ថ្លែងក្នុងកម្មវិធីសន្ទនាមតិរបស់វិទ្យុ និងទូរទស្សន៍ជាតិខេត្តសៀមរាប នៅថ្ងៃទី០៨ ខែសីហា ឆ្នាំ២០២៤នេះ លោក ថាច់ លីខាន់ ប្រធានគ្រប់គ្រងអង្គការ RACHA ប្រចាំខេត្តសៀមរាប បានបង្ហាញថា បច្ចុប្បន្នគណៈកម្មាធិការផែនការសកម្មភាពរួមស្តីពីគណនេយ្យភាពសង្គម កំពុងក្លាយជាយន្តការមួយដ៏សំខាន់ ក្នុងការជួយធានា ជំរុញ គាំទ្រ និងអនុវត្តផែនការសកម្មភាពរួមស្តីពីគណនេយ្យភាពសង្គមនៅកម្រិតមូលដ្ឋានទទួលបានប្រសិទ្ធិភាពខ្ពស់ ជាពិសេសការកែលម្អការផ្ដល់សេវាសាធារណៈនៅមូលដ្ឋានកាន់តែមានភាពល្អប្រសើរ។
លោក ថាច់ លីខាន់ បានបង្ហាញទៀតថា យោងតាមសេចក្តីណែនាំរបស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ បានជំរុញឱ្យគណៈកម្មាធិការផែនការសកម្មភាពរួមស្តីពីគណនេយ្យភាពសង្គម ត្រូវមានការប្រជុំជាប្រចាំខែ ប៉ុន្តែសម្រាប់គម្រោងនៃការច្នៃប្រឌិតថ្មីសម្រាប់គណនេយ្យភាពសង្គមនៅកម្ពុជា គឺមានការកែប្រែដោយប្តូរមកគាំទ្រកិច្ចប្រជុំនេះ ប្រចាំត្រីមាសវិញម្ដង។ ជាងនេះទៅទៀតគណៈកម្មាធិការត្រូវមានកាតព្វកិច្ចរៀបចំផែនការលម្អិត រៀបចំការអនុវត្តផែនការសកម្មភាពរួមស្តីពីគណនេយ្យភាពសង្គម និងតាមដាន និងផ្សព្វផ្សាយពីលទ្ធផលនៃការអនុវត្ត ផែនការសកម្មភាពរួមស្តីពីគណនេយ្យភាពសង្គម។
លោកបន្តថា សម្រាប់សមាសភាពគណៈកម្មាធិការផែនការសកម្មភាពរួមស្តីពីការងារគណនេយ្យភាពសង្គម មានសមាជិកសរុបចន្លោះពី១៨ ទៅ ៣២នាក់ ក្នុងនោះមានដូចជា រដ្ឋបាលសង្កាត់ ប្រធាន ឬអនុប្រធានមណ្ឌលសុខភាព នាយក ឬនាយិកាសាលាបឋមសិក្សាម្នាក់ក្នុង១សាលា អ្នកសម្របសម្រួលគណនេយ្យភាពសហគមន៍៤នាក់ ក្នុង១សង្កាត់ តំណាងប្រជាពលរដ្ឋម្នាក់ក្នុង១ភូមិ៕
អត្ថបទ៖ ភី រចនា, ឡេង ពិសិដ្ឋ
កែសម្រួល៖ លោក អ៊ុន ណារាជ្យ
