នៅព្រឹកថ្ងៃទី៧ ខែមិថុនា ឆ្នាំ២០២៤នេះ លោកជំទាវ ទុយ ជិ ប្រាក់សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានជួបសំណេះសំណាល និងទទួលអំណោយពីក្រុមហ៊ុនទឹកបរិសុទ្ធ អូគូលែន ដើម្បីចូលរួមអបអរខួបលើកទី១៦១ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៤ ក្រោមប្រធានបទ “រួមជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ” ដោយអំណោយរួមមាន៖ អង្គរ២តោន ទឹកបរិសុទ្ធ អូគូលែន ១៥០កេស និងថវិកា ១ពាន់ដុល្លារ។
ក្នុងនាមឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជាខេត្ត លោកជំទាវ ទុយ ជិ ប្រាក់ សោភ័ណ អនុប្រធាន បានថ្លែងអំណរគុណ ចំពោះទឹកចិត្តមនុស្សធម៌របស់សប្បុរសជន ចំពោះសកម្មភាពការងារមនុស្សធម៌របស់កាកបាទក្រហមកម្ពុជា ដែលជានិច្ចកាលបានយកចិត្តទុកដាក់គិតគូពីសុខទុក្ខរបស់បងប្អូនប្រជាពលរដ្ឋជួបការលំបាក ជួបគ្រោះមហន្តរាយផ្សេងៗ។ ជាពិសេសគ្រួសារក្រីក្រ ជនងាយរងគ្រោះ ចាស់ជរាគ្មានទីពឹង កុមារកំព្រា ស្ត្រីម៉េម៉ាយជាដើម ហើយអំណោយដែលទទួលបាននាពេលនេះ គឺសាខាកាកបាទក្រហមនឹងទុកសម្រាប់ប្រគល់ជូនដល់ដៃជនរងគ្រោះ និងងាយរងគ្រោះនៅក្នុងខេត្តជាបន្តបន្ទាប់។
លោកជំទាវ ទុយ ជិ ប្រាក់ សោភ័ណ មានប្រសាសន៍ថា កាកបាទក្រហមកម្ពុជា គឺជាស្ថាប័នមនុស្សធម៌ ក្រោមការដឹកនាំដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន ដែលតែងគិតគូរខ្ពស់បំផុត ចំពោះសុខទុក្ខប្រជាពលរដ្ឋគ្រប់រូបមិនប្រកាន់ ពូជសាសន៍ វណ្ណៈ ពណ៌សម្បុរ ជំនឿសាសនា ឬនិន្នាការនរយោបាយណាមួយឡើយ។ ជាមួយគ្នានេះ សាខាកាកបាទក្រហមកម្ពុជាខេត្តសៀមរាប ដឹកនាំដោយ ឯកឧត្តម ប្រាក់ សោភ័ណ បានពុះពារយកចិត្តទុកដាក់ និងដឹកនាំបំពេញបេសកកម្មការងារមនុស្សធម៌ទូទំាងខេត្ត ដូចជាការចុះសួរសុខទុក្ខអ្នកជំងឺ ដែលសម្រាកព្យាលបាលនៅមន្ទីរពេទ្យខេត្ត ការចែកអំណោយដល់គ្រួសារក្រីក្រ ជនគ្មាន ទីពឹង ជនចាស់ជរា ក្មេងកំព្រា ចុះសំណេះសំណាល សួរសុខទុក្ខ ផ្តល់សំភារៈការពារ និងថែរក្សា សុខភាព អនាម័យ ដល់មន្ទីរពេទ្យ និងមណ្ឌលសុខភាពនានាផងដែរ៕
ព័ត៌មានជាតិ ថ្មីៗ
អត្ថបទ និងរូបភាព៖ សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
