នៅថ្ងៃទី៦ ខែសីហា ឆ្នាំ២០២៤ ឯកឧត្តម ឈាន លាង រដ្ឋលេខាធិការក្រសួងព័ត៌មាននៃព្រះរាជាណាចក្រកម្ពុជា លោក ង៉ូវ សេងកាក់ អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលខេត្តសៀមរាប និង ឯកឧត្តម XIA YUNHAI អគ្គនាយករង នៃអគ្គនាយកដ្ឋានផ្សព្វផ្សាយអន្តរជាតិ នៃការិយាល័យព័ត៌មានក្រុមប្រឹក្សាកិច្ចការដ្ឋចិន បានសម្ពោធច្រករបៀងវប្បធម៌ នៅអាកាសយានដ្ឋានអន្តរជាតិសៀមរាបអង្គរ ក្នុងគោលបំណងពង្រីកការផ្លាស់ប្តូរវប្បធម៌រវាងប្រទេសកម្ពុជា និងចិន និងបង្ខិតគោលដៅទេសចរណ៍កម្សាន្តរវាងខេត្តយូណាន និងខេត្តសៀមរាប។
ច្រករបៀងវប្បធម៌ កម្ពុជា-ចិន គឺជាសកម្មភាពស្របទៅនឹងការដាក់ចេញ “ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤”។ ច្រករបៀងវប្បធម៌នេះ មានដាក់តាំងរូបថតដ៏ស្រស់ស្អាត និងគួរឱ្យចាប់អារម្មណ៍ជាច្រើន ដោយផ្តោតលើប្រធានបទសំខាន់ចំនួន ៣ គឺ “ប៉ាក់” “ចម្លាក់” និង “ពណ៌ចម្រុះ” ដែលសុទ្ធសឹងជាបេតិកភណ្ឌវប្បធម៌ អរូបីរបស់ ប្រទេសកម្ពុជា និងខេត្តយូណាន ប្រទេសចិន។ ក្រៅពីការតាំងរូបថតដ៏ប្រណីតនេះ ក្នុងឱកាសនោះ ក៏មានការសម្ដែងសិល្បៈរួមគ្នា រវាងប្រទេសទាំងពីរ ដែលបានទាញចំណាប់អារម្មណ៍របស់អ្នកដំណើរជាច្រើន មើលការសម្ដែងនេះ អំឡុងពេលកំពុងរង់ចាំឡើងយន្តហោះ។
គួររំលឹកថា ការរីកចម្រើនជាបន្តបន្ទាប់ នៃទំនាក់ទំនង និងកិច្ចសហប្រតិបត្តិការកម្ពុជា-ចិន បានផ្តល់ប្រយោជន៍ដល់ប្រជាជន និងប្រទេសទាំងពីរ និងបានឯកភាពគ្នាអនុវត្តន៍ឱ្យកាន់តែមានប្រសិទ្ធភាពនូវកុងសង់ស៊ីស រវាងថ្នាក់ដឹកនាំកំពូលរបស់ប្រទេសទាំងពីរ សម្តេចតេជោ ហ៊ុន សែន និងឯកឧត្តម ប្រធានាធិបតី ស៊ី ជីនពីង កាលពីខែកុម្ភៈ ឆ្នាំ២០២៣ ក្នុងនោះរួមមាន (១) ការដាក់ចេញនូវ «កិច្ចសហប្រតិបត្តិការត្បូងពេជ្រ» (២) ការបង្កើត «ច្រករបៀងអភិវឌ្ឍន៍ឧស្សាហកម្ម» និង «ច្រករបៀងមច្ឆានិងអង្ករ»។ ដោយឡែក ក្នុងឱកាសទស្សនកិច្ចរបស់សម្តេចធិបតី ទៅកាន់ប្រទេសចិនចំនួន ០២លើក កន្លងមក ភាគីទាំងពីរ ក៏បានឯកភាពគ្នាផ្តួចផ្តើមនូវសកម្មភាពជាក់ស្តែងនានា ដើម្បីប្រារព្ធ «ឆ្នាំនៃការផ្លាស់ប្តូរប្រជាជន និងប្រជាជន» នៅឆ្នាំ២០២៤ សំដៅជំរុញកំណើនទេសចរចិន មកទស្សនាកម្ពុជាឱ្យកាន់តែច្រើនថែមទៀត៕
អត្ថបទ និងរូបភាព៖ លោក ឃុត សៅ
កែសម្រួល៖ លោក សេង ផល្លី
