នៅរសៀលថ្ងៃទី១៣ ខែសីហា ឆ្នាំ២០២៤នេះ ក្រុមប្រឹក្សាខេត្តសៀមរាប បានបើកកិច្ចប្រជុំវិសាមញ្ញ លើកទី១ របស់ខ្លួនសម្រាប់អាណត្តិទី៤ ក្រោមកិច្ចដឹកនាំរបស់ ឯកឧត្តម លី សំរិទ្ធ ប្រធានក្រុមប្រឹក្សាខេត្តសៀមរាប និង លោក នាក់ ណេរ៉ុន អភិបាលរងខេត្ត ដោយមានការចូលរួមឯកឧត្តម លោកជំទាវសមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាព និងអ្នកពាក់ព័ន្ធជាច្រើនរូប។
អង្គប្រជុំនាពេលនេះ បានអនុម័តលើរបៀបវារៈទី១.ធ្វើការពិនិត្យពិភាក្សា និងអនុម័តលើសេចក្តីព្រាងសេចក្តីសម្រេចស្តីពីការបង្កើតក្រុមការងារកសាងផែនការអភិវឌ្ឍរយៈពេល៥ឆ្នាំ និងកម្មវិធីបីឆ្នាំរំកិលរបស់រដ្ឋបាលខេត្ត, ទី២.សេចក្តីព្រាងសេចក្តីសម្រេចទទួលស្គាល់ប្រធាន អនុប្រធាន និងសមាជិកគណៈកម្មាធិការសម្របសម្រួលបច្ចេកទេសក្រុមប្រឹក្សាខេត្ត, ទី៣.អនុម័តលើសេចក្តីសម្រេចបង្កើតគណៈកម្មាធិការលទ្ធកម្មរបស់រដ្ឋបាលខេត្ត និងទី៤.អនុម័តលើផែនការចំណូលចំណាយថវិកាឆ្នាំ២០២៥ របស់រដ្ឋបាលខេត្តសៀមរាប។ ឆ្លងតាមការអនុម័តបានធ្វើការជ្រើសរើសសមាជិកសមាជិកាក្រុមប្រឹក្សាខេត្តចំនួន៥រូប ដាក់បញ្ចូលសមាសភាពក្នុងគណៈកម្មាធិការសម្របសម្រួលបច្ចេកទេស និងធ្វើការបោះឆ្នោតជ្រើសរើសបេក្ខភាពរបស់សមាជិកសមាជិកាក្រុមប្រឹក្សាខេត្តចំនួន៣រូប បញ្ចូលជាសមាជិកសមាជិកាគណៈកម្មាធិការលទ្ធកម្មរបស់រដ្ឋបាលខេត្ត ព្រមទាំងធ្វើការអនុម័តលើផែនការចំណូលចំណាយថវិកាឆ្នាំ២០២៥ របស់រដ្ឋបាលខេត្តផងដែរ។
មានប្រសាសន៍ក្នុងឱកាសនោះ ឯកឧត្តម លី សំរិទ្ធ ប្រធានក្រុមប្រឹក្សាខេត្ត បានថ្លែងអំណរគុណដល់ថ្នាក់ដឹកនាំគ្រប់ជាន់ថ្នាក់ និងមន្ត្រីរាជការទាំងអស់ ដែលបានរួមសហការគ្នាល្អ ដើម្បីធានានូវសុវត្ថិភាព សន្តិសុខ សណ្តាប់ធ្នាប់សាធារណៈ និងអនុវត្តបានល្អលើគោលនយោបាយភូមិឃុំសង្កាត់មានសុវត្ថិភាព។ ឯកឧត្តម ក៏បានធ្វើការណែនាំឱ្យសមាជិកសមាជិកាក្រុមប្រឹក្សាខេត្ត ដែលបានជ្រើសតាំងដាក់បញ្ចូលក្នុងគណៈកម្មាធិការក្នុងអាណត្តិទី៤ នៃក្រុមប្រឹក្សាខេត្ត ត្រូវចូលរួមសហការគ្នាឱ្យបានល្អ ក្នុងការអនុវត្តគោលនយោបាយបញ្ចកោណដំណាក់កាលទី១ របស់រាជរដ្ឋាភិបាល ក្រោមកិច្ចដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ឱ្យទទួលបានសម្រេចជោគជ័យ ដើម្បីបម្រើដល់ផលប្រយោជន៍របស់ប្រជាពលរដ្ឋ។ ហើយក៏សូមវាយតម្លៃខ្ពស់ពីការចំណូលចំណាយរបស់រដ្ឋបាលខេត្ត លើការទ្រទ្រង់គ្រប់វិស័យក្នុងការអភិវឌ្ឍខេត្ត។
ឯកឧត្តមបានបញ្ជាក់ថា ដើម្បីធានាសម្រេចឱ្យបាននូវគោលដៅអភិវឌ្ឍន៍សំខាន់ៗ ដែលមានចែងក្នុងរបៀបវារៈគោលនយោបាយនៅក្នុងឆ្នាំដំបូង នៃរដ្ឋាភិបាលនីតិកាលទី៧ រាជរដ្ឋាភិបាលត្រូវបង្កើនការវិនិយោគ និងបង្កើតតម្លៃបន្ថែមលើមូលដ្ឋានកំណើន សេដ្ឋកិច្ចដែលមានស្រាប់ ជាមួយនឹងការជំរុញឱ្យមានការវិនិយោគទៅលើប្រភពថ្មីនៃកំណើនដែលមានសក្ដានុពលសេដ្ឋកិច្ច សំដៅធ្វើការអភិវឌ្ឍខេត្តលើគ្រប់ហេដ្ឋារចនាសម្ព័ន្ធ សមស្របជាខេត្តគោលដៅទេសចរណ៍ វប្បធម៌ធម្មជាតិប្រវត្តិសាស្ត្រ៕
អត្ថបទ និងរូបភាព៖ លោក ម៉ី សុខារិទ្ធ, ទ្រា ពន្លឺ
កែសម្រួល៖ លោក អ៊ុន ណារាជ្យ
