គម្រោងមេធាវីដល់មូលដ្ឋាន នៃគណៈមេធាវី នៃព្រះរាជាណាចក្រកម្ពុជា បានធ្វើការផ្សព្វផ្សាយពីវិជ្ជាជីវៈមេធាវី និងច្បាប់ជាមូលដ្ឋានក្នុងវិស័យព្រហ្មទណ្ឌ និងរដ្ឋប្បវេណីដល់ប្រជាពលរដ្ឋ អាជ្ញាធរពាក់ព័ន្ធ ដែលការផ្សព្វផ្សាយនេះធ្វើឡើងនៅសាលាខេត្ដសៀមរាប នារសៀលថ្ងៃទី១២ ខែសីហា ឆ្នាំ២០២៤ ក្រោមការដឹកនាំពី ឯកឧត្ដម លី ច័ន្ទតុលា ប្រធានគណៈមេធាវី អាណត្តិទី១៣ និងទី១៤ និងលោក ង៉ូវ សេងកាក់ អភិបាលរងខេត្ដសៀមរាប ដោយមានការចូលរួមពីអ្នកពាក់ព័ន្ធជាច្រើនរូប។
លោក ង៉ូវ សេងកាក់ អភិបាលរងខេត្ដមានប្រសាសន៍ថា វគ្គបណ្ដុះបណ្ដាលនេះ មានសារៈសំខាន់ណាស់លើវិស័យសិទ្ធិមនុស្ស ដែលជាជំនួយផ្នែកច្បាប់ដល់ជនក្រីក្រ ព្រោះមនុស្សជាមូលដ្ឋានមួយ និងជាធាតុផ្សំមួយដ៏សំខាន់នៃប្រព័ន្ធយុត្តិធម៌ព្រហ្មទណ្ឌត្រឹមត្រូវ និងមានប្រសិទ្ធភាពដោយឈរលើមូលដ្ឋាននីតិរដ្ឋ។ ក្នុងនោះវាក៏មានសារៈសំខាន់ផងដែរ ដល់ការទទួលបានសិទ្ធិដទៃទៀត រួមទាំងសិទ្ធិទទួលបានសវនាការដោយយុត្តិធម៌ផង ជាពិសេសចំពោះអ្នកក្រីក្របំផុត ដែលគ្មានលទ្ធភាពបង់ថ្លៃដល់សេវាកម្មជំនួយផ្នែកច្បាប់។
ព័ត៌មានជាតិ ថ្មីៗ
លោកអភិបាលរងខេត្តបន្ដថា ការទទួលបានសេវាកម្មយុត្តិធម៌កាន់តែច្រើនឡើង អាចជួយបង្ការពីការប្រព្រឹត្តមិនគប្បីនៅប៉ុស្តិ៍នគរបាល អធិការដ្ឋាន ស្នងការដ្ឋាន អាចជួយសម្រួលដល់ភាពចង្អៀតណែននៅពន្ធនាគារ និងអាជួយកាត់បន្ថយដល់ការផ្តន្ទាទោសមិនត្រឹមត្រូវ។ លោកសង្ឃឹមថា អង្គពិធីទាំងមូល នឹងបានជ្រាបកាន់តែច្បាស់ ក៏ដូចជាបានស្តាប់នូវអនុសាសន៍ចំនួនពីប្រធានបទ និងគោលបំណងដែលវាគ្មិនធ្វើការបទបង្ហាញនាពេលនេះ។ លោកក៏បានណែនាំដល់អ្នកដែលបានចូលរួមទាំងអស់ ត្រូវត្រងត្រាប់ស្តាប់ដោយចិត្តទុកដាក ដើម្បីយកខ្លឹមសារទាំងនេះទៅផ្សព្វផ្សាយបន្តដល់មូលដ្ឋាន សំដៅធ្វើយ៉ាងណា ដើម្បីឱ្យសេវាកម្មជំនួយផ្នែកច្បាប់ត្រូវបានផ្ដល់ជូនតាមមធ្យោបាយមួយជាប្រព័ន្ធ និងសម្រាប់ទាំងអស់គ្នាដែលត្រូវការសេវាកម្មនេះ។
ឯកឧត្ដម លី ច័ន្ទតុលា មានប្រសាសន៍ដែរថា វគ្គបណ្តុះបណ្តាលនៃគម្រោងមេធាវីដល់មូលដ្ឋាន មានគោលបំណងផ្សព្វផ្សាយច្បាប់សំខាន់ៗចំនួន៤ រួមមាន ផ្សព្វផ្សាយនូវវិជ្ជាជីវៈ និងការទទួលខុសត្រូវរបស់មេធាវី ផ្សព្វផ្សាយពីសេវាការពារក្ដី ផ្សព្វផ្សាយពីការពិគ្រោះយោបល់ផ្លូវច្បាប់ ដោយមិនគិតកម្រៃដល់ប្រជាពលរដ្ឋក្រីក្រ គ្រូបង្រៀន ស្ត្រី កម្មករនិយោជិត និងការផ្សព្វផ្សាយច្បាប់ជាមូលដ្ឋានក្នុងវិស័យព្រហ្មទណ្ឌ និងរដ្ឋប្បវេណី។
ឯកឧត្ដមបន្ដថា វិស័យច្បាប់ដែលផ្សព្វផ្សាយដល់អាជ្ញាធរ មន្ត្រីឃុំសង្កាត់ មេភូមិ និងអ្នកពាក់ព័ន្ធក្នុងខេត្ដសៀមរាបនាពេលនេះ គឺដើម្បីឱ្យពួកគាត់ចូលរួមចំណែកជាមួយរដ្ឋាភិបាល ក្នុងការផ្សព្វផ្សាយច្បាប់នៅមូលដ្ឋាន ពង្រឹងចំណេះដឹង ការដោះស្រាយវិវាទក្រៅប្រព័ន្ធតុលាការ ឱ្យបានយល់កាន់តែច្បាស់ ជាពិសេសការចែករំលែកចំណេះដឹង ក៏ដូចជាផ្ដល់បទពិសោធដក់អាជ្ញាធរពាក់ព័ន្ធ ដើម្បីអនុវត្ដច្បាប់នៅមូលដ្ឋាន។ វគ្គបណ្ដុះបណ្ដាលនេះ ធ្វើឡើងជាលើកទី១សម្រាប់ខេត្ដសៀមរាប ប៉ុន្ដែសម្រាប់នៅទូទាំងរាជធានីខេត្ដបានចំនួន១១លើកមកហើយ ដោយមានអ្នកចូលរួមជាអាជ្ញាធរមូលដ្ឋានមានប្រមាណជិត៣.០០០នាក់។ ក្នុងខេត្ដសៀមរាប មានមេធាវីស្ម័គ្រចិត្ដជាង៦០នាក់ ក្នុងនោះក្នុងមួយឆ្នាំៗបានជួយផ្ដល់សេវាជួយការពារក្ដីដល់ជនក្រីក្រ មានប្រមាណ២០០ករណី ខណៈដែលនៅទូទាំងរាជធានីខេត្ដពី ៦.០០០ ទៅ៧.០០០ករណី ក្នុងរយៈពេលមួយឆ្នាំៗ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
