកុមារចូលមកវះកាត់ពី ៥០ទៅ៦០ករណី៕
អត្ថបទ និងរូបភាព៖ សហការី
កែសម្រួល៖ លោក អ៊ុន ណារាជ្យ
