នាយ និងនាយរងនគរបាលចំនួន១៩០នាក់ នៅថ្ងៃទី៤ ខែមិថុនា ឆ្នាំ២០២៤នេះ បានបញ្ចប់វគ្គបណ្តុះបណ្តាលកម្រិតបឋមវិជ្ជាជីវៈនគរបាលជំនាន់ទី១៨ លើកទី១ បន្ទាប់ពីបានឆ្លងកាត់ការសិក្សាអស់រយៈពេល៤ខែ លើចំណេះដឹងជំនាញវិជ្ជាជីវៈនគរបាលចំនួន២១មុខវិជ្ជា រួមមានយុទ្ឋវិធីនគរបាល ក្បាច់គុន លំហាត់របៀប ក្រមសីលធម៌វិជ្ជាជីវៈ វិន័យកងកម្លាំង ពង្រឹងកាយសម្បទា ចុះកម្មសិក្សាក្នុងថ្នាក់-ក្រៅថ្នាក់ និងទទួលវិញ្ញាបនបត្របញ្ជាក់ការសិក្សា នៅសាលានគរបាលជាតិភូមិភាគ៤ ខេត្តសៀមរាប។
លោកឧត្តមសេនីយ៍ទោ សាយ រិទ្ឋីសក្តិ នាយកសាលានគរបាលជាតិភូមិភាគ៤ បានឲ្យដឹងថា បង្កើតឡើងនៅឆ្នាំ២០១០ និងចាប់ផ្តើមបណ្តុះបណ្តាលនៅឆ្នាំ២០១៤ រហូតមកដល់ពេលនេះសាលានគរបាលជាតិភូមិភាគ៤ បានបណ្តុះបណ្តាលដល់កងកម្លាំងនគរបាលចំនួន ៣.៦៦៣នាក់ នារី៥៤៤នាក់។ចំពោះបណ្តុះបណ្តាលលើកទី១៨ ជំនាន់ទី១នេះ គឺតម្រូវឱ្យសិស្សនគរបាលសិក្សាលើ ២១មុខវិជ្ជា ហើយដើម្បីលើកកម្ពស់គុណភាព សមត្ថភាព និងក្រមសីលធម៌ វិជ្ជាជីវៈ និងកំណត់លទ្ឋផលជាប់ ឬធ្លាក់ សាលាបានវាយតម្លៃការសិក្សាស្របតាមនិយាមបច្ចេកទេស និងផ្តល់ពិន្ទុ ៣វិធី គឺតាមរយៈពិន្ទុវិន័យ សីលធម៌ និងវត្តមាន ជាលទ្ធផលសិស្សយកចិត្តទុកដាក់រៀនសូត្រ ហ្វឹកហាត់ គោរពវិន័យទទួលបានលទ្ឋផល៩៨.៩៦%។
ក្នុងនាមឯកឧត្តមប្រធានបណ្ឌិត្យសភានគរបាលកម្ពុជា ឯកឧត្តម ឧត្តមសេនីយ៍ឯកសាស្ត្រាចារ្យ ប្រាក់ ណារ៉ុង អនុប្រធានបណ្ឌិត្យសភានគរបាលកម្ពុជា បានថ្លែងការកោតសរសើរ ចំពោះវឌ្ឍនភាពយ៉ាងឆាប់រហ័សរបស់សាលានគរបាលជាតិភូមិភាគ៤ ដែលនេះជាការឆ្លើយតបនឹងតម្រូវការនៃការបណ្តុះបណ្តាលក្នុងយុគសម័យនៃសន្តិភាព ខណៈដែលប្រទេសជាតិកំពុងមានការរីកចម្រើនលើគ្រប់វិស័យ ដើម្បីបំពេញបានតាមតម្រូវការនៃការបណ្តុះបណ្តាលប្រកបដោយគុណភាព ក្នុងគោលបំណងពង្រឹងសមត្ថភាពជំនាញ និងលើកកម្ពស់ការគោរពក្រមសីលធម៌វិជ្ជាជីវៈរបស់កងកម្លាំងនគរបាលជាតិឱ្យកាន់តែប្រសើរថែមទៀត ស្របតាមកម្មវិធីនយោបាយ និងយុទ្ឋសាស្ត្របញ្ចកោណរបស់រាជរដ្ឋាភិបាលនីតិកាលទី៧ ក្រោមការដឹកនាំដ៏ឈ្លាសវៃនិងទស្សនៈវិស័យជឿនលឿន របស់សម្តេចធិបតី ហ៊ុន ម៉ាណែត នាយករដ្ឋមន្ត្រី។
ឯកឧត្តម ប្រាក់ ណារ៉ុង មានប្រសាសន៍ថា ការបណ្តុះបណ្តាលកងកម្លាំងនគរបាលជាតិ គឺជាការងារចាំបាច់ដែលត្រូវតែបន្តធ្វើជាប់ជាប្រចាំ ពីព្រោះការបណ្តុះបណ្តាលបានផ្តល់នូវអត្ថប្រយោជន៍ជាច្រើនក្នុងការធ្វើឱ្យកងកម្លាំងនគរបាលជាតិមានចំណេះដឹងគ្រប់គ្រាន់លើផ្នែកទ្រឹស្តី បទពិសោធ ជំនាញវិជ្ជាជីវៈ និងអាកប្បកិរិយាល្អ ក្នុងការរួមចំណេករក្សាឱ្យបានរឹងមាំនួនខឿនសន្តិសុខជាតិ សណ្តាប់ធ្នាប់សាធារណៈនិងសុវត្ថិភាពសង្គម ដែលជាមូលដ្ឋានគ្រឺះនៃការអភិវឌ្ឍជាតិលើគ្រប់វិស័យ ព្រមទាំងផ្តល់សេវាសាធារណៈបានល្អក្នុងការបំរើប្រជាពលរដ្ឋ។ ចំពោះការបិទវគ្គបណ្តុះបណ្តាលនាពេលនេះដែរ គឺជាសក្ខីភាពឆ្លុះបញ្ចាំងអំពីលទ្ឋផលការងារថ្មីៗបន្ថែមទៀតដែលកើតចេញពីការប្តេជ្ញាចិត្ត ឆន្ទៈមោះមុត និងការទទួលខុសត្រូវខ្ពស់ ក្នុងការបំពេញភារកិច្ចសម្រេចបានជោគជ័យស្របតាមការណែនាំដែលបានកំណត់ និងគោលការណ៍ណែនាំរបស់បណ្ឌិត្យសភានគរបាលកម្ពុជា។ ឯកឧត្តមក៏បានផ្តាំផ្ញើដល់សិស្សនគរបាលជ័យលាភីទាំងអស់ ត្រូវបន្តខិតខំសិក្សា ហ្វឹកហាត់ និងគោរពវិន័យបន្ថែមទៀត ហើយយកចំណេះ និងជំនាញទាំងនេះទៅប្រើប្រាស់ឱ្យមានប្រយោជន៍ដល់អង្គភាព និងសង្គមជាតិ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
