ការដេញថ្លៃគម្រោងជួសជុលផ្លូវដីសក្រាលក្រួសក្រហមចំនួន៦ខ្សែ និងគម្រោងសាងសង់ផ្លូវបេតុងអាមេ១ខ្សែ ក្នុងឃុំស្ពានត្នោត ឃុំល្វែងឫស្សី និងឃុំគោកធ្លកក្រោម ស្រុកជីក្រែង ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី០៩ ខែសីហា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ង៉ោ ពង្សទិត្យសុវណ្ណៈ ប្រធានគណៈកម្មការលទ្ធកម្មឃុំស្ពានត្នោត ស្រុកជីក្រែង បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំស្ពានត្នោត បានដាក់ដេញថ្លៃគម្រោងជួសជុលផ្លូវដីសក្រាលក្រួសក្រហម៣ខ្សែ ប្រវែង៥៧០ម៉ែត្រ ទទឹង៥ម៉ែត្រ កម្រាស់ក្រួស០.១៥ម៉ែត្រ ជើងទេស្មាផ្លូវ០.១៥ម៉ែត្រ សាងសង់លូមូលកាត់ផ្លូវមុខកាត់០.៨ម៉ែត្រ ប្រវែង៦ម៉ែត្រចំនួន៧កន្លែង និងលូការពារផ្លូវ៤កង់ ជាមួយនឹងស្លាកសញ្ញាគម្រោងចំនួន១ ស្ថិតក្នុងតម្លៃប៉ាន់ស្មាន ១០៧.៣២៦.៧៣៧រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន ហ៊ួរ ឆូយ ក្នុងតម្លៃ ១០៦.០០០.០០០រៀល។
ដោយឡែក បើតាមលោក យ៉ុន ប្រុស ប្រធានគណៈកម្មការលទ្ធកម្មឃុំល្វែងឫស្សី បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំល្វែងឫស្សី បានដាក់ដេញថ្លៃគម្រោងជួសជុលផ្លូវដីសក្រាលក្រួសក្រហមចំនួន ៣ខ្សែប្រវែង៦៥០ម៉ែត្រ ទទឹង៥ម៉ែត្រ កម្រាស់ក្រួស០.១៥ម៉ែត្រ ជើងទេស្មាផ្លូវ០.១៥ម៉ែត្រ សាងសង់លូមូលកាត់ផ្លូវមុខកាត់ ០.៨ម៉ែត្រ ប្រវែង៧ម៉ែត្រ ចំនួន៨កន្លែង និងលូការពារផ្លូវចំនួន៤កង់ រួមនឹងស្លាកសញ្ញាគម្រោងចំនួន១ ស្ថិតក្នុងតម្លៃប៉ាន់ស្មាន ១១៥.៦៨០.១៧០រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន ញ៉ូវ ចន្ទី ក្នុងតម្លៃ ១១១.០៦០.០០០រៀល។
បើតាមប្រធានគណៈកម្មការលទ្ធកម្មឃុំគោកធ្លកក្រោម លោក ជៀប សាន បានឱ្យដឹងថា ចំពោះគម្រោងមូលនិធិឃុំឆ្នាំ២០២៤ ឃុំគោកធ្លកក្រោម បានដាក់ដេញថ្លៃគម្រោងសាងសង់ផ្លូវបេតុងអាមេចំនួន១ខ្សែ ប្រវែង១៥៨ម៉ែត្រ ទទឹង៥ម៉ែត្រ កម្រាស់បេតុង០.២ម៉ែត្រ ដាក់លូការពារផ្លូវមុខកាត់០.៨ម៉ែត្រចំនួន៤កង់ និងស្លាកសញ្ញាគម្រោងចំនួន១ ស្ថិតក្នុងតម្លៃប៉ាន់ស្មាន ១៣៣.៥៨៥.៧៥៩ រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន ហ៊ួរ ឆូយ ក្នុងតម្លៃ ១៣១.០០០.០០០រៀល។
ជាមួយនឹងការទទួលបានសិទ្ធិនៃការសាងសង់នេះ តំណាងក្រុមហ៊ុនម៉ៅការទាំងបី បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
