សភាយុវពាណិជ្ជករអន្តរជាតិកម្ពុជាខេត្តសៀមរាប ហៅកាត់ថា JCI SR បានរៀបចំកម្មវិធីវនយាត្រាលើកទី៧ ឬហៅថាការដើរព្រៃនៅក្នុងតំបន់រមណីដ្ឋានអង្គរ ដើម្បីជំរុញប្រជាពលរដ្ឋខ្មែរឲ្យស្រលាញ់ព្រៃឈើ និងធម្មជាតិ ដែលជាប្រភពដ៏សំខាន់នៃសុខភាព និងផ្លូវចិត្ត និងចូលរួមលើកកម្ពស់ការយល់ដឹងពីវប្បធម៏ប្រវត្តិសាស្រ្តអង្គរ ព្រមទាំងជំរុញ ភ្ងៀវទេសចរជាតិមកកម្សាន្តនៅទឹកដីខេត្តសៀមរាបឲ្យបានកាន់តែច្រើន កម្មវិធីនេះចាប់ពីម៉ោង ៥ព្រឹកព្រលឹមរហូតដល់ម៉ោង១១ថ្ងៃត្រង់ ថ្ងៃទី០៦ ខែមិថុនា ឆ្នាំ២០២៤នេះ។
លោក ពិន ពណ្ណរាយ អ្នកគ្រប់គ្រងកម្មវិធីវនយាត្រា បានឲ្យដឹងថា កម្មវិធីដើរព្រៃលើកទី៧នេះ មានអ្នកចូលរួមចំនួន១១០នាក់ ក្នុងនោះបរទេស៤០នាក់ ដោយមានអ្នកជំនាញផ្នែកយោគៈ សមាធិ ព្រមទាំងអ្នកជំនាញ ផ្នែកវប្បធម៌ ប្រវត្តិសាស្ត្រ ណែនាំ និងពន្យល់ប្រាប់អំពីវិធីធ្វើចិត្តឱ្យស្ងប់តាមរយៈការសមាធិរយៈពេលខ្លី ស្តាប់ប្រវត្តិរឿងរ៉ាវរបស់ប្រាសាទ និងភូមិសាស្ត្រខ្លះៗ។
ព័ត៌មានជាតិ ថ្មីៗ
លោកបន្តថា កម្មវិធីថ្ងៃនេះធ្វើឡើងក្នុងគោលបំណងផ្សារភ្ជាប់ខ្លួនយើងជាមួយនឹងធម្មជាតិឡើងវិញ តាមរយៈការយល់ដឹងពីសារៈសំខាន់នៃព្រៃឈើ និងជីវិត អនុវត្តយោគៈ និងបដិបត្តិសមាធិ ដើម្បីបង្កើនថាមពលផ្លូវកាយ និងផ្លូវចិត្តក្នុងព្រៃនៃទីក្រុងអង្គរបុរាណ កម្ចាត់ភាពតប់ប្រមល់ ជំងឺស្ត្រេស ជំងឺបាក់ទឹកចិត្តនិងថប់បារម្ភ តាមរយៈការផ្សារភ្ជាប់ជាមួយធម្មជាតិ លើកកម្ពស់ និងចូលរួមផ្សព្វផ្សាយពីសារៈសំខាន់នៃការដើរព្រៃ ព្រមទាំងសិក្សាឈ្វេងយល់វប្បធម៌ប្រវត្តិសាស្ត្រ អង្គរនៃចក្រភពខ្មែរដ៏រុងរឿងនាអតីតកាល។ លោកក៏សង្ឃឹមថា នៅឆ្នាំក្រោយៗទៀត នឹងមានអ្នកចូលរួមកាន់តែច្រើន ពីព្រោះកម្មវិធីនេះពិតជាមានសារៈសំខាន់ណាស់សម្រាប់មនុស្សម្នាក់ៗ ដោយចំណាយពេលវេលាខ្លីតែបងប្អូននឹងទទួលបានផលប្រយោជន៍ច្រើនពីវា៕
អត្ថបទ និងរូបភាព៖ ធន់ ពូថេ
កែសម្រួល៖ លោក អ៊ុន ណារាជ្យ
