មន្ត្រីជាន់ខ្ពស់ក្រសួងសង្គមកិច្ច អតីតយុទ្ធជន និងយុវនីតិសម្បទា បានបង្ហាញថា គិតចាប់តាំងពីឆ្នាំ២០១៩ មកដល់បច្ចុប្បន្នពលរដ្ឋកម្ពុជាប្រមាណ ៦៨ម៉ឺននាក់ ត្រូវកំណត់ថាជាជនមានពិការភាព ខណៈចំនួននេះមន្ត្រីជំនាញអះអាងថា អាចនឹងមានការកើនឡើងបន្ថែមទៀត។
ថ្លែងក្នុងសិក្ខាសាលាស្តីពីការបញ្ជ្រាបបរិយាបន្នពិការភាពទៅក្នុងប្រព័ន្ធជំនួយសង្គម ដែលធ្វើឡើងនៅសាលាខេត្តសៀមរាប នៅព្រឹកថ្ងៃទី១៤ ខែសីហា ឆ្នាំ២០២៤នេះ លោក សាន់ រតនា ប្រធាននាយកដ្ឋានសុខុមាលភាពជនពិការ នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានឱ្យដឹងថា កម្មវិធីកំណត់អត្តសញ្ញាណកម្មពិការភាព បានដំណើរការកាលពីឆ្នាំ២០២០ ក្រោមការគាំទ្រពីយូនីសេហ្វ ហើយសម្រាប់ខេត្តសៀមរាប ក៏ដូចជាបណ្តាខេត្តដទៃទៀត ក៏ត្រូវបានអនុវត្តនូវកម្មវិធីនេះផងដែរ។
ព័ត៌មានជាតិ ថ្មីៗ
លោក សាន់ រតនា បានបញ្ជាក់ថា ការធ្វើជំរឿនកំណត់អត្តសញ្ញាណកម្មពិការភាពនេះ បើគិតពីឆ្នាំ២០១៩ ពោលមុនមានការគាំទ្រពីអង្គការយូនីសេហ្វ គឺមកដល់បច្ចុប្បន្ននេះ នៅទូទាំងប្រទេសមានពលរដ្ឋប្រមាណ ៦៨ម៉ឺននាក់ ត្រូវបានកំណត់ថាមានពិការភាព។ ប៉ុន្តែចំនួនពិការភាពនេះត្រូវបានគេមើលឃើញថា នឹងមានការកើនឡើងតាមអ្វីដែលយើងកត់សម្គាល់តាមសូចនាករ ឬការវ៉ៃតម្លៃនៅក្នុងជំរឿនយើងអាចប្រើកម្រងសំណួរខុសគ្នា។ ដោយឡែកសម្រាប់ខេត្តសៀមរាប បច្ចុប្បន្នមានពលរដ្ឋចំនួន ៤០.៥៨៥នាក់ ត្រូវបានកំណត់ថាជាជនមានពិការភាព ក្នុងនោះមាន ១៨.៤៥៣នាក់ ត្រូវបានធ្វើអត្តសញ្ញាណកម្មជូនពួកគាត់រួចរាល់ និងនៅសល់ចំនួន ២២.១៣២នាក់ទៀត ដែលមិនទាន់បានមកធ្វើអត្តសញ្ញាណកម្ម។
លោក ចឹក គឹមជុន នាយករងរដ្ឋបាលខេត្តសៀមរាប បានបញ្ជាក់ថា យោងតាមតួលេខខាងលើនេះ វាគ្រាន់តែជាតួលេខបណ្តោះអាសន្នប៉ុណ្ណោះ ប៉ុន្តែនៅមានជនមានពិការភាពមួយចំនួនទៀតមិនទាន់ត្រូវបានចុះបញ្ជីកំណត់ថាជាជនមានពិការភាពនៅឡើយ ដោយកិច្ចការនេះហាក់បីដូចជាយឺតបន្តិច។ ដើម្បីជួយដល់ជនមានពិការភាពការងារចុះកំណត់អត្តសញ្ញាណកម្មនេះសំខាន់ណាស់។ ដូច្នេះលោកទទូចសុំឱ្យអាជ្ញាធរឃុំសង្កាត់ ស្រុកក្រុង ត្រូវខិតខំជួយជំរុញកិច្ចការងារនេះឱ្យបានឆាប់រហ័សតាមដែលអាចធ្វើទៅបាន៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
