ការដេញថ្លៃគម្រោងសាងសង់ និងជួសជុលផ្លូវ ៣ខ្សែ ក្នុងឃុំស្វាយលើ និងឃុំខ្នងភ្នំ ស្រុកស្វាយលើ ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី០៨ ខែសីហា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ខន ឃាន់ ប្រធានគណៈកម្មការលទ្ធកម្មឃុំស្វាយលើ ស្រុកស្វាយលើ បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំស្វាយលើ បានដាក់ដេញថ្លៃគម្រោងជួសជុលផ្លូវដីក្រាលក្រួសក្រហមចំនួន២ខ្សែ ស្ថិតក្នុងភូមិរំចេក និងអូមានជ័យ ប្រវែង១.១២០ម៉ែត្រ ទទឹង៥ម៉ែត្រ ក្រាលក្រួសក្រហមកម្រាស់0.១៥ម៉ែត្រ និងសាងសង់លូមូល២កន្លែង និងដាក់ស្លាកសញ្ញាគម្រោងចំនួន៣ ក្នុងតម្លៃប៉ាន់ស្មាន ១០៨.៤២១.០៩៨រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន AMRL ក្នុងតម្លៃ ១០៦.៦០០.០០០រៀល។
ដោយឡែកលោក ឈឿម តាំ ប្រធានគណៈកម្មការលទ្ធកម្មឃុំខ្នងភ្នំ ស្រុកស្វាយលើ ក៏បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំខ្នងភ្នំ បានដាក់ដេញថ្លៃគម្រោងសាងសង់ផ្លូវបេតុងអាមេ ស្ថិតក្នុងភូមិអន្លង់ធំ ប្រវែង១៨៥ម៉ែត្រ ទទឹង៤ម៉ែត្រ កម្រាស់០.១៥ម៉ែត្រ ប្រើប្រាស់ដែកកងទំហំ៨មីលីម៉ែត្រ ចងគម្លាតដែក០.២ម៉ែត្រ និងដាក់ស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ១០៥.៦៨២.០៨៣រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន អុឹង លីសួរ ក្នុងតម្លៃ ១០៤.៨០០.០០០រៀល។
ជាមួយនឹងការទទួលបានសិទ្ធិនៃការសាងសង់នេះ តំណាងក្រុមហ៊ុនម៉ៅការទាំងពីរ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និង រូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
