ក្នុងដំណើរទស្សនកិច្ចនៅសាលាបឋមសិក្សាវត្តរាជបូណ៌ ក្រុងសៀមរាប នៅថ្ងៃទី១ ខែសីហា ឆ្នាំ២០២៤នេះ ប្រធានប្រតិភូនៃអង្គភាពប្រឆាំងអំពើពុករលួយមកពីប្រទេសថៃ និងប្រទេសឡាវ បានថ្លែងនូវការកោតសរសើរចំពោះកម្ពុជាដែលបានបោះជំហានមុនគេ នៅក្នុងការដាក់បញ្ចូលមេរៀនប្រឆាំងអំពើពុករលួយក្នុងកម្មវិធីសិក្សារបស់រដ្ឋ។
លោក Vilayvanh Boutdakham អនុប្រធាននៃអាជ្ញាធរអធិការកិច្ចរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ និងជាប្រធានគណៈប្រតិភូ SIA បានបង្ហាញក្តីរីករាយជាខ្លាំង ចំពោះរាជរដ្ឋាភិបាល ដែលបានដាក់គោលនយោបាយ នៅតាមសាលាឱ្យមានប្រសិទ្ធភាព ជាពិសេសបានបញ្ចូលកម្មវិធីសិក្សាផ្នែកប្រឆាំងអំពើពុករលួយ នៅក្នុងសាលាដើម្បីឱ្យសិស្សនុសិស្សបានយល់ដឹងពីការប្រឆាំងអំពើពុករលួយកាន់តែច្រើន។ លើសពីនេះទៅទៀត បានបង្ហាញពីការបង្រៀន ការរៀន ការសាមគ្គីគ្នា និងការអនុវត្តការងាររបស់ខ្លួនប្រកបដោយយកចិត្តទុកដាក់។
លោកបន្តថា តាមរយៈការធ្វើបទបង្ហាញបានឱ្យសិស្សបានដឹងខ្ពស់ ដែលធ្វើឱ្យសិស្សមានចំណេះដឹង និងវិន័យ មានគុណសម្បត្តិ សីលធម៌ក្នុងសង្គម មានសមាធិ មានការអនុវត្តវិន័យ ការរស់នៅក្នុងសង្គមយ៉ាងល្អប្រសើរ ទាំងអស់នេះហើយ គឺជាជោគវាសនាសិស្សរបស់នាពេលអនាគត។ នៅពេលគណៈប្រតិភូនិវត្តនៅកាន់ប្រទេសខ្លួនវិញ នឹងធ្វើការជំរុញវិស័យអប់រំ ធ្វើការបញ្ចូលកម្មវិធីសិក្សានេះឱ្យដូចនៅកម្ពុជាផងដែរ។
លោក Eakawit Wajjwalku ស្នងការគណៈកម្មការជាតិប្រឆាំងអំពើពុករលួយ នៃព្រះរាជាណាចក្រថៃ និងជាប្រធានគណៈប្រតិភូ NACC ក្នុងដំណើរទស្សនកិច្ចក៏ និងសិក្សាស្វែងយល់ពីស្ថានភាពទូទៅ ការអភិវឌ្ឍរដ្ឋបាលមូលដ្ឋាន និងការអភិវឌ្ឍរដ្ឋបាលសាធារណៈខេត្តសៀមរាប នៅថ្ងៃដដែលនោះ បានលើកឡើងថា កម្ពុជាបានបោះជំហានមុនគេក្នុងអាស៊ាន ក្នុងការដាក់បញ្ចូលខ្លឹមសារប្រឆាំងអំពើពុករលួយទៅក្នុងវិស័យអប់រំ។ វាជាការបោះជំហានដ៏ល្អមួយក្នុងការប្រយុទ្ធប្រឆាំងអំពើពុករលួយ ដែលពេលត្រឡប់ទៅប្រទេសថៃវិញ លោកនឹងលើកបញ្ហានេះ មកពិភាក្សា។
សូមបញ្ជាក់ថា អង្គភាពប្រឆាំងអំពើពុករលួយ បានដាក់សៀវភៅអប់រំស្តីពីការប្រឆាំងអំពើពុករលួយលោកគ្រូ អ្នកគ្រូ និងសិស្សឱ្យអនុវត្តកម្មវិធីថ្នាក់ជាតិ មាន៣កម្រិត៖ មានកម្រិតមធ្យមសិក្សាទុតិយភូមិថ្នាក់ទី១០, ១១ និង១២ ចាប់ពីឆ្នាំសិក្សា ២០១៤-២០១៥, កម្រិតមធ្យមសិក្សាបឋមភូមិថ្នាក់ទី ៧,៨ និងទី៩ ចាប់ពីឆ្នាំសិក្សា ២០១៥-២០១៦ និងកម្រិតបឋមសិក្សាចាប់ពីឆ្នាំសិក្សា ២០១៦-២០១៧៕
អត្ថបទ និងរូបភាព៖ លោក ជា ស្រស់ , លោក មុី សុខារិទ្ធ
កែសម្រួល៖ លោក អ៊ុន ណារាជ្យ
