ការងារជួសជុលទំនប់អាងទឹកសួង៧៨ ស្ថិតនៅក្នុងភូមិស្ដៅ ឃុំអន្លង់សំណរ ស្រុកជីក្រែង ខេត្តសៀមរាប គិតមកទល់ពេលនេះសម្រេចបានជាង ៩០ភាគរយហើយ ដែលតាមការប៉ានប្រមាណអាចស្តុកទឹកនៃទំនប់នេះមានប្រមាណ ៣លានម៉ែត្រគូប បម្រើឱ្យការស្រោចស្រពបន្ថែមលើផ្ទៃដីបង្កបង្កើនផលរបស់បងប្អូនប្រជាកសិករក្នុងមូលដ្ឋាន។
លោក ប៊ុន ថន ប្រធានគ្រប់គ្រងការដ្ឋានខាងលើ បានឱ្យដឹងថា ទំនប់អាងទឹកសួង៧៨ បានកសាងឡើងតាំងពីឆ្នាំ១៩៧៨ ដែលមានតួនាទីទទួលទឹកពីផ្ទៃរងទឹកភ្លៀងក្នុងតំបន់ និងពីស្ទឹងជីក្រែង ដើម្បីស្រោចស្រពបន្ថែមលើផ្ទៃបង្កបង្កើនផលកសិកម្មប្រមាណជាង ១.០០០ហិកតា និងសម្រាប់ការប្រើប្រាស់ក្នុងជីវភាពរស់នៅប្រចាំថ្ងៃ។ កន្លងមកទំនប់នេះ បានជួបនូវស្ថានភាពទឹកជំនន់រដូវវស្សាហូរច្រោះដាច់តួទំនប់ស្ទើរតែទាំងស្រុង ខណៈសំណង់នៅលើទំនប់មិនអាចគ្រប់គ្រង និងបញ្ជាទឹកបាន ដែលបណ្តាលឱ្យមានការខ្វះខាតទឹកសម្រាប់ការងារបង្កបង្កើនផល និងការប្រើប្រាស់ប្រចាំថ្ងៃរបស់ប្រជាពលរដ្ឋក្នុងតំបន់។
ព័ត៌មានជាតិ ថ្មីៗ
លោក ប៊ុន ថន បញ្ជាក់ថា នៅក្នុងឆ្នាំ២០២៤នេះ នាយកដ្ឋានវិស្វកម្មនៃក្រសួងធនធានទឹក និងឧតុនិយម បានអនុវត្តគម្រោងជួសជុលទំនប់អាងទឹកនេះឡើងវិញ ក្នុងគោលបំណងដើម្បីជួយដោះស្រាយកង្វល់របស់បងប្អូនប្រជាកសិករ ដែលកំពុងជួបការលំបាកខ្វះទឹកសម្រាប់ការងារបង្កបង្កើនផល និងការប្រើប្រាស់ក្នុងជីវភាពរស់ប្រចាំថ្ងៃ។ គម្រោងជួសជុលនេះ បានចាប់ផ្ដើមអនុវត្តនៅក្នុងខែមីនា ឆ្នាំ២០២៤ ហើយការងារសំខាន់ៗរួមមាន៖ ជួសជុលទំនប់ប្រវែង ៤.២០០ម៉ែត្រ និងសាងសង់សំណង់សិល្បការ្យលើទំនប់ចំនួន៨កន្លែង ក្នុងនោះសំណង់ទ្វារទឹកចំនួន២កន្លែង សំណង់ទ្វារទឹកចំនួន៥កន្លែង និងសំណង់ទ្វារទឹកចំនួន ១កន្លែង។ បើគិតមកដល់ពេលនេះវឌ្ឍនភាពការងារសម្រេចបានប្រមាណជាង ៩០ភាគរយហើយ។
លោក កង ស៊ីជឿន ប្រធានក្រុមប្រឹក្សាឃុំអន្លង់សំណរ បានឱ្យដឹងថា កន្លងមកបងប្អូនប្រជាកសិករបានជួបការលំបាកដោយសារទំនប់បាក់ តែពេលនេះបានទទួលសមិទ្ធផលថ្មីដែលធ្វើឱ្យពួកគាត់មានការត្រេកអរ និងបានថ្លែងអំណរគុណដល់ថ្នាក់ដឹកនាំគ្រប់ជាន់ថ្នាក់ និងប្រមុខរាជរដ្ឋាភិបាលកម្ពុជា ដែលតែងតែយកចិត្តទុកដាក់គិតគូរដល់សុខទុក្ខប្រជាពលរដ្ឋនៅតាមជនបទដាច់ស្រយាល ដែលជួបប្រទះនឹងការលំបាក។ បន្ទាប់ពីការងារនេះរួចរាល់បងប្អូនប្រជាពលរដ្ឋប្រមាណ ១.១៩០គ្រួសារ ក្នុងភូមិចំនួន៦ នៃឃុំអន្លង់សំណរ ស្រុកជីក្រែង ខេត្តសៀមរាប នឹងមានប្រភពទឹកទុកស្រោចស្រពបន្ថែមលើផ្ទៃដីបង្កបង្កើនផលកសិកម្មដែលមានស្រាប់ ដំណាំរួមផ្សំ និងការប្រើប្រាស់សម្រាប់ជីវភាពរស់នៅប្រចាំថ្ងៃ។ ជាមួយគ្នានេះ ខ្នងទំនប់នឹងក្លាយជាផ្លូវគមនាគមន៍ដ៏សំខាន់សម្រាប់ចរាចរណ៍ដឹកកសិផលទៅកាន់ទីផ្សារ ព្រមទាំងជារមណីយដ្ឋានអេកូទេសចរណ៍ដ៏ទាក់ទាញមួយនៅក្នុងតំបន់ផងដែរ៕
អត្ថបទ និងរូបភាព៖ ក្រសួងធនធានទឹក
កែសម្រួល៖ លោក អ៊ុន ណារាជ្យ
