ក្នុងកម្មវិធីសន្ទនាមតិរបស់វិទ្យុ និងទូរទស្សន៍ជាតិខេត្តសៀមរាប នៅថ្ងៃទី២៦ ខែកញ្ញា ឆ្នាំ២០២៤នេះ លោក មាស ឫទ្ធីរ៉ាថេត មន្ត្រីនៃមន្ទីរវប្បធម៌ និងវិចិត្រ សិល្បៈខេត្តសៀមរាប បានអំពាវនាវដល់ប្រជាពលរដ្ឋគ្រប់រូបចូលរួមថែរក្សាវប្បធម៌ខ្មែរ តាមរយៈការស្វែងយល់ពីប្រពៃណី និងទំនៀមទម្លាប់ខ្មែរឱ្យច្រើន ដើម្បីជួយអភិវឌ្ឍប្រទេសជាតិឱ្យកាន់តែរឹងមាំនាពេលអនាគត តម្កល់វប្បធម៌ទុកសម្រាប់ជំនាន់ក្រោយ ជាក់ស្ដែងប្រពៃណី ទំនៀមទម្លាប់នៃពិធីបុណ្យភ្ជុំបិណ្ឌដែលកំពុងប្រារព្ធឡើងនាពេលនេះ។
លោក មាស ឫទ្ធីរ៉ាថេត លើកឡើងថា ក្នុងបរិបទនៃសង្គមសម័យទំនើប បុណ្យភ្ជុំបិណ្ឌ ជាពិធីប្រពៃណីមួយដែលមានសារៈសំខាន់ ក្នុងការតភ្ជាប់ និងរក្សាទំនាក់ទំនងជាមួយវប្បធម៌ជាតិដែលមានមកជាយូរពីបុរាណកាល។ ពិធីបុណ្យនេះដែរ មិនត្រឹមតែជាការបង្ហាញពីការគោរពទៅដល់គ្រួសារ សាច់ញាតិ តែប៉ុណ្ណោះទេ តែជាការបញ្ជាក់ពីអត្តសញ្ញាណវប្បធម៌សម្រាប់ជាតិ បង្ហាញពីវប្បធម៌ទំនៀមទម្លាប់ប្រពៃណីរបស់ខ្មែរយើងដែលមានតាំងពីបុរាណកាល មកដល់បច្ចុប្បន្ន។ យ៉ាងណាបច្ចុប្បន្ន លោកសង្កេតឃើញថា ប្រជាពលរដ្ឋមានការគាំទ្រច្រើនពីវប្បធម៌ជាតិ ប៉ុន្តែហាក់ដូចជានៅខ្វះពីការស្វែងយល់បន្ថែមពីវប្បធម៌ ទំនៀមទម្លាប់យើង ហើយមានខ្លះចូលរួមដោយខ្វះការយល់ដឹងគ្រប់គ្រាន់ អាចនាំឱ្យទៅជាការបំផ្លាញនូវប្រពៃណី ទំនៀមទម្លាប់ និងវប្បធម៌យើងទៅវិញ។
ក្នុងនោះ លោកសំណូមពរដល់ប្រជាពលរដ្ឋ ពិសេសយុវជនជំនាន់ក្រោយ គួរចូលរួមស្វែងយល់ពីវប្បធម៌ ប្រពៃណី ទំនៀមទម្លាប់ និងពិធីបុណ្យជាតិផ្សេងៗរបស់ខ្មែរយើងឱ្យបានច្រើន ដូចជា៖ ការគោរព សំពះ និងការស្លៀកពាក់ឱ្យបានត្រឹមត្រូវ ដើម្បីបញ្ជាក់ពីអត្តសញ្ញាណវប្បធម៌របស់ជាតិខ្មែរយើង៕
អត្ថបទ៖ លោក ឡេង ពិសិដ្ឋ
កែសម្រួល៖ លោក អ៊ុន ណារាជ្យ
