នៅថ្ងៃទី០១ ខែសីហា ឆ្នាំ២០២៤ លោក អុឹង គឹមលាង អភិបាលរងខេត្តសៀមរាប រួមនឹងថ្នាក់ដឹកនាំខេត្តមួយចំនួនទៀត បានទទួលជួបពិភាក្សា និងពិគ្រោះយោបល់ជាមួយអង្គការ IOM ស្តីពីការពិនិត្យឡើងវិញ លើផែនការត្រៀមបម្រុង និងឆ្លើយតបគ្រោះអាសន្ន តាមបណ្តាភូមិសាស្ត្រក្រុងស្រុក នៃខេត្តសៀមរាប ដឹកនាំដោយ ឯកឧត្តម ឃុន សុខា អគ្គលេខាធិការរង នៃគណៈកម្មាធិការជាតិគ្រប់គ្រងគ្រោះមហន្តរាយ និងតំណាងអង្គការ មន្ទីរអង្គភាពពាក់ព័ន្ធក្នុងខេត្ត។
លោក អុឹង គឹមលាង កិច្ចពិភាក្សានាពេលនេះ បានឆ្លុះបញ្ចាំងពីវិស័យអាទិភាពទាំង៦ រួមមាន សន្តិសុខស្បៀងនិងអាហារូបត្ថម្ភ អប់រំ សុខភាព ទឹកស្អាត និងអនាម័យ ជម្រក និងកិច្ចការពារយេនឌ័រ ពិភាក្សាផែនការត្រៀមរៀបចំធ្វើលំហាត់សមនៃផែនការត្រៀមបម្រុងនិងឆ្លើយតបគ្រោះអាសន្ន និងការបង្ហាញសង្ខេបគម្រោងអង្គការ IOM និងផែនការបន្ទាប់ដែលនឹងអនុវត្តនៅក្នុងខេត្តសៀមរាប ។
ឯកឧត្តម ឃុន សុខា បង្ហាញថា កម្ពុជាគឺជាប្រទេសមួយក្នុងចំណោមប្រទេសដែលប្រឈមនឹងផលប៉ះពាល់នៃការប្រែប្រួលអាកាសធាតុ និងគ្រោះមហន្តរាយក្នុងចំណោមប្រទេសក្នុងតំបន់អាស៊ី រួមមាន៖ គ្រោះទឹកជំនន់ គ្រោះរាំងស្ងួត ដែលជាមុខ សញ្ញាគ្រោះមហន្តរាយធម្មជាតិប៉ះពាល់ដល់ប្រទេស ផលប៉ះពាល់ធ្ងន់ធ្ងរពីគ្រោះមហន្តរាយទឹកជំនន់ ខ្យល់ព្យុះ ក៏បានកើតឡើងញឹកញាប់ផងដែរ រវាងពីខែសីហា ដល់ខែវិច្ឆិកា ជារៀងរាល់ឆ្នាំ។ ដើម្បីឆ្លើយតបទៅនឹងបញ្ហាប្រឈមទាំងនេះ ដោយមានកិច្ចសហប្រតិបត្តិការរវាងគណៈកម្មាធិការជាតិគ្រប់គ្រងគ្រោះមហន្តរាយ និងអង្គការអន្តរជាតិទេសន្តរប្រវេសន៍ បានទស្សនកិច្ច និងពិគ្រោះយោបល់ នៅតាមបណ្ដាលខេត្តទាំង៦ ជុំវិញបឹងទន្លេសាប ការចូលរួមគ្រប់អ្នកពាក់ព័ន្ធ រួមមានស្ថាប័នរាជរដ្ឋាភិបាល កងកម្លាំង កាកបាទក្រហម និង អង្គការដៃគូអន្តរជាតិ គឺដើម្បីធ្វើឱ្យប្រសើរឡើងនូវកិច្ចខិតខំប្រឹងប្រែងរៀបចំផែនការត្រៀមបម្រុង និងឆ្លើយតបទាន់ពេលវេលា៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
