នៅព្រឹកថ្ងៃទី០៣ ខែកក្កដា ឆ្នាំ២០២៤នេះ គណៈកម្មាធិការប្រយុទ្ធប្រឆាំងនឹងជំងឺអេដស៍ខេត្តសៀមរាប បានបើកកិច្ចប្រជុំស្តីពីការឆ្លើយតបជាពហុវិស័យ ពន្លឿនការបញ្ឈប់រីករាលដាលមេរោគអេដស៍ក្នុងខេត្តសៀមរាប ដឹកនាំដោយ លោក ពិន ប្រាកដ អភិបាលរងខេត្ត និងជាប្រធានគណៈកម្មាធិការប្រយុទ្ធប្រឆាំងនឹងជំងឺអេដស៍ខេត្ត ដោយមានការចូលរួមពីថ្នាក់ដឹកនាំមន្ទីរអង្គភាព អាជ្ញាធរក្រុងស្រុក ឃុំសង្កាត់ តំណាងអង្គការសមាគម និងអ្នកពាក់ព័ន្ធជាច្រើនរូប។
លោក ពិន ប្រាកដ មានប្រសាសន៍ថា កិច្ចប្រជុំនាពេលនេះគឺដើម្បីបង្កើនទំនាក់ទំនង និងកិច្ចសហការល្អក្នុងការឆ្លើយតបមេរោគអេដស៍ ជំងឺអេដស៍ខេត្តសៀមរាប ពង្រឹងសកម្មភាព បទអន្តរាគមន៍ និងការចូលរួមជាពហុវិស័យ ឆ្លើយតបការរាលដាលមេរោគអេដស៍ក្នុងខេត្ត ប្រកបដោយប្រសិទ្ធិភាពពិនិត្យលើសកម្មភាព បទអន្តរាគមន៍បន្ថែម ដើម្បីអនុវត្តទីក្រុងពន្លឿនការឆ្លើយតប និងឈានសម្រេចគោលដៅ ៩៥-៩៥-៩៥។ ជាពិសេសពិនិត្យ និងសម្របសម្រួលអំពីបច្ចុប្បន្នភាព ការរៀបចំគណៈកម្មការអេដស៍ នៅតាមស្រុកក្រុង ឃុំសង្កាត់ និងផែនការសម្មភាពអេដស៍សម្របសម្រួលដោះស្រាយឧបសគ្គ/បញ្ហាផ្សេងៗអំពីសកម្មភាពបទអន្តរាគមន៍ការឆ្លើយតបមេរោគអេដស៍។
ព័ត៌មានជាតិ ថ្មីៗ
លោកអភិបាលរងខេត្ត ក៏បានណែនាំដល់មន្ត្រីសុខាភិបាល អាជ្ញាធរមូលដ្ឋាន និងអ្នកពាក់ព័ន្ធទាំងអស់ សូមបន្តសហការចុះអប់រំផ្សព្វផ្សាយមេរោគអេដស៍ កាមរោគដល់ប្រជាពលរដ្ឋនៅតាមសហគមន៍ ជាពិសេសក្រុមប្រឈមមុខខ្ពស់មេរោគអេដស៍ ហើយគាំទ្រដល់ការបញ្ជូនអ្នកសង្ស័យទៅធ្វើតេស្តឈាមរកមេរោគអេដស៍ គាំទ្រការបញ្ជូនអ្នកជំងឺអេដស៍ទៅទទួលសេវាថែទាំព្យាបាលនៅតាមមន្ទីរពេទ្យ គាំទ្រការបញ្ជូនស្ត្រីផ្ទៃពោះផ្ទុកមេរោគអេដស៍ទៅទទួលសេវាថែទាំមុនសំរាល និងសេវា ART ជាពិសេសត្រូវសម្របសម្រួលផ្តល់ប័ណ្ណក្រីក្រ និងប័ណ្ណសមធម៌ដល់អ្នកជំងឺអេដស៍ និងជនរងគ្រោះ ហើយឧបត្ថម្ភសម្ភារៈអាហារដល់ក្រុមគ្រួសារអ្នកជំងឺអេដស៍ និងគ្រួសាររងគ្រោះ។
លោកក៏បានអំពាវនាវដល់មន្ទីរសុខាភិបាលខេត្ត អង្គការដៃគូទាំងអស់ ជាពិសេសម្ចាស់ និងមេការសេវាកំសាន្ដក្នុងខេត្តសៀមរាប ត្រូវសហការជាមួយអាជ្ញាធរគ្រប់លំដាប់ថ្នាក់ ក្នុងការចូលរួមដោះស្រាយឧបសគ្គ បញ្ហាផ្សេងៗ អំពីសកម្មភាពឆ្លើយតបមេរោគអេដស៍ ជំងឺអេដស៍ក្រុមគោលដៅប្រឈមមុខខ្ពស់ ខណៈកាលពីឆ្នាំ២០២២កន្លងទៅ នៅខេត្តសៀមរាប មានអ្នកផ្ទុកមេរោគអេដស៍ចំនួន ៥.៩៨៥នាក់ ក្នុងនោះមានមនុស្សពេញវ័យ ៥.៨៣៣ ស្រ្តី ២.៣៤៣នាក់ និងកុមារ ១៥២នាក់៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
