នៅសណ្ឋាគារបុរីអង្គរខេត្តសៀមរាប នារសៀលថ្ងៃទី០៧ ខែសីហា ឆ្នាំ២០២៤ អង្គភាពស៊ីម៉ាក់ និងទីភ្នាក់ងារសហប្រតិបត្តិការអន្តរជាតិជប៉ុន ប្រចាំកម្ពុជា បានបើកវគ្គហ្វឹកហ្វឺនស្តីពីការប្រើប្រាស់គ្រឿងចក្រវាយកម្ទេចមីនក្នុងកិច្ចប្រតិបត្តិការបោសសម្អាតមីនមនុស្សធម៌ដល់អង្គភាពផ្តល់សេវាកម្មរដ្ឋក្នុងគ្រាអាសន្នសម្រាប់ប្រទេសអ៊ុយក្រែន (SESU) ដែលគាំទ្រដោយរដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA) ហើយអង្គភាពស៊ីម៉ាក់នឹងផ្ដល់ការហ្វឹកហ្វឺនមូលដ្ឋានគ្រឹះនៃការប្រើប្រាស់គ្រឿងចក្រវាយកម្ទេចមីនក្នុងកិច្ចប្រតិបត្តិការបោសសម្អាតមីនមនុស្សធម៌ជូនដល់មន្រ្តីជំនាញអ៊ុយក្រែនចំនួន១៤រូប។ វគ្គបណ្តុះបណ្តាលនេះ មានគោលបំណង ក្នុងការកសាងសមត្ថភាពជំនាញលេីការប្រេីប្រាស់គ្រឿងចក្រកម្ទេចមីន ដេីម្បីបង្កេីនសុវត្ថិភាព ប្រសិទ្ធភាព និងប្រសិទ្ធផលក្នុងការរំដោះផ្ទៃដីដែលទទួលរងការគំរាមកំហែងដោយសារគ្រាប់មីននិងសំណល់យុទ្ធភណ្ឌសង្គ្រាម។
លោក សានុអិ កាហ្ស៊ូម៉ាសា (Sanui Kazumasa) ប្រធានទីភ្នាក់ងារសហប្រតិបត្តិការអន្តរជាតិជប៉ុន ប្រចាំកម្ពុជាបានមានប្រសាសន៍ថា រយៈពេល២ឆ្នាំកន្លងមកនេះ JICA បានរៀបចំកម្មវិធីសម្រាប់កម្រិតថ្នាក់ដឹកនាំនៅក្នុងប្រទេសកម្ពុជា និងក្នុងប្រទេសជប៉ុន និងសម្រាប់កម្រិតបច្ចេកទេសមួយផ្សេងទៀតនៅក្នុងប្រទេសប៉ូឡូញកាលពីឆ្នាំមុន។ លោកថា JICA រីករាយដែលមានមន្រ្តីជំនាញបោសសម្អាតមីនប្រទេសអ៊ុយក្រែន មកពីអង្គភាពផ្តល់សេវាកម្មរដ្ឋក្នុងគ្រាអាសន្នសម្រាប់ប្រទេសអ៊ុយក្រែន មកទទួលការហាត់ហ្វឹកហ្វឺនដោយផ្ទាល់ ស្តីពីប្រតិបត្តិការគ្រឿងចក្រវាយកម្ទេចមីន ទាំងទ្រឹស្តី និងការអនុវត្តដោយផ្ទាល់នៅចម្ការមីន។
ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃមជ្ឈមណ្ឌល សកម្មភាពកម្ចាត់មីនកម្ពុជា (CMAC) មានប្រសាសន៍ថា អង្គភាពស៊ីម៉ាក់បានទទួលការគាំទ្រនិងការអនុញ្ញាតពីសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការសហការជាមួយរដ្ឋាភិបាលជប៉ុនលេីការហ្វឹកហ្វឺនជំនាញបោសសម្អាតមីនមនុស្សធម៌ជូនអ្នកជំនាញអ៊ុយក្រែន ប្រយោជន៍ដើម្បីផ្តល់សុវត្ថិភាពជូនប្រជាជនដែលទទួលរងការគំរាមកំហែងដោយសារគ្រាប់មីននិងសំណល់យុទ្ធភណ្ឌសង្គ្រាមនៅប្រទេសអ៊ុយក្រែន។
ឯកឧត្ដម ក៏បានរំលឹកពីប្រវត្តិសង្រ្គាមនៅកម្ពុជា និងបុព្វហេតុដែលបង្កឱ្យមានបញ្ហាគ្រាប់មីន និងសំណល់យុទ្ធភ័ណ្ឌសង្រ្គាមដែលកើតឡើងនៅកម្ពុជា រួមមាន ការទម្លាក់គ្រាប់បែកចំនួន ៤.០៣ លានតោន គ្រាប់បែកចង្កោមចំនួន២៨លានតោន គ្រាប់បែកគីមីចំនួន២០០ទីតាំង គ្រាប់មីនប្រឆាំងមនុស្ស និងគ្រាប់មីនប្រឆាំងរថក្រោះរួមជាមួយយុទ្ធភ័ណ្ឌមិនទាន់ផ្ទុះគ្រប់ប្រភេទនៅរាយប៉ាយប្រមាណ ៤ ទៅ ៦លានតោន។
គួររម្លឹកថា ប្រមុខរាជរដ្ឋាភិបាល កម្ពុជា សហប្រតិបត្តិការជាមួយរដ្ឋាភិបាលជប៉ុន បានផ្ដល់ការគាំទ្រដល់មជ្ឈមណ្ឌលសកម្មភាពកម្ចាត់មីនកម្ពុជា ក្នុងការរៀបចំវគ្គហ្វឹកហ្វឺនសកម្មភាពកម្ចាត់មីនមនុស្សធម៌ ជូនដល់មន្រ្តីជំនាញបោសសម្អាតមីន មកពីបណ្តាប្រទេសមួយចំនួនដូចជាកូឡំប៊ី អង់កូឡា នេប៉ាល់ អ៊ីរ៉ាក់ ឡាវ ភូមា និងប្រទេសក្នុងតំបន់អាហ្វ្រិកមួយចំនួនផងដែរ។ ដោយឡែកប្រទេសអ៊ុយក្រែន ហ្វឹកហ្វឺនបានចំនួន០២លើករួចមកហើយ នៅកំឡុង ខែមករា ឆ្នាំ២០២៣ នៅប្រទេសកម្ពុជា និងលើកទី២ ក្រោមកិច្ចសហប្រតិបត្តិការជាមួយមូលនិធិសាមគ្គីភាពប៉ូឡូញ នៅកំឡុងខែកក្កដា ឆ្នាំ២០២៣ នៅប្រទេសប៉ូឡូញ ដោយទទួលបានលទ្ធផលផ្លែផ្កាគួរជាទីមោទនៈ៕
អត្ថបទ និងរូបភាព៖ សហការី
កែសម្រួល៖ លោក យូ វង្ស
