ប្រៃសណីយ៍កម្ពុជា ក្រោមការគាំទ្រពីក្រសួងប្រៃសណីយ៍ និងទូរគមនាគមន៍ បានទទួលធ្វើជាម្ចាស់ផ្ទះរៀបចំកិច្ចប្រជុំធុរកិច្ចប្រៃសណីយ៍អាស៊ានលើកទី៣០ និងអាស៊ានបូកបី ដែលកិច្ចប្រជុំនេះមានរយៈពេល២ថ្ងៃ ចាប់ពីថ្ងៃទី៨-៩ ខែសីហា ឆ្នាំ២០២៤ ដោយកិច្ចប្រជុំផ្តោតទៅលើកិច្ចសហប្រតិបត្តិការរវាងប្រតិបត្តិករប្រៃសណីយ៍ក្នុងតំបន់អាស៊ាន និងការពង្រីកកិច្ចសហប្រតិបត្តិការជាមួយប្រតិបត្តិករប្រៃសណីយ៍នៃបណ្តាប្រទេសផ្សេងទៀត ដូចជា អូស្ត្រាលី ឥណ្ឌា ជប៉ុនជាដើម។
លោក ង៉ូវ សេងកាក់ អភិបាលរងខេត្តសៀមរាប បានបង្ហាញថា សេវាប្រៃសណីយ៍ បានដើរតួនាទីយ៉ាងសំខាន់ក្នុងការតភ្ជាប់ពីមនុស្សទៅសហគមន៍ ជាមួយនឹងបណ្តាញអាជីវកម្មផ្សេងៗ ស្របពេលដែលពិភពលោកនាពេលបច្ចុប្បន្នបានផ្លាស់ប្ដូរយ៉ាងឆាប់រហ័សនូវប្រព័ន្ធបច្ចេកវិទ្យា ហើយសារៈសំខាន់នៃសេវាប្រៃសណីយ៍ ត្រូវតែជាសេវាដែលមានប្រសិទ្ធភាពគួរឱ្យទុកចិត្ត និងប្រកបដោយភាពច្នៃប្រឌិតដែលមិនអាចពិពណ៌នាបាន។ លោកសង្ឃឹមថា ការសហប្រតិបត្តិការរវាងប្រតិបត្តិករប្រៃសណីយ៍ក្នុងតំបន់អាស៊ាន នឹងធ្វើឱ្យវិស័យប្រៃសណីយ៍កាន់តែមានភាពរីកចម្រើនជាបន្តបន្ទាប់ ក្នុងនោះដែរប្រតិបត្តិករនៅតែបន្តរក្សាសម្ព័ន្ធភាពប្រកបដោយប្រសិទ្ធភាព និងតម្លាភាព។
ឯកឧត្តម ម៉ម អំណត់ រដ្ឋលេខាធិការក្រសួងប្រៃសណីយ៍ និងទូរគមនាគមន៍ មានប្រសាសន៍ថា កិច្ចប្រជុំនាពេលនេះមិនត្រឹមតែរំលឹកពីប្រវត្តិប្រៃសណីយ៍អាស៊ានប៉ុណ្ណោះទេ ប៉ុន្តែផ្តោតទៅលើមិត្តភាព និងកិច្ចសហប្រតិបត្តិការដ៏រឹងមាំក្នុងការរួបរួមគ្នាជាអង្គភាពប្រៃសណីយ៍ថ្នាក់តំបន់។ កិច្ចប្រជុំនេះដែរ ក៏ជាវេទិកាចែករំលែកនូវបទពិសោធ ការអនុវត្តល្អៗ ដើម្បីពង្រឹង និងពង្រីកនូវវឌ្ឍនភាព និងបណ្តាញទំនាក់ទំនងធុរកិច្ចប្រៃសណីយ៍ និងក៏ជាឱកាសក្នុងការពង្រឹងកិច្ចសហប្រតិបត្តិការ ក៏ដូចជាលើកឡើងនូវប្រធានបទពិភាក្សាមួយចំនួនដែលមានសារៈសំខាន់ក្នុងការធ្វើឱ្យប្រសើរឡើងនូវសេវាប្រៃសណីយ៍។ ហើយជាច្រើនឆ្នាំមកនេះ ប្រៃសណីយ៍កម្ពុជា បានឆ្លងកាត់ការផ្លាស់ប្ដូរដ៏គួរឱ្យកត់សម្គាល់ តាមរយៈការប្តេជ្ញាចិត្តក្នុងការធ្វើទំនើបកម្ម និងនវានុវត្តន៍ ដោយយើងបានវិនិយោគលើបច្ចេកវិទ្យា ពង្រឹងគុណភាពសេវាកម្ម បង្កើតបន្ថែមនូវផលិតផលប្រៃសណីយ៍ និងបង្កើនការចែកចាយទៅដល់ជនបទ។
ឯកឧត្តមក៏បានបញ្ជាក់ថា កិច្ចខិតខំប្រឹងប្រែងទាំងអស់នេះ ស្របទៅនឹងគោលនយោបាយអភិវឌ្ឍប្រៃសណីយ៍ឆ្នាំ២០២២-២០៣០ ដែលផ្តោតសំខាន់ទៅលើគោលដៅសំខាន់ៗចំនួន៤ រួមមានទី១.ពង្រឹងក្របខណ្ឌគតិយុត្តពាក់ព័ន្ធនឹងការគ្រប់គ្រង និងការអភិវឌ្ឍន៍វិស័យប្រៃសណីយ៍។ ទី២.អភិវឌ្ឍហេដ្ឋារចនាសម្ព័ន្ធ និងពង្រីកបណ្តាញប្រៃសណីយ៍ជាតិដោយជំរុញការប្រើប្រាស់បច្ចេកវិទ្យាឌីជីថល។ ទី៣.សម្របសម្រួលវិស័យឯកជនឱ្យមានការចូលរួមក្នុងធុរកិច្ចប្រៃសណីយ៍ និងទី៤.ពង្រឹងតួនាទីប្រៃសណីយ៍កម្ពុជា ដោយធ្វើពិពិធកម្ម និងនវានុវត្តន៍ផលិតផល និងសេវាកម្មប្រៃសណីយ៍ ដោយប្រើប្រាស់នូវបច្ចេកវិទ្យាឌីជីថល និងជំរុញការពង្រីកយ៉ាងទូលំទូលាយលើសេវាប្រៃសណីយ៍សកលទៅដល់ប្រជាពលរដ្ឋប្រកបដោយគុណភាព និងតម្លៃសមរម្យ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
