កាលពីនៅថ្ងៃទី៥ ខែមិថុនា ឆ្នាំ២០២៤នេះ ប្រធានគណៈកម្មាធិការអាស៊ានផ្នែកវិទ្យាសាស្រ្ត បច្ចេកវិទ្យា និងនវានុវត្តន៍ បានដឹកនាំប្រជុំលើការអនុម័តសេចក្តីថ្លែងការណ៍រួមក្នុងក្របខណ្ឌបច្ចេកទេសចំនួន២ ដើម្បីលើកជូនរដ្ឋមន្រ្តីអាស៊ាន ផ្នែកវិទ្យាសាស្រ្ត បច្ចេកវិទ្យា និងនវានុវត្តន៍ ពិនិត្យនៅថ្ងៃទី៧ ខែមិថុនាខាងមុខ ជាពិសេសសេចក្តីថ្លែងការរួមលើបញ្ញាសិប្បនិម្មិត AI ដែលវិស័យនេះ គឺមានសារៈសំខាន់នៅក្នុងរអភិវឌ្ឍន៍សេដ្ឋកិច្ចសង្គមក្នុងតំបន់។
ឯកឧត្តម ហ៊ុល សៀងហេង ប្រធានគណៈកម្មាធិការអាស៊ានផ្នែកវិទ្យាសាស្រ្ត បច្ចេកវិទ្យា និងនវានុវត្តន៍ ដែលបានដឹកនាំកិច្ចប្រជុំនេះ វិស័យនេះពិតជាមានសារៈខាន់ណាស់ ដែលប្រទេសអាស៊ានទាំងអស់បានព្រមព្រៀងគ្នា និងរុញបញ្ញាសិប្បនិម្មិតនេះ សម្រាប់ការអភិវឌ្ឍន៍សេដ្ឋកិច្ចសង្គមរបស់តំបន់ ហើយបានព្រមព្រៀងគ្នា អាស៊ានផ្នែកវិទ្យាសាស្រ្ត បច្ចេកវិទ្យា និងនវានុវត្តន៍ នៅក្នុងខេត្តសៀមរាបនេះផងដែរ។ ប្រធានបទសំខាន់ៗដែលត្រូវបានពិភាក្សារួមមាន៖ ការធានាបាននូវការប្រើប្រាស់ AI ដោយយុត្តិធម៌ និងអាចទុកចិត្តបាន យុទ្ធសាស្ត្រដើម្បីបង្កើនអត្ថប្រយោជន៍ និងកាត់បន្ថយហានិភ័យនៃការប្រើប្រាស់បច្ចេកវិទ្យាបញ្ញាសិប្បនិម្មិត សម្រាប់ជាប្រយោជន៍ដល់គ្រប់ប្រទេសសមាជិកអាស៊ានទាំងអស់។
ឯកឧត្តម ហ៊ុល សៀងហេង បានបញ្ជាក់ថា បច្ចុប្បន្នបញ្ញាសិប្បនិម្មិត AI បានកំពុងរីកចម្រើន ក៏ប៉ុន្តែក៏មានបញ្ហាប្រឈមពីភាពចាំបាច់នៃឧបករណ៍ ចំណេះដឹងផ្នែក AI និងការបង្កើតគោលនយោបាយ និងយន្តការគ្រប់គ្រងការប្រើប្រាស់ AI ប្រកបដោយការទទួលខុសត្រូវ។ ចំពោះបញ្ញាសិប្បនិម្មិត នៅក្នុងកិច្ចប្រជុំអាស៊ាននេះដែរ ក៏បានលើកឡើងដោយរដ្ឋមន្រ្តីអាស៊ាន និងប្រទេសអាស៊ានទាំងអស់ ហើយក៏ត្រូវលើកឡើងដោយដៃគូសន្ទនាទាំងអស់របស់អាស៊ាន នៅលើទឹកដីអង្គរនៃកម្ពុជា។ បញ្ហានេះ ឯកឧត្តម រំពឹងថានៅពេលខាងមុខ នៅពេលនិយាយពីបញ្ញាសិប្បនិម្មិត AI ច្បាស់ណាស់គេនឹងនិយាយអំពីកម្ពុជា ដែលកម្ពុជាបានលើកឡើងជូនអាស៊ានទាំងអស់សម្រាប់ជាតំណរនៃមូលដ្ឋានគ្រឹះទាំងអស់គ្នាផងដែរ៕
អត្ថបទ និងរូបភាព៖ ម៉ី សុខារិទ្ធ
កែសម្រួល៖ លោក អ៊ុន ណារាជ្យ
