ការដេញថ្លៃគម្រោងសាងសង់ផ្លូវបេតុងអាមេ២ខ្សែ ស្ថិតក្នុងភូមិស្វាយស និងភូមិឬស្សីធំ នៃឃុំស្វាយស ស្រុកវ៉ារិន ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី០៦ ខែសីហា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ស្អាត អឿត សមាជិកគណៈកម្មការលទ្ធកម្មឃុំស្វាយស ស្រុកវ៉ារិន បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំស្វាយស បានដាក់ដេញថ្លៃគម្រោងសាងសង់ផ្លូវបេតុងអាមេ២ខ្សែ ប្រវែង១៥០ម៉ែត្រ ទទឹង៥ម៉ែត្រ កម្រាស់បេតុង០.១៥ម៉ែត្រ សាងសង់លូកាត់ផ្លូវមុខកាត់០.៦ម៉ែត្រ ប្រវែង៦ម៉ែត្រ ១កន្លែង ដាក់លូការពារផ្លូវមុខកាត់០.៨ម៉ែត្រ ៤កង់ និងស្លាកសញ្ញាគម្រោងចំនួន១កន្លែង ស្ថិតក្នុងតម្លៃប៉ាន់ស្មាន១០១.៦៧៧.២៥៥រៀល ដោយមានក្រុមហ៊ុនចំនួន៥ បានដាក់សំណើ។ ជាលទ្ធផលបានទៅលើក្រុមហ៊ុន អុី សៀងហៃ ក្នុងតម្លៃ ៤៦.៤២៥.១០០រៀល។
ជាមួយនឹងការទទួលបានសិទ្ធិនៃការសាងសង់នេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
