នារសៀលនៅថ្ងៃទី៦ ខែមិថុនា ឆ្នាំ២០២៤ ឯកឧត្តម សាន វិសាល រដ្ឋលេខាធិការក្រសួងអភិវឌ្ឍន៍ជនបទ បានដឹកនាំគណៈកម្មការអន្ដរក្រសួងពាក់ព័ន្ធ ចុះត្រួតពិនិត្យផ្លូវមួយខ្សែ ជាប្រភេទផ្លូវក្រាលល្បាយក្រួសក្រហមប្រវែងជាង១២គីឡូម៉ែត្រ ភ្ជាប់ពីស្រុកសូទ្រនិគម ទៅស្រុកជីក្រែង ខេត្តសៀមរាប និងបានប្រកាសដាក់ឲ្យប្រើប្រាស់ជាផ្លូវការ ក្រោយពិនិត្យ និងវាយតម្លៃឃើញថា បានអនុវត្តត្រឹមត្រូវតាមស្ដង់ដារ និងមានគុណភាពល្អ។
លោក ទូច ម៉ាឡា ប្រធានមន្ទីរអភិវឌ្ឍន៍ជនបទខេត្ដសៀមរាប បានឲ្យដឹងថា ផ្លូវមួយខ្សែមានប្រវែង១២.៣៣០ម៉ែត្រ ទទឹងខ្នងលើ៦ម៉ែត្រ ឆ្លងកាត់ឃុំតាយ៉ែក ស្រុកសូទ្រនិគម និងឃុំពង្រលើ ស្រុកជីក្រែង អនុវត្ដន៍គម្រោងដោយមន្ទីរអភិវឌ្ឍន៍ជនបទ។ ចំពោះការងារថែទាំខួបផ្លូវក្រាលក្រួសក្រហមមួយនេះ គណៈកម្មការឯកភាពទទួលយកលទ្ធផល នៃការអនុវត្តការងាររបស់មន្ទីរអភិវឌ្ឍន៍ជនបទខេត្តសៀមរាប បញ្ចប់សុពលភាពការងារដោយគុណភាព និងសោភ័ណភាពនៅរក្សាគុណភាពល្អ។
លោកប្រធានមន្ទីរបញ្ជាក់ថា ផ្លូវមួយខ្សែនេះ នឹងជួយសម្រួលដល់ការធ្វើដំណើររបស់ប្រជាពលរដ្ឋក្នុងមូលដ្ឋានឱ្យកាន់តែមានភាពងាយស្រួល ជាពិសេសការដឹកជញ្ជូនកសិផល និងដំណាំបន្ទាប់បន្សំរបស់ប្រជាពលរដ្ឋមកកាន់ទីផ្សារ ជួយសម្រួលដល់សិស្សានុសិស្ស ធ្វើដំណើរទៅកាន់សាលារៀន សម្រួលដល់ការដឹកជញ្ជូនអ្នកជំងឺមកកាន់មន្ទីរពេទ្យបានទាន់ពេលវេលា ជៀសវាងនូវគ្រោះថ្នាក់ផ្សេងៗនារដូវទឹកឡើង ថែមទាំងបង្កលក្ខណៈងាយស្រួលដល់សេវាកម្មនានា។
ក្នុងឱកាសនោះដែរ ក្រុមការងារគណៈកម្មការអន្ដរក្រសួង បានស្នើរដល់អាជ្ញាធរមូលដ្ឋានមូលដ្ឋានដែលមាននាទីទទួលបន្ទុកថែទាំបន្ដ ត្រូវណែនាំឱ្យប្រជាពលរដ្ឋចូលរួមក្នុងការថែទាំផ្លូវ និងលូឱ្យបានល្អប្រសើរ ប្រកបដោយគុណភាព ត្រូវមានការយាមកាមយ៉ាងហ្មត់ចត់ ដើម្បីរក្សាគុណភាពផ្លូវល្អឲ្យបានគង់វង្សយូរអង្វែង ហើយចាត់ទុកថាផ្លូវនេះជារបស់ពួកគាត់ ព្រមទាំងហាមដឹកជញ្ជូនទំនិញធនធ្ងន់លើសចំនួនកំណត់ដែលធ្វើឲ្យផ្លូវងាយរងគ្រោះផងដែរ។
ជាមួយនឹងសមិទ្ធិផលផ្លូវមួយនេះ ប្រជាពលរដ្ឋដែលរស់នៅអមសងខាងផ្លូវ បានសម្ដែងការសាទរ និងរីករាយ ព្រោះផ្លូវមួយខ្សែនេះ ជាសរសៃឈាមសម្រាប់ប្រជាពលរដ្ឋធ្វើដំណើរ ហើយកន្លងមកមានការលំបាកធ្វើដំណើរដោយសារផ្លូវនូវការខូចខាតពិបាកធ្វើដំណើរ។ ប្រជាពលរដ្ឋ បានថ្លែងអំណរគុណដល់រាជរដ្ឋាភិបាល ជាពិសេសក្រសួងអភិវឌ្ឍន៍ជនបទ ដែលបានអភិវឌ្ឍន៍ផ្លូវដីក្រួសល្បាយនេះ សម្រាប់ឲ្យប្រជាពលរដ្ឋងាយស្រួលធ្វើដំណើរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
