ចាប់ពីខែមិថុនា ឆ្នាំ២០២៤នេះ ប្រជាពលរដ្ឋក្នុងភូមិចំនួន៤ គឺភូមិស្លក្រាម ភូមិបឹងដូនប៉ា ភូមិដកព និងភូមិបន្ទាយចាស់ សង្កាត់ស្លក្រាម ក្រុងសៀមរាប សរុប១១គ្រួសារមានទីលំនៅតាមបណ្ដោយផ្លូវក្រោយវត្តពោធិលង្កា ត្រូវបានជ្រើសរើសចាប់ផ្ដើមដំណើរការនូវការអនុវត្តគម្រោងសាកល្បងប្រមូល និងដឹកជញ្ជូនកាកសំណល់ឆ្លាតវៃ តាមរយៈការប្រើប្រាស់បច្ចេកវិទ្យាអុីនធើណេត ដើម្បីពង្រឹងប្រសិទ្ធភាពប្រមូល និងដឹកជញ្ជូនកាកសំណល់ដោយប្រើកម្មវិធីទូរស័ព្ទមានឈ្មោះថា សៀមរាបស្អាត និងឆ្លាត Smart Clean Siem Reap ដែលនេះជាជំហានដំបូងក្នុងការកែប្រែការគ្រប់គ្រងកាកសំណល់ឆ្លាតវៃក្នុងក្រុងសៀមរាប។
ក្នុងប្រកាសដាក់ដំណើរគម្រោងសាកល្បងនេះ នៅរសៀលថ្ងៃទី៥ ខែមិថុនា ឆ្នាំ២០២៤ លោក យុន លីនណេ អភិបាលរងខេត្តសៀមរាប បានឲ្យដឹងថា រដ្ឋបាលខេត្ត រដ្ឋបាលក្រុងសៀមរាប មន្ទីរបរិស្ថានខេត្ត អង្គការ GIZ និងក្រុមហ៊ុនហ្កាអុីយ៉ា ដោយមានការគាំទ្រពី JICA បានជ្រើសរើសយកផ្លូវក្រោយវត្តពោធិលង្កា សម្រាប់អនុវត្តគម្រោងសាកល្បងនេះ ដោយសារផ្លូវមួយខ្សែនេះមានប្រជាជនរស់នៅចម្រុះ កន្លែងចង្អែត មនុស្សច្រើន ជាពិសេសកន្លែងទុកដាក់សំរាមមិនទាន់មានរបៀបរៀបរយនៅឡើយ។ ជាមួយនោះអាធរខេត្ត នឹងរៀបចំផ្លូវមួយខ្សែនេះឲ្យមានរបៀបរៀបរយតាមរយៈការដាំដើមឈើឲ្យមានភាពបៃតង រៀបចំការទុកដាក់សំរាមឲ្យបានត្រឹមត្រូវ និងការដឹកជញ្ជូនតាមពេលវេលាច្បាស់លាស់។
លោក យុន លីនណេ បញ្ជាក់ថា ខេត្តសៀមរាប មានការអនុវត្តគម្រោងសាកល្បងចំនួន៨ ដើម្បីសាកល្បងអនុវត្តកិច្ចការទីក្រុងឆ្លាតនានា ហេីយក្នុងនោះគម្រោងក៏មានគំនិតផ្ដួចផ្ដើមទីក្រុងឆ្លាត ដែលមានទីភ្នាក់ងារ JICA បានចាប់ផ្ដើមគម្រោងទីក្រុងឆ្លាតដែលមានឈ្មោះថា “គម្រោងអនុវត្តវិធីសាស្ត្រទីក្រុងឆ្លាតដើម្បីដោះស្រាយបញ្ហាទីក្រុងក្នុងខេត្តសៀមរាប” ដែលបាននឹងកំពុងអនុវត្តតាំងពីឆ្នាំ២០២២រហូតមក ដោយសហការជាមួយរដ្ឋបាលខេត្តសៀមរាប និងដៃគូជាច្រើនទៀត។ ក្នុងចំណោមគម្រោងទាំង៨នោះ មានគម្រោងមួយពាក់ព័ន្ធនឹងកិច្ចការគ្រប់គ្រងកាកសំណល់គឺ “គម្រោងសាកល្បងប្រមូល និងដឹកជញ្ជូនកាកសំណល់ឆ្លាតវៃ” នៅសង្កាត់ស្លក្រាម ក្រុងសៀមរាប ដែលមានភ្ជាប់បច្ចេកវិទ្យាអុីនធើណេតនៃវត្ថុ (Internet of Thing ឬ IoT) ផងដែរ។
លោក Koki Takano អ្នកជំនាញគ្រប់គ្រងកាកសំណល់ ក្នុងគម្រោងទីក្រុងឆ្លាតវៃ ខេត្តសៀមរាប បានឲ្យដឹងថាក្នុងឆ្នាំ២០២៣ គម្រោងទីក្រុងឆ្លាតបានធ្វើការសិក្សាបឋមដែលមានឈ្មោះថា “ការអង្កេតពេលវេលា និងសកម្មភាណប្រមូលសំរាម (Time and Motion Survey)” នៅតំបន់គោលដៅនេះដែរ។ ការសិក្សាបឋមនេះមានបំណងពិនិត្យល្បឿនប្រមូល និងសកម្មភាពប្រមូល ដើម្បីឲ្យយើងដឹងពីកង្វះខាតក្នុងប្រមូល និងដឹកជញ្ជូនសំរាម ដោយសារពលរដ្ឋប្រើធុងសំរាមច្រើនខ្នាត ច្រើនទំហំមិនស្មើគ្នា ហើយខ្វះពត៌មានច្បាស់អំពីកាលវិភាគប្រមូល ដែលធ្វើឲ្យប៉ះពាល់ដល់ប្រសិទ្ធភាពគ្រប់គ្រងកាកសំណល់។ ដើម្បីដោះស្រាយបញ្ហានេះ គម្រោងសាកល្បងនេះបានប្រើធុងសំរាមដែលមានទំហំ ខ្នាតដូចគ្នា និងប្រើអ៊ែប សៀមរាបស្អាត និងឆ្លាតរួមបញ្ចូលផង។ ធ្វើបែបនេះពលរដ្ឋទទួលដំណឹងអំពីកាលវិភាគប្រមូលរាល់សប្ដាហ៍ ដើម្បីរៀបចំសំរាមទាន់ពេលវេលា ក្រុមហ៊ុនប្រមូលសំរាមក៏ងាយគ្រប់គ្រងស្ថានភាពប្រមូលសំរាមផងដែរ គឺអាចពិនិត្យស្ថានភាពតាមសមកាល (Real-time) ធ្វើឲ្យមានប្រសិទ្ធភាពជាងមុន។
ក្នុងនាមអាជ្ញាធរមូលដ្ឋាន លោក ខៀវ សត ចៅសង្កាត់ស្លក្រាម បានជំរុញដល់ពលរដ្ឋដែលទទួលធុងសំរាមទាំង១១គោលដៅ ដែលធុងទាំងនោះមានដាក់កូដ QR ត្រូវខ្ចប់សំរាមក្នុងថង់រួចដាក់ ក្នុងធុងដែលបានផ្ដល់ឲ្យ ពិនិត្យកាលវិភាគប្រមូលតាមទូរស័ព្ទ ដាក់សំរាមមុខផ្ទះឲ្យចំថ្ងៃប្រមូល នៅថ្ងៃចន្ទ និងព្រហស្បតិ៍ នៅម៉ោង៧ព្រឹក ទុកដាក់ធុងឲ្យមាន សណ្តាប់ធ្នាប់ និងមានអនាម័យសម្រាប់ការប្រមូល៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
