នៅថ្ងៃទី១៥ ខែសីហា ឆ្នាំ២០២៤ មន្ត្រីជាន់ខ្ពស់ក្រសួងកសិកម្ម ដឹកនាំដោយឯកឧត្តម ប៉ែន ផល្លីកា អនុរដ្ឋលេខាធិការក្រសួង និងជាអធិការដ្ឋានរដ្ឋបាលជលផលខាងជើងបឹងទន្លេសាប ខណ្ឌរដ្ឋបាលជលផលសៀមរាប រួមនឹងអាជ្ញាធរ និងមន្ត្រីជំនាញបានចុះពិនិត្យ និងបង្រ្កាបបទល្មើសជលផលចាប់ពីចំណុចចុងឃ្នៀស ទៅមាត់ពាមមេជ្រៃ ភូមិមេជ្រៃ ឃុំកែវពណ៌ ស្រុកពួក ខេត្តសៀមរាប ដោយបានធ្វើការរឹបអូសវត្ថុតាងមួយចំនួន រួចបំផ្លាញចោលនៅនឹងកន្លែងតែម្ដង។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានឱ្យដឹងថា យុទ្ធនាការនេះក្រុមការងារបានឯកភាពគ្នាកាប់បំផ្លាញឧបករណ៍នេសាទល្មើសច្បាប់ស្តីពីជលផលនេសាទ ដោយឧបករណ៍លបរ៉ាវដែលមានក្រឡាតូចជាង០,០៣ម៉ែត្រ និងលើសប្រវែងកំណត់បាន១ករណី ក្បាលលប១០គ្រឿង របាំងសាច់អួនប្រវែង១.៥០០ម៉ែត្រ ចម្រឹង៦០០ដើម និងលែងកូនត្រីចម្រុះប្រមាណ៣០គីឡូក្រាមចូលទៅក្នុងទន្លេវិញ។
ក្នុងឱកាសនោះដែរ ឯកឧត្តម ប៉ែន ផល្លីកា មានប្រសាសន៍ថា ក្រុមការងារនឹងបន្តអនុវត្តការងារនេះជាបន្តបន្ទាប់ដូចភ្លៀងរលឹម ក្នុងគោលបំណងទប់ស្កាត់បទល្មើសជលផលដែលបង្កមហន្តរាយដល់មច្ឆជាតិធម្មជាតិ ក៏ដូចជាជីវចម្រុះគ្រប់ប្រភេទដែលកំពុងពងកូន និងចល័តនារដូវទឹកឡើង ពោលគឺរដូវបិទនេសាទ និងមិនលើកលែងចំពោះជនប្រើប្រាស់ឧបករណ៍នេសាទខុសច្បាប់ឡើយ។
ព័ត៌មានជាតិ ថ្មីៗ
ឯកឧត្តមក៏បានជំរុញដល់មន្ត្រីក្រោមឱវាទ និងអាជ្ញាធរមានសមត្ថកិច្ចពាក់ព័ន្ធទាំងអស់ ត្រូវបន្តយកចិត្តទុកដាក់សហការគ្នាចេញត្រួតពិនិត្យឱ្យបានញឹកញាប់ បន្តការពិនិត្យទប់ស្កាត់បទល្មើសជលផលក្នុងភូមិសាស្ត្ររបស់ខ្លួនឱ្យបានជាប្រចាំ ព្រោះថាកិច្ចការបង្ក្រាបនិងអភិរក្សជលផលនេះ យើងត្រូវការការចូលរួមសហការពីអាជ្ញាធរដែនដី កងកម្លាំងប្រដាប់អាវុធ និងសហគមន៍ក្នុងមូលដ្ឋាន រួមគ្នាបំផុស និងពន្យល់ប្រជាពលរដ្ឋឱ្យយល់ពីធនធានជលផលថា ជាទ្រព្យសម្បត្តិយើងទាំងអស់គ្នា ជួយការពារទាំងអស់គ្នា និងត្រូវយល់ថា ធនធាននេសាទមិនមែនជាទ្រព្យសម្បត្តិរបស់ជលផលតែម្ខាងនោះទេ។ តាមការពិនិត្យជាក់ស្តែងក្នុងការទប់ស្កាត់បទល្មើសជលផលក្រុមការងារសង្កេតឃើញថា ត្រីនឹងមានកំណើនច្រើនជាងឆ្នាំមុនផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
