នៅថ្ងៃទី០៣ ខែកក្កដា ឆ្នាំ២០២៤នេះ ការដេញថ្លៃគម្រោងសាងសង់ផ្លូវចំនួន៣ខ្សែ ក្នុងសង្កាត់សំបួរ និងសង្កាត់ចុងឃ្នៀស ក្រុងសៀមរាប ត្រូវបានប្រកាសបញ្ចប់ដេញថ្លៃដោយជោគជ័យ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរសង្កាត់ គណៈកម្មការលទ្ធកម្មសង្កាត់ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក អ៊ុំ ណារី ប្រធានគណៈកម្មការលទ្ធកម្មសង្កាត់ចុងឃ្នៀស បានឲ្យដឹងថា ចំពោះគម្រោងមូលនិធិសង្កាត់ ឆ្នាំ២០២៤នេះ សង្កាត់ចុងឃ្នៀស បានដាក់ដេញថ្លៃគម្រោងចំនួន២ រួមមាន៖ ទី១.គម្រោងដាក់ដីក្រាលក្រួសធម្មជាតិ ១ខ្សែ ក្នុងទីសាលារៀន ប្រវែង១៣៥ម៉ែត្រ ទទឹង១៧ម៉ែត្រ កម្រាស់បេតុង០.១០ម៉ែត្រ ដាក់លូមូលទោលកាត់ផ្លូវមុខកាត់១ម៉ែត្រមួយកន្លែង និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ៦៤.៩៨១.៧១៣រៀល ដោយមានក្រុមហ៊ុនចំនួន៤ បានដាក់សំណើរ ជាលទ្ធផលបានទៅលើក្រុមហ៊ុន អ.អិម.ធីវី ក្នុងតម្លៃ ៤៥.០០០.០០០រៀល។ ទី២.គម្រោងដាក់ដីក្រាលក្រួស ១ខ្សែ មុខមណ្ឌលសុខភាពប្រវែង១៥ម៉ែត្រ ទទឹង១២ម៉ែត្រ និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ២៥.២៩៨.៧៤០រៀល ដោយមានក្រុមហ៊ុនចំនួន៥ បានដាក់សំណើរ ជាលទ្ធផលបានទៅលើក្រុមហ៊ុន អ.អិម.ធីវី ក្នុងតម្លៃ ១៦.០០០.០០០រៀល។
ដោយឡែកបើតាមលោក ឈ្លឿន ឡា ប្រធានគណៈកម្មការលទ្ធកម្មសង្កាត់សំបួរ បានឲ្យដឹងថា គម្រោងមូលនិធិសង្កាត់ឆ្នាំ២០២៤នេះ សង្កាត់សំបួរបានដាក់ដេញថ្លៃគម្រោងសាងសង់ផ្លូវបេតុងអាមេ១ខ្សែ ប្រវែង១៥៦ម៉ែត្រ ទទឹង៦ម៉ែត្រ កម្រាស០.១៥ម៉ែត្រ មានក្រួសធម្មជាតិស្មារផ្លូវទាំងសងខាង និងលូមុខកាត់០.៨០ម៉ែត្រ ចំនួន២កង់ សម្រាប់ដាក់ការពារឡានធំ ដាក់ស្លាកសញ្ញាកំណត់ល្បឿនចំនួន១ និងស្លាកគម្រោងចំនួន១ ក្នុងតម្លៃប៉ាន់ស្មាន ១២០.៨៨២.០២០រៀល ដោយមានក្រុមហ៊ុនចំនួន៧ បានដាក់សំណើរ ជាលទ្ធផលបានទៅលើក្រុមហ៊ុន ធីធីអេសបៀល ក្នុងតម្លៃ ៥៦.៧៨៤.០០០រៀល។
ជាមួយនឹងការទទួលបានសិទ្ធនៃការសាងសង់នេះ តំណាងក្រុមហ៊ុនម៉ៅការទាំងពីរ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
