នៅថ្ងៃទី៣ ខែសីហា ឆ្នាំ២០២៤ អធិការដ្ឋានរដ្ឋបាលជលផលខាងជើងបឹងទន្លេសាប និងអាជ្ញាធរខេត្តសៀមរាប បានធ្វើការលែងពូជត្រីចម្រុះដូចជា កូនត្រីប្រា កូនត្រីឆ្ពិន កូនត្រីអណ្តែងទន់ កូនត្រីក្រាញ់ និងត្រីព្រួល សរុប៤០.០០០ក្បាល ចូលទៅក្នុងបឹងបង្កោង ក្នុងឃុំអំពិល ស្រុកប្រាសាទបាគង ខេត្តសៀមរាប និងដុតបំផ្លាញឧបករណ៍ឆក់ត្រី ២៩៥គ្រឿង។
លោក អុឹង គឹមលាង អភិបាលរងខេត្តសៀមរាប បានបង្ហាញថា នៅពេលខាងមុខរដ្ឋបាលខេត្តសៀមរាប នឹងបន្ថែមការលែងកូនត្រីនៅស្រះនានារបស់វត្ត និងបឹងត្រពាំងផ្សេងៗក្នុងខេត្តជាច្រើន ដើម្បីរក្សាបាននិរន្តរភាពនៃទិន្នផលត្រីក្នុងបឹង សម្រាប់ផ្គត់ផ្គង់ក្នុងសហគមន៍ និងឈានទៅលក់ក្នុងទីផ្សារក៏អាចថាបាន។ លោកក៏សូមថ្លែងអំណរគុណដល់ក្រសួងកសិកម្ម ដែលបាននាំយកពូជត្រីមកលែងក្នុងបឹងបង្កោង ដែលជាបឹងធម្មជាតិហើយប្រជាសហគមន៍តែងតែប្រារព្ធពិធីឡើងអ្នកតាជារៀងរាល់ឆ្នាំ ដោយនាំគ្នាចាប់ត្រីដើម្បីធ្វើនំបញ្ចុក។ ហើយការលែងកូនត្រីនេះ ក៏ជាសារបំផុសមហាជនឱ្យមានស្មារតីចូលរួមការពារ អភិរក្ស និងអភិវឌ្ឍធនធានជលផល ឱ្យបានយល់ជ្រួតជ្រាបដល់គ្រប់ស្រទាប់ប្រជាពលរដ្ឋ មន្ត្រីរាជការ ស្ថាប័នរដ្ឋ និងឯកជន ជាពិសេសកូនចៅជំនាន់ក្រោយសំដៅធានាដល់ការគ្រប់គ្រង និងការប្រើប្រាស់ធនធានជលផលឱ្យមាននិរន្តរភាពតាមយុទ្ធសាស្ត្រកំណែទម្រង់វិស័យជលផលដ៏ស៊ីជម្រៅរបស់រាជរដ្ឋាភិបាលកម្ពុជា។
ក្នុងឱកាសនោះ ឯកឧត្តម ពុំ សុថា ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលជលផលក្រសួងកសិកម្ម មានប្រសាសន៍ថា ការនាំយកកូនត្រីមកលែងនៅបឹងនេះ ក៏ព្រោះថាប្រជាសហគមន៍ក្នុងមូលដ្ឋាននេះបានចូលរួមការពារ និងអភិរក្សធនធានជលផលបានយ៉ាងខ្ជាប់ខ្ជួន សម្រាប់បម្រើឱ្យផលប្រយោជន៍សហគមន៍យើង។ ឯកឧត្តមក៏បានជំរុញ និងលើកទឹកចិត្តឱ្យយុវជន សិស្សានុសិស្ស និងប្រជាពលរដ្ឋសហការយកអស់កម្លាំងកាយចិត្តនាំគ្នាជីក និងស្តារបឹងឱ្យមានជម្រៅជ្រៅជាងនេះ ដើម្បីការពាររក្សា និងពង្រីកធនធានជលផលឱ្យកាន់តែទទួលបានទិន្នផលខ្ពស់ បើរួមសាមគ្គីគ្នាធ្វើបាននោះប្រជាសហគមន៍បង្កោងនេះនឹងក្លាយជាគំរូសម្រាប់សហគមន៍នេសាទផ្សេងៗទៀត។ ឯកឧត្តមក៏បានអំពាវនាវដល់ប្រជាពលរដ្ឋទូទៅ មិនឱ្យប្រើប្រាស់ឧបករណ៍នេសាទខុសច្បាប់ ជាពិសេសឧបករណ៍ឆក់ត្រីតាមបឹងបួរនានា ព្រោះវានាំឱ្យវិនាសពូជត្រីទាំងស្រុងនាពេលអនាគតនិងជាអំពើល្មើសនឹងច្បាប់មិនអាចលើកលែងបាន និងនាំឱ្យមានគ្រោះថ្នាក់ដល់អាយុជីវិតខ្លួនឯងផងដែរ។
សូមជម្រាបថា នៅថ្ងៃដដែលនេះ ថ្នាក់ដឹកនាំក្រសួងកសិកម្ម រួមនឹងលោកអភិបាលរងខេត្ត និងមន្ត្រីជំនាញជលផល បាននាំអំណោយជាឧបត្ថម្ភគ្រឿងឧបភោគបរិភោគមួយចំនួន ផ្ដល់ជូនដល់ក្រុមអន្តរាគមន៍ថ្នាក់ជាតិបង្ក្រាបបទល្មើសជលផលនៅបឹងទន្លេសាប ប្រចាំការកន្លែងអភិរក្សជលផលកំពង់ភ្លុក ស្រុកប្រាសាទបាគង ខេត្តសៀមរាប រួមមាន៖ ប្រេងម៉ាស៊ូត៧០០លីត្រ អង្ករ៤បាវ សាច់ជ្រូក១៨គីឡូក្រាម បន្លែចម្រុះ៣០គីឡូក្រាម និងថវិកា ៥លានរៀលផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
