នៅថ្ងៃទី០៧ ខែសីហា ឆ្នាំ២០២៤នេះ សភាពាណិជ្ជកម្មកម្ពុជា និងសភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ ដោយមានការគាំទ្រពីសហគ្រិនខ្មែរ បានរៀបចំសិក្ខាសាលាចែករំលែកដើម្បីអាជីវកម្មរីកចម្រើន ក្រោមប្រធានបទ “អាទិភាពក្នុងការវិនិយោគក្នុងខេត្តសៀមរាប” ជូនដល់សមាជិកសមាជិកាសភាពាណិជ្ជកម្មខេត្ត ម្ចាស់ក្រុមហ៊ុន ម្ចាស់សហគ្រាស ម្ចាស់អាជីវកម្ម ពាណិជ្ជករ និងអាជីវករក្នុងខេត្តសៀមរាប ដោយមានការចូលរួមជាវាគ្មិនពី ឯកឧត្តមបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា និង ឧកញ៉ាបណ្ឌិត ហ៊ុយ ភៀវ ប្រធានសភាពាណិជ្ជកម្មខេត្តសៀមរាប-ឧត្តរមានជ័យ នៅសណ្ឋាគារអង្គរសេនជូរី ក្រុងសៀមរាប។
ឧកញ៉ាបណ្ឌិត ហ៊ុយ ភៀវ មានប្រសាសន៍ថា ការរៀបចំសិក្ខាសាលានេះឡើង ក្នុងគោលបំណងដើម្បីធ្វើការចែករំលែក និងផ្លាស់ប្ដូរបទពិសោធល្អពីគ្នាទៅវិញទៅមក ដើម្បីទទួលបានគំនិតថ្មីៗយកទៅអភិវឌ្ឍន៍អាជីវកម្មរបស់ខ្លួន។ បញ្ហាកូវីដ១៩ និងសង្គ្រាមនៅអ៊ុយក្រែន បានជះឥទ្ធិពលជាខ្លាំងទាំងតំបន់អឺរ៉ុប និងអាស៊ី ដោយធ្វើឱ្យមានវិបត្តិសេដ្ឋកិច្ចជាច្រើន។ ក្នុងប្រទេសកម្ពុជា និងនិយាយដោយឡែកខេត្តសៀមរាប ដែលពឹងផ្អែកលើវិស័យទេសចរណ៍មានការធ្លាក់ចុះស្ទើរតែទាំងស្រុង ជាពិសេសសេដ្ឋកិច្ចទូទៅតែម្ដង។
ឧកញ៉ាបណ្ឌិត ហ៊ុយ ភៀវ បន្ថែមថា ប្រសិនបើយើងនិយាយអំពីការវិនិយោគ គឺជារឿងសំខាន់សម្រាប់ប្រទេសនីមួយៗ ព្រោះការវិនិយោគមានឱកាសក្នុងការបង្កើតនូវប្រព័ន្ធសេដ្ឋកិច្ចដល់ប្រជាជន និងការអភិវឌ្ឍសង្គមជាតិឱ្យមានភាពរីកចម្រើនជឿនលឿន។ ប៉ុន្តែកត្តាដែលធ្វើឱ្យមានអ្នកវិនិយោគចាប់អារម្មណ៍មកវិនិយោគនៅក្នុងប្រទេសក៏មានភាពលំបាក ដូច្នេះការបង្កើនទំនុកចិត្ត និងការជួយសម្របសម្រួលដែលល្អ គឺសំខាន់សម្រាប់អ្នកវិនិយោគដែលពាក់ព័ន្ធនឹងការជំរុញវិនិយោគ។ ជាមួយនេះ រាជរដ្ឋាភិបាលកម្ពុជាយើង សម្រាប់អាណត្តិថ្មីនេះ បានកែសម្រួលវច្បាប់មួយចំនួនក្នុងការលើកទឹកចិត្តអ្នកវិនិយោគក្នុងវិស័យផ្សេងៗ ដូចជា៖ ផ្នែកបច្ចេកវិទ្យា ឧស្សាហកម្មដែលគាំទ្រដល់វិស័យកសិកម្ម សុខភាព គម្រោងថាមពលកកើតឡើងវិញ ការអប់រំ ហេដ្ឋារចនាសម្ព័ន្ធ និងការដឹកជញ្ជូនជាដើម។
ឯកឧត្តមបណ្ឌិត តាន់ មុនីវណ្ណ មានប្រសាសន៍ដែរថា ពាណិជ្ជករទាំងអស់ត្រូវតែចេះបត់បែន និងតាមឱ្យទាន់ពីស្ថានភាពសេដ្ឋកិច្ចសកល ដែលកំពុងតែមានការផ្លាស់ប្ដូរ ដើម្បីអភិវឌ្ឍ និងឆ្លើយតបតាមបញ្ហាប្រឈមជាក់ស្តែង។ ហើយដើម្បីឱ្យអាជីវកម្មជោគជ័យ ដាច់ខាតម្ចាស់អាជីវកម្ម ឬសហគ្រិនភាពត្រូវចេះដឹងស្គាល់ ពីការវិភាគស្ថានភាពហិរញ្ញវត្ថុ កាលណាសហគ្រិនដែលវិភាគស្ថានភាពហិរញ្ញវត្ថុមិនបានច្បាស់លាស់ ងាយជួបរឿងបរាជ័យក្នុងអាជីវកម្ម។ ប្រទេសនីមួយៗ មិនអាចបន្តពឹងផ្អែកទៅលើចំណែកនៃការផ្គត់ផ្គង់របស់ប្រទេសដទៃទាំងស្រុងទៀតនោះទេ ពោលគឺពាណិជ្ជករទាំងអស់ ត្រូវតែរួមគ្នាជាប្រព័ន្ធ ចាប់ផ្តើមបង្កើនការផលិតផ្គត់ផ្គង់ដោយខ្លួនឯងនៅក្នុងប្រទេស ដើម្បីឆ្លើយតបនូវកង្វះខាតនៃផ្នែកនីមួយៗ។
ឯកឧត្តម ក៏បានអំពាវនាវឱ្យសមាជិកសមាជិកានៃសភាពាណិជ្ជកម្មខេត្ត ជួយណែនាំ និងកៀងគរដល់អាជីវករ ពាណិជ្ជករមកចូលរួមជាសមាជិកសភាពាណិជ្ជកម្មខេត្តបន្ថែមទៀត គឺដើម្បីជួយជំរុញដល់សេដ្ឋកិច្ចខេត្តសៀមរាប ឱ្យកាន់តែល្អប្រសើរ ហើយព្រមទាំងបានជាកម្លាំងវិស័យឯកជនកាន់តែច្រើនផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
