នៅព្រឹកថ្ងៃទី៦ ខែមិថុនា ឆ្នាំ២០២៤នេះ លោកជំទាវ ទុយ ជិ ប្រាក់សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានដឹកនាំក្រុមការងារសាខា នាំយកថវិកាចំនួន ១០លានរៀល ប្រគល់ជូនដល់មន្ទីរពេទ្យកុមារអង្គរខេត្តសៀមរាប ដើម្បីចូលរួមចំណែកជួយដល់សកម្មភាពជួយសង្គ្រោះកុមារកម្ពុជាដែលកំពុងមករកសេវាព្យាបាលជំងឺនៅមន្ទីរពេទ្យមួយនេះ។
លោកជំទាវ ទុយ ជិ មានប្រសាសន៍ថា ជារៀងរាល់ឆ្នាំកាកបាទក្រហមកម្ពុជា ក៏ដូចជាសាខាកាកបាទក្រហមកម្ពុជាខេត្តសៀមរាប តែងតែបានប្រគល់ជូននូវសម្ភារ និងថវិកាដែលទទួលបានពីសប្បុរសជន ជូនដល់មន្ទីរពេទ្យកុមារអង្គរ បើទោះបីជាថវិកាដែលបាននាំមកជូននោះចំនួនមានកម្រិតក្តី តែវាជាការបង្ហាញឲ្យឃើញពីសកម្មភាពមនុស្សធម៌របស់កាកបាទក្រហមកម្ពុជា សម្រាប់ជយយទ្រទ្រង់នូវកម្មភាពប្រចាំថ្ងៃរបស់មន្ទីរពេទ្យកុមារអង្គរ។
លោកជំទាវ ក៏សង្ឃឹមជឿជាក់ថា សកម្មភាពនេះ វានឹងបានឆ្លុះបញ្ចាំងពីគុណតម្លៃដ៏មហាប្រសើរ និងជាគំរូដ៏ល្អបំផុតសម្រាប់ប្រជាពលរដ្ឋកម្ពុជាក្នុងការចូលរួមចំណែកក្នុងសកម្មភាពសប្បុរសធម៌ ទំនួលខុសត្រូវសង្គម និងចេះជួយគ្នាទៅវិញទៅមក ដើម្បីសង្រ្គោះ និងលើកកម្ពស់សុខុមាលភាពកុមារកម្ពុជាដែលជាទំពាំងស្នងឫស្សី និងជាសសរទ្រូងនៃការអភិវឌ្ឍន៍ប្រទេសជាតិនាពេលអនាគត។ ការថែទាំ និងរក្សាសុខភាពកុមារកម្ពុជាឱ្យបានល្អប្រសើរ គឺជាកាតព្វកិច្ចរបស់យើងទាំងអស់គ្នា ដែលជាប្រជាពលរដ្ឋកម្ពុជា ដែលត្រូវចូលរួមទាំងអស់គ្នាដើម្បីកុមារកម្ពុជា។
សូមជម្រាបជូនថា ជារៀងរាល់ថ្ងៃមន្ទីរពេទ្យកុមារអង្គរ មានកុមារប្រមាណពី ៣០០ទៅ៤០០នាក់ បានមកទទួលការព្យាបាលកាលពីឆ្នាំ២០២៣កន្លងទៅ ដោយបានផ្ដល់ការព្យាបាលដល់កុមារសរុបប្រមាណ១១ម៉ឺនករណី ខណៈដែលគិតចាប់ពីមន្ទីរពេទ្យបើកដំណើរការរហូតដល់ពេលបច្ចុប្បន្ននេះ បានផ្ដល់ការព្យាបាលដល់កុមារសរុបច្រើនជាង២.៧លានករណី៕
អត្ថបទ និងរូបភាព៖ កាកបាទក្រហមខេត្ត
កែសម្រួល៖ លោក អ៊ុន ណារាជ្យ
