នៅថ្ងៃទី៧ ខែមិថុនា ឆ្នាំ២០២៤នេះ លោកជំទាវ សុខ ណារ៉ូ ពៅហេង អនុប្រធានក្រុមការងារឥស្សរជនឆ្នើមថ្នាក់ជាតិសាខាខេត្តសៀមរាប តំណាងឯកឧត្តម ប្រាក់ សោភ័ណ ប្រធានក្រុមការងារ បានដឹកនាំសហការី ជួបសំណេះសំណាល សួរសុខទុក្ខ និងនាំយកអំណោយមនុស្សធម៌ ប្រគល់ជូនដល់បងប្អូនអ្នកផ្ទុកមេរោគអេដស៍ចំនួន១០គ្រួសារ រស់នៅក្នុងស្រុកបន្ទាយស្រី នឹងដើម្បីចង់ដឹងពីសុខទុក្ខអ្នកផ្ទុកមេរោគអេដស៍នៅមូលដ្ឋាន។
តំណាងឯកឧត្តម ប្រាក់ សោភ័ណ លោកជំទាវ សុខ ណារ៉ូ បានលើកទឹកចិត្តដល់បងប្អូនអ្នកផ្ទុកមេរោគអេដស៍ និងអ្នកជំងឺអេដស៍ទាំងអស់ សូមបន្តយកចិត្តទុកដាក់ថែរក្សាសុខភាពផ្ទាល់ខ្លួន រស់នៅមានអនាម័យ និងទៅទទួលសេវាថែទាំ និងព្យាបាលដោយថ្នាំប្រឆាំងមេរោគអេដស៍ឱ្យបានទៀងទាត់ នៅតាមមណ្ឌលសុខភាព ឬមន្ទីរពេទ្យតាមការណាត់របស់លោកគ្រូពេទ្យ។
លោកជំទាវ សុខ ណារ៉ូ ក៏បាននាំនូវប្រសាសន៍ផ្ដាំផ្ញើសួរសុខទុក្ខ និងការយកចិត្តទុកដាក់ខ្ពស់ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំប្រចាំតំបន់អាស៊ី ប៉ាស៊ីហ្វិក ចំពោះការឆ្លើយតបនឹងមេរោគអេដស៍ ជំងឺអេដស៍ និងការអភិវឌ្ឍន៍នៅកម្ពុជា ដែលលោកមានការមមាញឹកខ្លាំងមិនអាចមកផ្ទាល់បាន តែលោកតែបានគិតគូរខ្ពស់បំផុត ចំពោះសុខទុក្ខបងប្អូនប្រជាពលរដ្ឋគ្រប់រូប ទើបចាត់ក្រុមការងារយើងខ្ញុំមកជួបសួរសុខទុក្ខនៅពេលនេះ ដើម្បីបានដឹងពីស្ថាននភាពជីវភាព និងសុខភាពរបស់បងប្អូនផង ដើម្បីអាចជួយគ្នាបានក្នុងកម្រិតណាមួយ។ នេះគឺជាបញ្ហាមួយធ្វើរបស់សង្គមជាតិយើង មិនមែនជារបស់នរណារម្នាក់នោះទេ គឺយើងទាំងអស់គ្នា ត្រូវរួមសហការគ្នាដោះស្រាយ ដើមី្បឈានទៅគ្រប់គ្រងឱ្យបាន នូវការឆ្លងរាលដាលថ្មី និងការរើសអើងជាដើម។
សូមជម្រាបថា អំណោយមនុស្សធម៌ដែលបានផ្ដល់ជូននាពេលនេះ ក្នុងមួយគ្រួសារទទួលបាន៖ អង្ករ៣០គីឡូក្រាម មុង១ ភួយ១ សារុង១ ក្រមា១ មី១កេស ត្រីខ១យួរ ទឹកត្រី១យួរ អំបិល១គីឡូក្រាម និងថវិកា៥ម៉ឺនរៀល៕
អត្ថបទ និងរូបភាព៖ សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
