មានប្រសាសន៍ក្នុងកិច្ចប្រជុំបូកសរុបលទ្ធផលការងារកិច្ចប្រតិបត្តិការរក្សាសន្តិសុខសុវត្ថិភាពនិងសណ្តាប់សង្គមប្រចាំសប្តាហ៍របស់កងកម្លាំងនគរបាល កាលពីព្រឹកថ្ងៃទី១៤ ខែសីហា ឆ្នាំ២០១៨នេះ លោកឧត្តមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្ត បានលើកឡើងថា ជាមួយនឹងការខិតខំប្រឹងប្រែង ក្នុងការអនុវត្តន៍នូវតួនាទីភារកិច្ចជំនាញរបស់ខ្លួន ក្នុងការរក្សាសន្តិសុខ សុវត្ថិភាព និងសណ្តាប់ធ្នាប់នារយៈកាលកន្លងមកនេះ បានយ៉ាងល្អប្រសើរជូនដល់ប្រជាពលរដ្ឋក៏ពិតមែន ប៉ុន្តែការងាររបស់យើងមិនអាចបញ្ឈប់ត្រឹមនេះនោះទេ ផ្ទុយទៅវិញសូមឲ្យកម្លាំងពាក់ព័ន្ធទាំងអស់ ត្រូវបង្កើនការយកចិត្តទុកដាក់បន្ថែមទៀត ក្នុងការផ្តល់អត្តសញ្ញាណប័ណ្ឌសញ្ជាតិខ្មែរគំរូថ្មី សៀវភៅស្នាក់នៅសៀវភៅគ្រួសារជូនប្រជាពលរដ្ឋ បង្កើនការល្បាតត្រួតពិនិត្យអាវុធជាតិផ្ទុះ ការផ្សព្វផ្សាយគោលនយោបាយភូមិឃុំមានសុវត្ថិភាព និង ជំរុញចលនាប្រជាការពារភូមិឃុំ ក្នុងការបង្ការ ទប់ស្កាត់និងបង្រ្កាបរាល់បទល្មើសគ្រប់ប្រភេទ ដើម្បីរក្សាបាននូវសន្តិសុខ សុវត្ថិភាពនិងសណ្តាប់ធ្នាប់សង្គមឲ្យបានល្អ ។
ជាមួយគ្នានេះដែរ លោកស្នងការនគរបាលខេត្ត បានណែនាំដល់កងកម្លាំងនគរបាលទាំងអស់ ត្រូវបន្តខិតខំប្រឹងប្រែង ហាត់ពត់លត់ដំ សិក្សារៀនសូត្រនូវជំនាញ និងគោរពនូវវិន័យ ការចាត់តាំង ក្រមសីលធម៌វិជ្ជាជីវៈជានគរបាលជាតិ ពិសេសត្រូវមានសាមគ្គីភាពឯកភាពផ្ទៃក្នុងល្អ ទើបឈានទៅសម្រេចជោគជ័យលើការងារបានល្អប្រសើរនិងមានតម្លាភាព ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
