វគ្គសិក្ខាសាលាស្តីពីអក្ខរកម្មឌីជីថលលើកទី២ ប្រចាំឆ្នាំ២០២៤ នៅខេត្តសៀមរាប ដែលរៀបចំដោយនាយកដ្ឋានអភិវឌ្ឍកម្មវិធីយុវជន នៃអគ្គនាយកដ្ឋានយុវជន នៃក្រសួងអប់រំ យុវជន និងកីឡា រួមកិច្ចសហការរៀបចំពីក្រុមហ៊ុន Smart Axiata (ស្មាតអាស្យាតា) ព្រមទាំងឧបត្ថម្ភគាំទ្រដោយមូលនិធិនៃការកសាងសមត្ថភាព និងការស្រាវជ្រាវ និងការអភិវឌ្ឍលើវិស័យ ទូរគមនាគមន៍ និងបច្ចេកទេសវិទ្យាគមនាគមន៍ និងព័ត៌មាន ដែលហៅកាត់ថា មូលនិធិ ស.អ. របស់ក្រសួង ប្រៃសណីយ៍ និងទូរគមនាគមន៍ និងគាំទ្របច្ចេកទេសពីក្រុមហ៊ុន TikTok និស្សិតស្ម័គ្រចិត្ត និងមានការចូលមកពីបណ្តាវិទ្យាល័យចំនួន១០នៅក្នុងខេត្តសៀមរាប ដែលសិស្សានុសិស្សចូលរួមដោយផ្ទាល់ចំនួន៣២៩នាក់ និងចូលរួមតាមរយៈវីដេអូហ្សូម(Zoom) នៅតាមវិទ្យាល័យដែលនៅឆ្ងាយៗដែលមានរយៈពេល៣ថ្ងៃគឺត្រូវបានបិទវគ្គបញ្ចប់សិក្ខាសាលា។
ក្នុងនាមជាអ្នកដឹកនាំរៀបចំសិក្ខាសាលា លោក ឡេង ភារុន ប្រធានការិយាល័យ នាយកដ្ឋានអភិវឌ្ឍយុវជននៃក្រសួងអប់រំយុវជន និងកីឡា បានមានប្រសាសន៍ថា ការបើកសិក្ខាសាលាស្តីពីអក្ខរកម្មឌីជីថល ត្រូវបានពង្រឹងគុណភាពជារៀងរាល់ឆ្នាំ និងផ្តល់ឱកាសឲ្យសិស្សនៅសាលាឆ្ងាយៗបានចូលរួមសិក្ខាសាលា តាមប្រព័ន្ធ Zoom ព្រមទាំងផ្តល់ឱកាសឲ្យសិស្សទាំងអស់ធ្វើការជាក្រុម ក្នុងការផលិតវីដេអូអប់រំខ្លីស្តីពីអក្ខរកម្មឌីជីថល ដើម្បីផ្សព្វផ្សាយ និងចូលរួមប្រកួតយកជ័យលាភីពីក្រុមហ៊ុនស្មាតផងដែរ។
លោកបានបន្តថាអក្ខរកម្មឌីជីថល គឺបានបើកទទួលការបណ្តុះបណ្តាលចាប់ផ្តើមតាំងពីឆ្នាំ២០១៩មកហើយគោលបំណងនៃកម្មវិធីនេះនឹងជួយយុវជនឱ្យយល់ដឹងពីរបៀបប្រើប្រាស់ប្រព័ន្ធឌីជីថលឱ្យមានប្រសិទ្ធិភាព និងការការពារនូវហានិភ័យដែលកើតពីការប្រើប្រាស់ប្រព័ន្ធអនឡាញ(Online) ស្វែងយល់ពីអ្វីដែលពលរដ្ឋឌីជីថល ប្រកបដោយការទទួលខុសត្រូវ និងចេះបង្កើតវីដេអូរអប់រំខ្លី សម្រាប់ចែករំលែកតាមប្រព័ន្ធអនឡាញ។ ក្រោយពីបានបញ្ចប់វគ្គសិក្ខាសាលានេះសិស្សានុសិស្សអាចមានសមត្ថភាពប្រើប្រាស់ប្រព័ន្ធអនឡាញ(Online) ប្រកបដោយប្រសិទ្ធភាព និងភាពជាពលរដ្ឋសាកលប្រកបដោយការទទួលខុសត្រូវ ជាពិសេសអាចអភិវឌ្ឍសមត្ថភាពចំណេះដឹងខ្លួនឯងជួយដល់ការសិក្សា និងការស្វែងយល់ពីហានិភ័យផ្សេងៗដែលអាចកើតឡើងពីការប្រើប្រាស់កម្មវិធីឌីជីថលទាំងនោះរួមទាំងការចេះការពារខ្លួនឱ្យចៀសផុតពីការឆបោក ការបៀតបៀនកេរ្តិ៍ខ្មាស និងការគំរាមកំហែងពីប្រព័ន្ធអនឡាញ ជាដើម។
ក្នុងឱកាសនោះដែរ ឯកឧត្តម វង ភិរុណ អនុរដ្ឋលេខាធិការក្រសួងអប់រំយុវជន និងកីឡា បានមានប្រសាសន៍ថាបច្ចុប្បន្ននេះវិទ្យាសាស្ត្រកាន់តែរីកចម្រើនយ៉ាងឆាប់រហ័សជាពិសេសប្រព័ន្ធបច្ចេកវិទ្យាឌីជីថល ហើយយុវជនជាអ្នកត្រូវយល់ដឹង និងត្រូវចេះប្រើប្រាស់វាប្រកបដោយសុវត្ថិភាព និងការទទួលខុសត្រូវ។
ឯកឧត្តមបន្តថាសិក្ខាសាលានេះ ពិតជាមានសារៈសំខាន់ និងសាកសមបំផុត ទាំងពេលវេលា និងតម្រូវការក្នុងការជួយអភិវឌ្ឍសមត្ថភាពឌីជីថល ដល់ក្មួយៗសិស្សានុសិស្សដើម្បីរួមចំណែកគាំទ្រគោលនយោបាយរដ្ឋាភិបាលឌីជីថលកម្ពុជាឆ្នាំ២០២២-២០៣៥ ។
វគ្គសិក្ខាសាលាស្តីពីអក្ខរកម្មឌីជីថលលើកទី២ ប្រចាំឆ្នាំ២០២៤ នៅខេត្តសៀមរាប បានបិទវគ្គកាលពីថ្ងៃទី០៤ ខែសីហាឆ្នាំ ២០២៤ នៅវិទ្យាល័យអង្គរ តាមរយៈសិក្ខាសាលារយៈពេល៣ថ្ងៃនេះ ក្មួយៗពិតជាបានទទួលនូវចំណេះដឹងឌីជីថលជា ច្រើនដូចជា៖ការបង្កើតគណនី និងការប្រើប្រាស់ កម្មវិធី Google, Canva, Telegram ,and TikTok. និងវិធីសាស្ត្រក្នុងការដាក់លេខសម្ងាត់រឹងមាំ-ស្វែងយល់និងការពារខ្លួនពីការឆបាកតាមប្រព័ន្ធអនឡាញ-ស្វែងយល់ពីព័ត៌មានឯកជនភាពលើប្រព័ន្ធអនឡាញ-ស្វែងរកព័ត៌មាន និងការស្រាវជ្រាវឯកសារវាយតម្លៃព័ត៌មានរលើប្រព័ន្ធអ៊ីនធឺណិត ប្រកបដោយការទទួលខុសត្រូវ និងទទួលបានបច្ចេកទេសថតរូប និងធ្វើវីដេអូខ្លីទាក់ទងនឹងការអប់រំផងដែរ ៕
អត្ថបទ និងរូបភាព លោក ទ្រា ពន្លឺ
កែសម្រួល ៖ ហាំ ម៉េងហួត
