នាព្រឹកថ្ងៃទី១៥ ខែសីហា ឆ្នាំ២០២៤ ប្រតិភូគណៈកម្មការសិទ្ធិមនុស្ស ទទួលពាក្យបណ្ដឹង និងអង្កេត និងអធិការកិច្ច (គណៈកម្មការទី១) នៃរដ្ឋសភា ដឹកនាំដោយ ឯកឧត្តម សរ ចំរុង ប្រធានគណៈកម្មការទី១ បានជួបប្រជុំ និងពិភាក្សាការងារជាមួយថ្នាក់ដឹកនាំខេត្តសៀមរាប ដឹកនាំដោយ លោក អុឹង គឹមលាង អភិបាលរងខេត្ត ដើម្បីធ្វើការស្វែងយល់ពីភាពរីកចម្រើន និងបញ្ហាប្រឈម ក្នុងការអនុវត្តកម្មវិធីនយោបាយរបស់រាជរដ្ឋាភិបាល និងស្វែងយល់អំពីយន្តការដោះស្រាយទំនាស់ដីធ្លីនៅក្នុងខេត្ត ដោយមានការចូលរួមពីប្រតិភូ និងថ្នាក់ដឹកនាំនានាក្នុងខេត្តជាច្រើនរូប។
លោក អុឹង គឹមលាង អភិបាលរងខេត្ត បានបង្ហាញថា ខេត្តសៀមរាបមានផ្ទៃដីសរុប ១០.២៩៩,៤៣គីឡូម៉ែត្រក្រឡា ដែលមានទាំងប្រភេទដីកម្មសិទ្ធិឯកជន និងកម្មសិទ្ធិសាធារណៈ ដោយដីជាកម្មសិទ្ធិសាធារណៈមានអាជ្ញាធរកាន់កាប់ដីរដ្ឋ មានដូចជា៖អាជ្ញាធរជាតិអប្សរា អាជ្ញាធរទន្លេសាប ក្រសួងបរិស្ថាន ក្រសួងកសិកម្ម ក្រសួងធនធានទឹក ក្រសួងវប្បធម៌ ក្រសួងសាធារណការ និងដឹកជញ្ជូនជាដើម ដែលកាន់កាប់ដីសាធារណៈរបស់រដ្ឋ ដូចមានកំណត់ក្នុងមាត្រា ១៥ នៃច្បាប់ភូមិបាលឆ្នាំ២០០១។ ភាគច្រើនដីរដ្ឋ និងដីប្រជាពលរដ្ឋម្នាក់ៗ មិនទាន់បានចុះបញ្ជីដីធ្លីឱ្យបានគ្រប់ក្បាលដីនៅឡើយ ដែលជាហេតុបង្កឱ្យមាននូវវិវាទកាន់កាប់ដីធ្លី និងព្រំប្រទល់រវាងកម្មសិទ្ធិករដែលជាប់ព្រំគ្នា។
លោកអភិបាលរងខេត្ត បង្ហាញទៀតថា ចំពោះលទ្ធផលនៃការដោះស្រាយវិវាទដីធ្លីគិតមកទល់ពេលនេះ ក្រុមការងារបានទទួលបណ្ដឹងចំនួន ៤៩២ករណី ដោះស្រាយចប់រួចរាល់ចំនួន ៣៣៥ករណី និង ១៥៨ករណីទៀតកំពុងបន្តពិនិត្យដោះស្រាយ ដែលជាករណីទាមទារសិទ្ធិដីធ្លីរបស់ប្រជាពលរដ្ឋលើដីរដ្ឋ និង ករណីវិវាទទាមទារសិទ្ធិដីធ្លីរវាងភាគីប្រជាពលរដ្ឋ និងប្រជាពលរដ្ឋ។ ជាមួយនេះក្រុមការងារក៏នៅជួបប្រទះនៅបញ្ហាប្រឈមមួយចំនួនទៀត ហើយដើម្បីដោះស្រាយនូវបញ្ហាទាំងអស់នេះ អាជ្ញាធរខេត្ត និងមន្រ្តីជំនាញគ្រប់ជាន់ថ្នាក់ នឹងបន្តពង្រឹងតួនាទីភារកិច្ច និងយន្តការនៃការដោះស្រាយវិវាទដីធ្លីឱ្យកាន់តែមានប្រសិទ្ធភាព, ជំរុញការចុះបញ្ជីដីធ្លីទូទាំងខេត្តឱ្យបានរួចរាល់គ្រប់ក្បាលដីនៅបំណាច់ឆ្នាំ២០២៥, បន្តផ្សព្វផ្សាយច្បាប់ និងលិខិតបទដ្ឋានគតិយុត្តពាក់ព័ន្ធនឹងកម្មសិទ្ធិដីធ្លី ជូនដល់ប្រជាពលរដ្ឋ, ទប់ស្កាត់ បង្ក្រាប និងចាត់វិធានការចំពោះជនល្មើសរំលោភកាន់កាប់ដីរដ្ឋតាមនីតិវិធីច្បាប់ជាធរមាន និងសហការជាមួយអាជ្ញាធរមានសមត្ថកិច្ចពាក់ព័ន្ធដើម្បីដោះស្រាយវិវាទដីធ្លីឱ្យបានឆាប់រហ័ស។
ក្នុងឱកាសនោះ ឯកឧត្តម សរ ចំរុង បានជម្រាបជូនថ្នាក់ដឹកនាំខេត្តសៀមរាប អំពីភារកិច្ចសំខាន់ៗ របស់រដ្ឋសភាដែលមានដូចជាការងារនីតិកម្ម ការតាមដាន ការអនុវត្តច្បាប់ និងភាពជាអ្នកតំណាងរបស់ពលរដ្ឋព្រមទាំងបានជម្រាបជូន ពីគោលបំណងនៃបេសកកម្មរបស់គណៈកម្មការមកកាន់ខេត្តសៀមរាប ដើម្បីស្វែងយល់ពីវឌ្ឍនភាពការងារ និងយន្តការដោះស្រាយទំនាស់ដីធ្លីរបស់ខេត្ត។ ឯកឧត្តមក៏បានថ្លែងអំណរគុណ និងកោតសរសើរ ចំពោះរដ្ឋបាលខេត្ត ដែលជានិច្ចកាលបានយកចិត្តទុកដាក់ក្នុងការបម្រើសេវា និងខិតខំដោះស្រាយ រាល់ការលំបាកជូនប្រជាពលរដ្ឋដោយឈរលើគោលការណ៍ច្បាប់។
ឯកឧត្តម សរ ចំរុង ក៏បានបញ្ជាក់បន្ថែមទៀតថា នៅក្នុងអាណត្តិទី៧ នៃរដ្ឋសភា គណៈកម្មការបានទួលពាក្យបណ្តឹងពីប្រជាពលរដ្ឋចាប់ពីខែមករា រហូតដល់ខែសីហា ឆ្នាំ២០២៤ មានចំនួន ៣៥រឿង អន្តរគមន៍ពាក្យបណ្តឹងចំនួន ១៦រឿង ពាក្យបណ្តឹងកំពុងពិនិត្យចំនួន ១៩រឿង និងលិខិតឆ្លើយតបពីក្រសួងស្ថាប័នពាក់ព័ន្ធបានចំនួន ៣រឿងផងដែរ។ ជាមួយនេះឯកឧត្តមក៏បានសំណូមពរដល់អាជ្ញាធរខេត្ត ពន្លឿនការងារដោះស្រាយបញ្ហាដីធ្លីនេះបន្ថែមទៀត ធ្វើយ៉ាងណាឱ្យការងារនេះបញ្ចប់ទៅដោយរលូនតាមការរំពឹងទុក៕
អត្ថបទ និងរូបភាព៖ លោក អ៊ុន ណារាជ្យ
