គណៈកម្មការលទ្ធកម្មឃុំកន្ទួត ស្រុកស្វាយលើ ខេត្តសៀមរាប នៅថ្ងៃទី០៨ ខែសីហា ឆ្នាំ២០២៤ បានប្រកាសបញ្ចប់ការដេញថ្លៃដោយជោគជ័យសម្រាប់គម្រោងជួសជុលផ្លូវដី ២ខ្សែ ស្ថិតក្នុងភូមិរុងរឿង និងភូមិអភិវឌ្ឍន៍ នៃឃុំកន្ទួត ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ឈង់ ឈា ប្រធានគណៈកម្មការលទ្ធកម្មឃុំកន្ទួត ស្រុកស្វាយលើ បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំកន្ទួត បានដាក់ដេញថ្លៃគម្រោងជួសជុលផ្លូវដីក្រាលក្រួសក្រហម២ខ្សែ ប្រវែង៥០០ម៉ែត្រ ទទឹង៥ម៉ែត្រ និងសាងសង់លូ៥កន្លែង និងស្លាកសញ្ញាគម្រោងចំនួន២ ក្នុងតម្លៃប៉ាន់ស្មាន ១២៧.០១០.៨២៥រៀល ដោយមានក្រុមហ៊ុនចំនួន៥ បានដាក់សំណើ។ ជាលទ្ធផលបានទៅលើក្រុមហ៊ុន ពៅ រ៉ាឌី ក្នុងតម្លៃ ៥៣.៧០០.០០០រៀល។
ជាមួយនឹងការទទួលបានសិទ្ធិនៃការសាងសង់នេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវទាន់ពេលវេលា ស្របទៅតាមគំនូរប្លង់បច្ចេកទេស និងបទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
