ព្រឹត្តិការណ៍នៃការបើកការដ្ឋានសាងសង់ព្រែកជីកហ្វូណនតេជោ ត្រូវបានប្រកាសបើកជាផ្លូវការ កាលពីព្រឹកថ្ងៃទី៥ ខែសីហា ឆ្នាំ២០២៤ម្សិលមិញនេះ ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ខណៈនៅខេត្តសៀមរាប ក៏បានរៀបចំពិធីអបអរសាទរបើកការដ្ឋានសាងសង់ព្រែកជីកហ្វូណនតេជោ ដូចគ្នានៅទីតាំងសួនច្បារព្រះរាជដំំណាក់ក្រុងសៀមរាប និងនៅតាមទីកន្លែងតាមបណ្ដាក្រុងស្រុកទូទាំងខេត្ត ដោយមានថ្នាក់ដឹកនាំ មន្ត្រីរាជការ ប្រជាពលរដ្ឋ និងសិស្សានុសិស្សចូលរួមជាច្រើនកុះករ។
ជាមួយនឹងការបើកការដ្ឋានជាប្រវត្តិសាស្ត្រនេះ ប្រជាពលរដ្ឋរស់នៅក្នុងខេត្តសៀមរាប បានបង្ហាញការសាទរ និងជឿជាក់ថា ព្រែកជីកហ្វូណនតេជោ នឹងផ្តល់អត្ថបទប្រយោជន៍ជាច្រើនមកដល់កម្ពុជាយើង សំខាន់នោះគឺការផ្ដល់នូវសេដ្ឋកិច្ចបន្ថែមតាមរយៈការដឹកចេញចូលនូវកសិផល ឬទំនិញផ្សេងៗទៅកាន់ពិភពលោក និងផ្ដល់ឯករាជភាពក្នុងការដឹកជញ្ជូនផ្លូវទឹករបស់កម្ពុជា។
សូមជម្រាបថា ការបើកការដ្ឋានសាងសង់ព្រែកជីកហ្វូណនតេជោ នៅថ្ងៃទី៥ សីហា ឆ្នាំ២០២៤នេះ នៅខេត្តសៀមរាប មានរៀបចំពិធីអបអរសាទរនៅតាមទីកន្លែងសាធារណៈ និងកន្លែងសំខាន់ៗជាច្រើន ក្នុងនោះក៏មានការរៀបចំអបអរដោយមានការទូងស្គរ និងឧបករណ៍បន្លឺសំឡេងផ្សេងៗនៅតាមមន្ទីរអង្គភាព ស្ថាប័ន សាលារៀន វត្តអារាម និងតាមផ្ទះប្រជាពលរដ្ឋតាមមូលដ្ឋានជាដើម។
គួរឱ្យដឹងថា ព្រែកជីកហ្វូណនតេជោ ជាផ្លូវទឹកតភ្ជាប់ទឹកសាប និងសមុទ្រ មានប្រវែង១៨០គីឡូម៉ែត្រ ទទឹងមុខកាត់ផ្នែកខាងលើប្រវែង១០០ម៉ែត្រ និងមុខកាត់ផ្នែកខាងក្រោមប្រមាណ៨០ម៉ែត្រ និងជម្រៅទឹកប្រមាណ ៥,៤ម៉ែត្រ មានគន្លងនាវាចរណ៍២គន្លង អាចចេញចូល និងចៀសគ្នាបានដោយសុវត្ថិភាព។ ព្រែកនេះតភ្ជាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯក នៃទន្លេបាសាក់ ចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ ៤ខេត្តមាន៖ ខេត្តកណ្តាល តាកែវ កំពត និងខេត្តកែប ដែលមានប្រជាជនរស់នៅអមសងខាងប្រមាណ១,៦លាននាក់ ដែលគម្រោងនេះនឹងប្រើប្រាស់រយៈពេលសាងសង់ប្រមាណ ៤៨ខែ និងគ្រោងបញ្ចប់នៅក្នុង អំឡុងឆ្នាំ២០២៨៕
អត្ថបទ៖ លោក អ៊ុន ណារាជ្យ
