មន្ត្រីជំនាញនៃមន្ទីរសុខាភិបាលខេត្តសៀមរាប បានបង្ហាញថា ជំងឺរលាកផ្លូវដង្ហើម ជាជំងឺមួយប្រភេទក្នុងចំណោមជំងឺជាច្រើនទៀត ដែលភាគច្រើនវាងាយកើតបំផុតលើប្រជាពលរដ្ឋនៅក្នុងរដូវវស្សានេះ ហើយការចម្លងភាគច្រើនបង្កឡើងពីវីរុស និងអាចបណ្ដាលមកពីបាក់តេរីដែរ។
ក្នុងកម្មវិធីសន្ទនាមតិរបស់វិទ្យុ និងទូរទស្សន៍ជាតិខេត្តសៀមរាប នៅថ្ងៃទី០៦ ខែសីហា ឆ្នាំ២០២៤នេះ លោកវេជ្ជបណ្ឌិត សូ សុទ្ធី ប្រធានការិយាល័យបង្ការ និងគ្រប់គ្រងជំងឺ នៃមន្ទីរសុខាភិបាលខេត្តសៀមរាប បានបញ្ជាក់ថា វិធានការដើម្បីការពារពីជំងឺរលាកផ្លូវដង្ហើម និងជំងឺឆ្លងផ្សេងៗដែលពាក់ព័ន្ធនឹងផ្លូវដង្ហើម នោះគឺទាមទារឱ្យមានការពាក់ម៉ាស់ និងលាងដៃឱ្យបានញឹកញាប់ជាមួយសាប៊ូ ឬអាល់កុល ដើម្បីជួយការពារខ្លួនយើងកុំឱ្យឆ្លងជំងឺនេះពីអ្នកដទៃ ក្នុងរយៈដែលជំងឺនេះកំពុងមានការកើតឡើងច្រើន។
លោកវេជ្ជបណ្ឌិត ក៏បានឱ្យដឹងថា ជំងឺឆ្លងទាំងនេះ ភាគច្រើនកើតឡើងដោយមានការរួមផ្សំទៅនឹងការខ្វះនូវអនាម័យ ឆ្លងតាមរយៈទឹកភ្លៀង ដែលកត្តានេះទាមទារឱ្យបងប្អូនប្រជាពលរដ្ឋត្រូវមានអនាម័យក្នុងការរស់នៅប្រចាំថ្ងៃ។ ក្រៅពីនោះនៅរដូវវស្សានេះ យើងក៏ងាយប្រឈមនឹងកើតមានជំងឺផ្សេងៗជាច្រើនទៀត។ ដូច្នេះសូមឱ្យប្រជាពលរដ្ឋត្រូវទៅពិនិត្យសុខភាពឱ្យបានទៀងទាត់ និងចូលរួមទៅចាក់វ៉ាក់សាំងការពារនៅតាមមណ្ឌលសុខភាពឱ្យបានគ្រប់ៗគ្នា ដើម្បីការពារពីការចម្លងជំងឺផ្សេងៗ។
មន្ត្រីជំនាញខាងលើក៏បានបង្ហាញថា រដូវវស្សាក្នុងឆ្នាំ២០២៤នេះ ចំពោះជំងឺផ្តាស់សាយដែលអាចប៉ះពាល់ដល់ផ្លូវដង្ហើមដូចគ្នា ក៏មានវ៉ាក់សាំងសម្រាប់ការពារផងដែរ ដោយរាជរដ្ឋាភិបាលបានប្តូរដាក់វ៉ាក់សាំងកូវីដ ទៅជាវ៉ាក់សាំងផ្តាស់សាយវិញ និងបានកំណត់ឱ្យប្រជាពលរដ្ឋទូទៅចាក់មួយដងក្នុងមួយឆ្នាំដែលអាចទប់ស្កាត់លើមេរោគជាច្រើន ហើយក្នុងនោះមេរោគកូវីដ១៩ បច្ចុប្បន្នក៏នៅមានតិចតួចផងដែរ ដែលទាមទារឱ្យយើងគ្រប់គ្នាត្រូវបន្តការពារ និងមានអនាម័យ៕
អត្ថបទ៖ លោក ឡេង ពិសិដ្ឋ
កែសម្រួល៖ លោក អ៊ុន ណារាជ្យ
