នៅថ្ងៃទី០១ ខែសីហា ឆ្នាំ២០២៤ម្សិលមិញនេះ គណៈប្រតិភូនៃកិច្ចប្រជុំក្រុមការងារត្រីភាគីលើកទី៣ ស្តីពីកិច្ចសហប្រតិបត្តិការប្រឆាំងអំពើពុករលួយរវាងប្រទេសកម្ពុជា ឡាវ និង ថៃ បានអញ្ជើញបំពេញទស្សនកិច្ចផ្លូវការ និងសិក្សាស្វែងយល់ពីស្ថានភាពនៃការបំពេញការងារទូទៅពីការអភិវឌ្ឍរដ្ឋបាលមូលដ្ឋាន និងការអភិវឌ្ឍរដ្ឋបាលសាធារណៈខេត្ត និងយន្តការនៃការផ្តល់សេវាសាធារណៈនៅអង្គភាពច្រកចេញចូលតែមួយ នៃខេត្តសៀមរាប ។
លោក លី សារី អភិបាលរងខេត្តសៀមរាប តំណាង ឯកឧត្តម ប្រាក់ សោភ័ណ អភិបាលខេត្ត បានបង្ហាញថា ខេត្តសៀមរាប ជាតំបន់គោលដៅទេសចរណ៍លំដាប់ពិភពលោក ហើយវិស័យទេសចរណ៍នៅកម្ពុជា គឺជាកត្តាជំរុញដ៏សំខាន់មួយ ក្នុងចំណោមកត្តាជំរុញកំណើនសេដ្ឋកិច្ចរបស់កម្ពុជា។ ដោយសារវិបត្តិជំងឺកូវីដ-១៩ វាបានធ្វើឱ្យប៉ះពាល់យ៉ាងខ្លាំងដល់សេដ្ឋកិច្ចកម្ពុជា បើទោះបីជាបានប្រកាសបើកប្រទេសឡើងវិញ និងបន្ធូរបន្ថយការរឹតបណ្តឹងការធ្វើដំណើរមុនគេក្នុងចំណោមប្រទេសសមាជិកអាស៊ានក៏ដោយ។ ប៉ុន្តែទោះបីជាយើងបានជួបប្រទះគ្រោះមហន្តរាយជាច្រើនយ៉ាងណាក៏ដោយ ក៏ថ្នាក់ដឹកនាំគ្រប់ជាន់ថ្នាក់បានប្រឹងប្រែងធ្វើការងារដ៏អស្ចារ្យក្នុងការស្ថាបនាឱ្យប្រសើរឡើងនូវស្ថានភាពសេដ្ឋកិច្ច និងសង្គម និងបានដោះស្រាយបញ្ហាប្រឈមមួយចំនួនដែលពាក់ព័ន្ធ។ សរុបមកសេដ្ឋកិច្ចសង្គមកម្ពុជាកំពុងមានការរីកចម្រើន ខណៈរដ្ឋាភិបាលមានស្ថិរភាពក្នុងការធ្វើកំណែទម្រង់គ្រប់ជ្រុងជ្រោយរួមជាមួយអភិបាលកិច្ចល្អ ពិពិធកម្មសេដ្ឋកិច្ច និងការផ្លាស់ប្ដូរបែបឌីជីថល។
បន្ទាប់ពីបានជួបពិភាក្សាការងាររួចរាល់ គណៈប្រតិភូក៏បានចុះពិនិត្យផ្ទាល់ពីការងារផ្ដល់សេវានៃអង្គភាពច្រកចេញចូលខេត្ត ដោយឯកឧត្តម អុីកកាវិច វ៉ាចវ៉ាកុ ស្នងការគណៈកម្មការជាតិប្រឆាំងអំពើពុករលួយនៃព្រះរាជាណាចក្រថៃ តំណាងឱ្យគណៈប្រតិភូត្រីភាគី បានបង្ហាញការចាប់អារម្មណ៍ និងកោតសរសើរទៅលើការបង្កើតឱ្យមានអង្គភាពច្រកចេញចូលតែមួយនៅខេត្តសៀមរាប ក្នុងការបម្រើសេវាសាធារណៈ ព្រោះការបម្រើសេវាសាធារណៈនេះ នាំមកនូវប្រសិទ្ធភាព តម្លាភាព ព្រមទាំងកាត់បន្ថយនូវអំពើពុករលួយបានយ៉ាងមានប្រសិទ្ធភាពទៀតផង។ នេះជាឱកាសដ៏ល្អដែលក្រុមការងារត្រីភាគី ទទួលបាននូវបទពិសោធល្អៗ សម្រាប់ជាយុទ្ធសាស្ត្រគន្លឹះយកទៅអនុវត្តក្នុងប្រទេសរបស់ខ្លួនផងដែរ៕
អត្ថបទ និងរូបភាព៖ លោក យូ វង្ស, មុី សុខារិទ្ធ
កែសម្រួល៖ លោក អ៊ុន ណារាជ្យ
