នៅថ្ងៃទី១០ ខែសីហា ឆ្នាំ២០២៤ ឯកឧត្តម ហេង ធូ តំណាង ឯកឧត្តម សែម សុវណ្ណនី អនុប្រធានក្រុមការងារចុះមូលដ្ឋានខេត្តសៀមរាប និងជាប្រធានក្រុមការងារចុះមូលដ្ឋានស្រុកបន្ទាយស្រី បានចុះជួបសួរសុខទុក្ខប្រជាពលរដ្ឋ នៅក្នុងឃុំរំចេក និងឧបត្ថមថវិកាដល់គ្រួសារមានជីភាពខ្វះខាតចំនួន៤គ្រួសារ ក្នុងនោះ ឧបត្ថម្ភថវិកាសម្រាប់សាងសង់ និងជួសជុលផ្ទះចំនួន៣គ្រួសារ។
ក្នុងឱកាសសំណេះសំណាលនោះ ឯកឧត្តម ហេង ធូ បានលើកទឹកចិត្តដល់ក្រុមគ្រួសារ មានភាពខ្វះខាតទាំង៤គ្រួសារ ជាពិសេសលោកតា លោកយាយ ដែលមានវ័យចាស់ជរា សូមខិតខំលើកលើកម្ពស់ជីវភាពតាមរយៈគោលនយោបាយ កាត់បន្ថយភាពក្រីក្រ ដែលរាជរដ្ឋាភិបាលបានដាក់ចេញ ដែលមានអាជ្ញាធរចាប់ពីថ្នាក់ស្រុក រហូតដល់ថ្នាក់ភូមិ ជាអាណាព្យាបាលរបស់ប្រជាពលរដ្ឋនៅមូលដ្ឋាន។ ក្នុងនោះ ក្រុមការងារចុះមូលដ្ឋាន តែងតែចូលរួមជួយឧបត្ថម្ភ កាត់បន្ថយការខ្វះខាតរបស់បងប្អូន ក្នុងគោលដៅលើកកម្ពស់ជីវភាពឲ្យកាន់តែល្អប្រសើរ កាត់បន្ថយការចំណាកស្រុក ស្របតាមបទបញ្ជា សេចក្ដីណែនាំ កម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ ក្នុងការកំណែទម្រង់នានា ពិសេសលើកកម្ពស់ការផ្តល់សេវាសាធារណៈ និងការអភិវឌ្ឍមូលដ្ឋាន ដែលជាការឆ្លើយតបទៅនឹងសេចក្តីត្រូវការរបស់ប្រជាពលរដ្ឋប្រកបដោយគុណភាព ប្រសិទ្ធភាព តម្លាភាព គណនេយ្យភាព និងសមធម៌ក្នុងសង្គម។
ព័ត៌មានជាតិ ថ្មីៗ
គួរជម្រាបថា សម្រាប់គ្រួសារទី១ លោក នៀម អាន ទទួលបានថវិកាទាំងស្រុងលើការចំណាយសាងសង់លំនៅឋានថ្មី ព្រមទាំងថវិកាមួយចំនួនទៀត សម្រាប់សម្រួលដល់ការសិក្សារបស់កូននៅថ្នាក់មធ្យមការសិក្សា។ ចំណែកគ្រួសារទី២ លោកស្រី យ៉ាវ សាវឿន និងស្វាមី រស់នៅក្នុងផ្ទះតូចបាំងជញ្ជាំង និងប្រក់ស្លឹកត្នោត បានទទួលថវិកា សម្រាប់ជួសជុលផ្ទះ និងទិញស្បៀងអាហារប្រចាំថ្ងៃ។ និងទី៣ លោក ហ៊ុយ កឺម មានពិការភាព ឯកឧត្តម ហេង ធូ បានឧបត្ថម្ភថវិកាមួយចំនួន និងចាត់តាំងក្រុមការងារ សិក្សាលើការចំណាយការសាងសង់ផ្ទះជូនគាត់ផងដែរ។ ដោយឡែក គ្រួសារទី៤ លោកតាយ៉ាវ យឿម និងលោកយាយ ដែលមានវ័យចាស់ជរា ឯកឧត្តម និងក្រុមការងារបានចុះជួបសួរសុខទុក្ខ និងជួយជាថវិកាសម្រួលដល់ការទិញថ្នាំសង្កូវ និងស្បៀងអាហារ។
អត្ថបទ និងរូបភាព៖ លោក ស៊ុំ គីន និងហេង វន្នី
