ក្នុងកម្មវិធីសន្ទនាមតិរបស់វិទ្យុ និងទូរទស្សន៍ជាតិខេត្តសៀមរាប នៅថ្ងៃទី០១ ខែសីហា ឆ្នាំ២០២៤នេះ កញ្ញា ហែម ចិន្ដា មន្ត្រីការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តសៀមរាប បង្ហាញថា នៅក្នុងរដូវវស្សាសត្វចិញ្ចឹមរបស់កសិករពិតជាងាយប្រឈមនឹងកើតមានជំងឺជាច្រើន ហើយឆ្លងទៅគ្នាជាបន្តបន្ទាប់ ឬអាចងាប់ក៏មាន ប្រសិនបើប្រជាកសិករមិនយកចិត្តទុកដាក់ក្នុងការបង្ការ ការពារលើសត្វទាំងនោះ និងតាមដានក៏អាចឈានដល់ការចម្លងដល់សត្វដទៃជាបន្តបន្ទាប់ ឬស្លាប់ជាដើម។
កញ្ញា ហែម ចិន្ដា បានបញ្ជាក់ថា នៅក្នុងប្រទេសកម្ពុជា នារដូវវស្សាពិតណាស់សត្វគោ ក្របី របស់កសិករភាគច្រើនអាចកើតមានជំងឺមួយចំនួនដូចជា៖ ជំងឺសារទឹក ជំងឺអុតក្តាម បូសខ្យល់ជាដើម។ ប៉ុន្តែក្នុងនោះជំងឺសារទឹក មានក្រុងស្រុកចំនួន៥ នៃខេត្តសៀមរាប ដែលកំពុងប្រឈមមានការកើតឡើងខ្ពស់ ដូចជា៖ ក្រុងសៀមរាប ស្រុកសូទ្រនិគម ស្រុកពួក ស្រុកក្រឡាញ់ និងស្រុកជីក្រែង។
ព័ត៌មានជាតិ ថ្មីៗ
មន្ត្រីជំនាញខាងលើ ក៏បានបង្ហាញថា ការចាក់វ៉ាក់សាំងដល់សត្វចិញ្ចឹម គឺពិតជាមានសារៈសំខាន់ណាស់ ក្នុងការជួយបង្ការ ការពារសត្វទាំងនោះចៀសផុតពីជំងឺផ្សេងៗ តាមរយៈការមានប្រព័ន្ធភាពស៊ាំរបស់សត្វ ហើយប្រសិនបើប្រជាកសិករមិនតាមដានលើសត្វចិញ្ចឹមរបស់ខ្លួនបានត្រឹមត្រូវនោះទេ វាអាចនឹងងាយប្រឈមនឹងការផ្ទុះជំងឺផ្សេងៗក្នុងសហគមន៍ជាពុំខាន។
មន្ត្រីជំនាញដដែលក៏បានបញ្ជាក់ទៀតថា ជាមួយនឹងការបង្ការ ទប់ស្កាត់នូវបញ្ហានេះការប្រឈមកើតមានជំងឺទាំងអស់នេះ មន្ទីរកសិកម្មខេត្ត នឹងធ្វើការផ្សព្វផ្សាយទាក់ទងនឹងការធ្វើទីទួលសុវត្ថិភាពនៅតាមមូលដ្ឋាននៅរដូវវស្សា ដើម្បីធ្វើការជម្លៀសសត្វ និងរកជំរកសម្រាប់ទុកសត្វ ការរៀបចំត្រៀមចំណី និងទឹកឱ្យបានគ្រប់គ្រាន់ គ្រប់គ្រង និងមើលថែសត្វឱ្យបានល្អជៀសវាងគ្រោះថ្នាក់ជាយថាហេតុ ដែលបង្កដោយសត្វទៅលើមនុស្ស។ ជាមួយនោះក្នុងករណីមានសត្វឈឺ ត្រូវបំបែកសត្វឈឺចេញពីសត្វជា និងត្រូវទាក់ទងទៅទីភ្នាក់ងារសុខភាពសត្វភូមិ អាជ្ញាធរភូមិឃុំ ឬមន្រ្តីជំនាញ ដើម្បីចុះអន្តរាគមន៍ជាបន្ទាន់ដោយមិនត្រូវប៉ះពាល់ វះកាត់ ឬយកសត្វដែលឈឺ ឬងាប់នោះទៅបរិភោគ ជាពិសេសផ្សព្វផ្សាយពីការហាមមិនឱ្យធ្វើចរាចរសត្វឈឺទៅកាន់ទីផ្សារ ដោយសត្វឈឺ ឬងាប់នោះត្រូវយកទៅដុតកម្ទេចចោល៕
អត្ថបទ និងរូបភាព៖ លោកស្រី ភី រចនា
កែសម្រួល៖ លោក អ៊ុន ណារាជ្យ
