រដ្ឋបាលខេត្តសៀមរាប នៅព្រឹកថ្ងៃទី៧ ខែមិថុនា ឆ្នាំ២០២៤នេះ បានសហការជាមួយមន្ទីរបរិស្ថាន និងមន្ទីរកសិកម្មខេត្ត បើកកិច្ចប្រជុំមួយដើម្បីធ្វើការពង្រឹងការងារគ្រប់គ្រង ថែរក្សា និងការការពារធនធានធម្មជាតិក្នុងភូមិសាស្ត្រខេត្តសៀមរាប ដឹកនាំដោយលោក អុឹង គឹមលាង អភិបាលរងខេត្ត ដោយមានការចូលរួមពីថ្នាក់ដឹកនាំ មន្ត្រីរាជការ អាជ្ញាធរមូលដ្ឋាន និងអ្នកពាក់ព័ន្ធជាច្រើនរូបទៀត។
លោក ទា គឹមសុទ្ឋ ប្រធានមន្ទីកសិកម្ម រុក្ខាប្រមាញ់ និងនេសាទខេត្ត បានបញ្ជាក់ថា ផ្ទៃដីខេត្តសៀមរាប គិតមកដល់បច្ចុប្បន្ននេះមានព្រៃឈើគ្របដណ្តប់ស្ទើតែ៥០ភាគរយ ដោយសារតែគម្របព្រៃឈើនេះហើយទើបធ្វើឱ្យមានបញ្ហាទំនាស់ជាច្រើន។ ខណៈថ្មីៗនេះមានផ្ទៃដី១.៧០០ហិកតា មានការទន្ទ្រានកាន់កាប់ក្នុងក្នុងស្រុកចំនួន៣ ច្រើនជាងគេ គឺស្រុកជីក្រែង ស្រុកពួក និងក្រឡាញ់ ហើយដើម្បីកាត់បន្ថយនៅបញ្ហាទាំងអស់នេះត្រូវតែមានកម្លាំងនៅប្រចាំការតាមតំបន់ និងវិធានការឱ្យតឹងរឹងទើបមានប្រសិទ្ឋភាព។
លោក ឃឺន សុគុណវិសិដ្ឋ អនុប្រធានមន្ទីរបរិស្ថានខេត្ត ក៏បានឲ្យដឹងថា តំបន់ការពារធម្មជាតិក្នុងភូមិសាស្ត្រខេត្តសៀមរាប មាន៨តំបន់ មានផ្ទៃដីសរុប២៨២.៦៦៤,៦៣ហិកតា។ ដោយឡែកក្នុងឆ្នាំ២០២៣កន្លងទៅ មន្ទីរបានសហការជាមួយអាជ្ញាធរ និងសមត្ថកិច្ចពាក់ព័ន្ធ បានធ្វើការទប់ស្កាត់ និងបង្ក្រាប់ការកាប់គាស់ រុករាន ដុត ឈូសឆាយព្រៃយកធ្វើជាកម្មសិទ្ឋលើផ្ទៃដីប្រមាណ ៨៩៦,០៦ហិកតា និងបានសម្របសម្រួលជាមួយរដ្ឋបាលក្រុងស្រុក ឃុំសង្កាត់ និងសហគមន៍តំបន់ការពារធម្មជាតិ ចុះពិនិត្យទីតាំងដីក្នុង និងក្រៅតំបន់ការពារធម្មជាតិដែលត្រូវរៀបចំស្តាព្រៃឡើងវិញប្រមាណ៣៣៦,៧៧ហិកតា។
លោក អុឹង គឹមលាង អភិបាលរងខេត្ត មានប្រសាសន៍ថា ស្របតាមអនុសាសន៍ណែនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ស្តីពីវិធានការចាំបាច់នានាក្នុងការពង្រឹងការគ្រប់គ្រងធម្មជាតិប្រកបដោយប្រសិទ្ឋភាពក្នុងការចាត់វិធានការបង្ការ ទប់ស្កាត់ និងបង្រ្កាបបទល្មើសកាប់រានទន្ទា្រនដីព្រៃយកធ្វើជាកម្មសិទ្ធខុសច្បាប់ក្នុងតំបន់អភិរក្សតំបន់ការពារ និងដែនជម្រកសត្វព្រៃ។ ក្នុងកិច្ចការងារនេះ រដ្ឋបាលខេត្តសៀមរាប សូមណែនាំដល់ស្ថាប័នពាក់ព័ន្ធ ត្រូវដាក់ចេញនូវផែនការ វិធានការទប់ស្កាត់ និងបង្រ្គាបរាល់សកម្មភាពកាប់បំផ្លាញព្រៃឈើខុសច្បាប់ក្នុងតំបន់ការពារ និងអភិរក្សស្ថិតក្នុងភូមិសាស្រ្តរបស់ខ្លួន ដោយប្រើប្រាស់នូវមធ្យោបាយសរុប។ ក្នុងនោះត្រូវអាជ្ញាធរមូលដ្ឋានត្រូវទទួលបន្ទុក និងអនុវត្តន៍ភារកិច្ចរៀងៗខ្លួនក្រោមការពិនិត្យ និងតាមដានជាប្រចាំពីគណៈបញ្ជាការឯកភាពរដ្ឋបាលរាជធានីខេត្តក្រុង ស្រុកខណ្ឌ។
លោកអភិបាលរងខេត្ត ក៏បានណែនាំដល់មន្ត្រីជំនាញ ជាពិសេសអាជ្ញាធរមូលដ្ឋានដែលជាអ្នកនៅផ្ទាល់នឹងមូលដ្ឋាន ត្រូវចូលរួមឱ្យបានសកម្មក្នុងការបង្ការទប់ស្កាត់ និងបង្ក្រាបសកម្មភាពនៃកាប់បំផ្លាញព្រៃឈើខុសច្បាប់ និងត្រូវរាយការណ៍ជាបន្ទាន់ជូនគណៈបញ្ចាការឯកភាពរដ្ឋបាលក្រុងស្រុកខណ្ឌ នៅពេលកើតមានសកម្មភាពកាប់បំផ្លាញព្រៃឈើក្នុងតំបន់ការពារ និងអភិរក្សក្នុងដែនសមត្ថកិច្ចរបស់ខ្លួន។ ហើយចំពោះរដ្ឋបាលក្រុងស្រុក មិនត្រូវចុះហត្ថលេខាទទួលស្គាល់សិទ្ឋកាន់កាប់ដីធ្លីដែលពុំមានឯកសារ និងអំណះអំណាងគ្រប់គ្រាន់តាមផ្លូវច្បាប់ ជាពិសេសការបញ្ជាក់លើឯកសារសុំសិទ្ឋកាន់កាប់ និងឯកសារទិញលក់ដីដោយខុសច្បាប់ក្នុងតំបន់ការពារ និងតំបន់អភិរក្សធនធានធម្មជាតិ ដោយត្រូវមានមោឃភាព ឬបដិសេធនូវរាល់ឯកសារទិញលក់ និងឯកសារផ្ទេរសិទ្ឋកាន់កាប់ដីធ្លីដែលស្ថិតនៅក្នុងតំបន់ការពារ និងអភិរក្សធនធានធម្មជាតិ ហើយត្រូវដកហូតដីធ្លីទាំងនោះរក្សាទុកជាទ្រព្យសម្បត្តិរដ្ឋ ព្រមទាំងចាត់វិធានការយ៉ាងមឺុងមាត់ចំពោះមន្ត្រីមានសមត្ថកិច្ចណាដែលបញ្ជាក់ ឬចុះហត្ថលេខាលើឯកសារលិខិតស្នាមមិនស្របច្បាប់នានា តាមច្បាប់ជាធរមាន៕
អត្ថបទ៖ កញ្ញា ប្រន ស្រីនីត
រូបភាព៖ ស៊ុំ គីន
កែសម្រួល៖ លោក អ៊ុន ណារាជ្យ
