មានរយៈពេលតែមួយថ្ងៃប៉ុណ្ណោះ ហើយក៏ជាឆ្នាំដំបូងផងដែរ ដែលរដ្ឋបាលខេត្តសៀមរាប សហការជាមួយ សហភាពសហព័ន្ធយុវជនកម្ពុជា ខេត្តសៀមរាប កាកបាទក្រហមកម្ពុជា សាខាខេត្តសៀមរាប និងសមាគមចុងភៅកម្ពុជា ខេត្តសៀមរាប ដើម្បីអបអរពិធីបុណ្យភ្ជុំបិណ្ឌផង និងជាការរំលឹកនូវអនុស្សាវរីយ៍ ដែលប្រទេសកម្ពុជាបានវេចអន្សមយក្ស និងជាប់ World Guiness Record នៅឆ្នាំ២០១៥ផងដែរ។
មានប្រសាសន៍ នៅសួនច្បារព្រះរាជដំណាក់ ក្រុងសៀមរាប ព្រឹកថ្ងៃទី២៨ ខែកញ្ញា ឆ្នាំ២០២៤នេះ លោក សំកុល សុចិត្រា អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលខេត្តសៀមរាប និងជាអនុប្រធានសហភាព សហព័ន្ធយុវជនកម្ពុជា ខេត្តសៀមរាប បញ្ជាក់ថា ពិធីវេចនំអន្សម យុវជនខេត្តសៀមរាបនាពេលនេះ មានការផ្ដួចផ្ដើមពីសំណាក់ ឯកឧត្តម អភិបាលខេត្ត ដែលចង់ឱ្យសាធារណជន ជាពិសេសយុវជន បានយល់ដឹង និងចេះវេចនំអន្សម ដែលជាអត្តសញ្ញាណជាតិ ក៏ដូចចង់បង្ហាញទៅកាន់ភ្ញៀវទេសចរ ដែលបានមកលេងខេត្តសៀមរាប យល់ដឹងពីវប្បធម៌ ប្រពៃណី និងជីវភាពរស់នៅរបស់ប្រជាជនកម្ពុជាផងដែរ។ លោក បន្ថែមថា នៅឆ្នាំក្រោយៗ រដ្ឋបាលខេត្ត នឹងបន្តរៀបចំព្រឹត្តិការណ៍នេះឱ្យកាន់សប្បាយរីករាយបន្ថែមទៀត ដែលមានយុវជនមកពីបណ្ដាក្រុងស្រុកទាំង១៣ ធ្វើការប្រកួតប្រជែងវេចនំអន្សមជាដើម។
ពិធីនេះដែរ រដ្ឋបាលខេត្ត បានលើកទឹកចិត្តដល់សាធារណជនទូទៅ ចូលរួមវេចនំអន្សម និងទទួលទាននំខ្មែរ ដោយឥតគិតថ្លៃ និងគ្រោងនឹងវេចនំខ្មែរចម្រុះសរុបចំនួន ៤ ០០០នំ។ ក្នុងនោះ នំដែលបានវេច និងចម្អិនរួច នឹងធ្វើការប្រគេនតាមទីវត្តអារាម និងចែកជូនទៅដល់មណ្ឌលកុមារកំព្រាមួយចំនួន ក្នុងខេត្ត។
អត្ថបទ ៖ មន្ទីរព័ត៌មានខេត្តសៀមរាប
