ក្រុមគ្រូពេទ្យ និងអ្នកស្ម័គ្រចិត្តមកពីប្រទេសកូរ៉េជាង ៧០នាក់ តាមរយៈសមាគម Chung Buk Medical Association សហការជាមួយការិយាល័យស្រុកប្រតិបត្តិនៃមន្ទីរសុខាភិបាលខេត្តសៀមរាប និងមណ្ឌលសុខភាពទាំង៣ ក្នុងស្រុកស្វាយលើ បានចុះពិនិត្យ និងព្យាបាលជំងឺដោយឥតគិតថ្លៃ រយៈពេល២ថ្ងៃ ចាប់ពីថ្ងៃទី១២-១៣ ខែសីហា ឆ្នាំ២០២៤ ជូនប្រជាពលរដ្ឋក្នុងឃុំចំនួន៥ នៃស្រុកស្វាយលើ ខេត្តសៀមរាប ក្នុងបរិវេណអនុវិទ្យាល័យទឹកលិច។
លោក យ៉ាង ស៊ីនដុក អ្នកដឹកនាំសមាគម Chung Buk Medical Association បានឱ្យដឹងថា ការចុះមកពិនិត្យ និងព្យាបាលជំងឺដោយឥតគិតថ្លៃ ជូនប្រជាពលរដ្ឋនេះ គឺដោយសារតែលោក និងក្រុមការងារមើលឃើញថា ឃុំបឹងមាលា ស្រុកស្វាយលើ មិនទាន់មានមណ្ឌលសុខភាពនូវឡើយ ដែលធ្វើឱ្យប្រជាពលរដ្ឋខ្លះ ពិបាកក្នុងការរកសេវាដោយសារជីវភាព មិនអាចមានលទ្ធភាពទៅរកសេវាឯកជនបាន។ ជាមួយនោះក្រុមការងារក៏បានសាងសង់អគារមណ្ឌលសុខភាពមួយខ្នង ព្រមទាំងផ្ដល់បរិក្ខាពេទ្យចាំបាច់មួយចំនួនផងដែរ។ ក្នុងនោះលោកក៏បានថ្លែងអំណរអរគុណដល់អាជ្ញាធរខេត្តសៀមរាប និងអាជ្ញាធរស្រុក ដែលសហការសម្របសម្រួល បង្កភាពងាយស្រួលដល់ក្រុមរបស់លោកក្នុងការចុះមកពិនិត្យ និងព្យាបាលជំងឺជូនដល់ប្រជាពលរដ្ឋរយៈពេល២ថ្ងៃនេះ។
លោក ភឿក ប៊ុនស៊ុង អភិបាលរងស្រុកស្វាយលើ បានឱ្យដឹងថា ការចុះពិនិត្យនេះ គឺសម្រាប់ប្រជាពលរដ្ឋក្នុងឃុំចំនួន៥ មានឃុំបឹងមាលា ឃុំស្វាយលើ ឃុំតាសៀម ឃុំខ្នងភ្នំ និងឃុំកន្ទួត។ លោកថានេះជាទីមួយហើយ ដែលក្រុមគ្រូពេទ្យស្ម័គ្រចិត្តប្រទេសកូរ៉េ ចុះមកពិនិត្យ និងព្យាបាលជំងឺដោយឥតគិតថ្លៃ ជូនប្រជាពលរដ្ឋក្នុងស្រុកស្វាយលើ ដោយការពិនិត្យរួមមាន៖ ជំងឺមាត់ធ្មេញ ភ្នែក រោគស្ត្រី ពិនិត្យផ្ទៃពោះ(អេកូ) ជំងឺសន្លាកដៃជើង និងសុខភាពទូទៅ និងបានជួយសាងសង់អាគារមួយខ្នងនៃមណ្ឌលសុខភាពបឹងមាលា និងបំពាក់គ្រឿងឧបករណ៍ពេទ្យ ដែលគិតមកទល់ពេលនេះសម្រេចបានជិត៩០ភាគរយហើយ។
លោកអភិបាលរងស្រុក បានបញ្ជាក់ដែរថា ក្រៅពីការចុះពិនិត្យដោយឥតគិតថ្លៃនេះ កន្លងមកអាជ្ញាធរស្រុក និងមន្ត្រីជំនាញតែងចុះជំរុញផ្សព្វផ្សាយ និងណែនាំជាប្រចាំដល់ប្រជាពលរដ្ឋក្នុងមូលដ្ឋានឱ្យទៅទទួលសេវានៅមណ្ឌលសុខភាពដែលនៅចិតបងប្អូនបំផុត ដើម្បីមានភាពងាយស្រួលសម្រាប់ប្រជាពលរដ្ឋពេលមានជំងឺ ឬបញ្ហាសុខភាពបន្ទាន់អ្វីមួយ។
ប្រជាពលរដ្ឋដែលបានមកទទួលសេវាពីក្រុមគ្រូពេទ្យនេះដែរ បានបង្ហាញក្ដីរីករាយ ដែលក្រុមគ្រូពេទ្យស្ម័គ្រចិត្តប្រទេសកូរ៉េ បានចុះមកពិនិត្យ និងព្យាបាលជំងឺដោយឥតគិតថ្លៃជូនពួកគាត់ ដែលជាការជួយសម្រួលការចំណាយថវិកាមួយកម្រិតពិការទៅរកសេវាឯកជន ហើយថែមទាំងបានជួយសាងសង់មណ្ឌលសុខភាពនៅក្នុងមូលដ្ឋានរបស់ពួកគាត់ទៀតផង ព្រោះពេលមានមណ្ឌលសុខភាពនៅជិតប្រជាពលរដ្ឋ គឺវាបានផ្ដល់ភាពល្អប្រសើរច្រើនដល់ពលរដ្ឋពេលដែលមានបញ្ហាសុខភាព ឬជំងឺផ្សេងៗកើតមានឡើង៕
អត្ថបទ និងរូបភាព៖ លោក ហាំ ម៉េងហួត
កែសម្រួល៖ លោក អ៊ុន ណារាជ្យ
