នៅរសៀលថ្ងៃទី១២ ខែកញ្ញា ឆ្នាំ២០២៤ នៅសាលប្រជុំលេខ១ រដ្ឋបាលខេត្តសៀមរាប លោក អ៊ឹង គឹមលាង អភិបាលរងខេត្តសៀមរាប បានដឹកនាំមន្ទីរស្ថាប័នពាក់ព័ន្ធ ជួបប្រជុំជាមួយក្រុមការងាររបស់សមាគមខ្មែរនៃសេដ្ឋកិច្ចក្រៅប្រព័ន្ធ ដើម្បីពិនិត្យអំពីការអនុវត្តសកម្មភាពការងាររបស់សមាគមសេដ្ឋកិច្ចក្រៅប្រព័ន្ធក្នុងខេត្តសៀមរាប។
លោកប្រាក់ សារ៉ាន់ អនុប្រធានសមាគមខ្មែរនៃសេដ្ឋកិច្ចក្រៅប្រព័ន្ធ បានមានប្រសាសន៍ថា សមាគមសមាគមខ្មែរនៃសេដ្ឋកិច្ចក្រៅប្រព័ន្ធ ទទួលបានការអនុញ្ញាតឲ្យធ្វើសកម្មភាពពីក្រសួងមហាផ្ទៃកាលពីអំឡុងខែមេសាឆ្នាំ២០២៤។ លោកថា សមាគមបង្កើតឡើង ដោយមិនបម្រើបក្សនយោបាយ ឬបុគ្គលណា ក្រុមណាមួយនោះទេ ប៉ុន្តែការបង្កើតឡើងនេះដើម្បីប្រមូលបងប្អូនដែលជាអ្នកប្រកបរបររត់ម៉ូតូឌុប រត់រ៉ឺម៉ក អ្នករើសអេតចាយ ក៏ដូចជាអាជីវករតូចៗទាំងអស់ ឲ្យពួកគាត់ចូលជាសមាជិក ដើម្បីងាយស្រួលនៅក្នុងការផ្សព្វផ្សាយពីគោលនយោបាយរបស់រាជរដ្ឋាភិបាល ក៏ដូចជាជួយគ្នាទៅវិញទៅមកក្នុងគ្រាដែលមានគ្រោះអាសន្ន។
ព័ត៌មានជាតិ ថ្មីៗ
មានប្រសាសន៍នៅក្នុងកិច្ចប្រជុំនេះ លោក អ៊ឹង គឹមលាង អភិបាលរងខេត្ត បានសម្តែងនូវការស្វាគមន៍យ៉ាងកក់ក្តៅចំពោះសមាគមខ្មែរនៃសេដ្ឋកិច្ចក្រៅប្រព័ន្ធ ដែលមានឆន្ទៈនៅក្នុងការជួយដល់បងប្អូនដែលជាសមាជិករបស់ខ្លួន ក៏ដូចជាការរួមចំណែកជាមួយរាជរដ្ឋាភិបាលនៅក្នុងការកាត់បន្ថយភាពក្រីក្រ។ លោកថា ប៉ុន្តែដើម្បីឲ្យសមាគមដំណើរការអនុវត្តការងារដោយរលូន សមាគមត្រូវពិនិត្យមើលលើផ្នែកច្បាប់ និងលិខិតបទដ្ឋាននានាមួយចំនួនបន្ថែមទៀត ដែលវាជាផ្នែកមួយជួយដល់សមាគមគេចផុតពីការចោទប្រកាន់នានាពីមជ្ឈដ្ឋានខាងក្រៅ ឬធ្លាក់ចូលក្នុងអន្ទាក់នយោបាយរបស់ក្រុមបក្សណាមួយ៕
អត្ថបទ និងរូបភាព ៖ ជា ស្រស់
កែសម្រួល ហាំ ម៉េងហួត
