អាជ្ញាធរខេត្តសៀមរាប និងវិស័យឯកជន នៅថ្ងៃទី២៧ ខែកញ្ញា ឆ្នាំ២០២៤នេះ បាននឹងរៀបចំពិធីដង្ហែក្បួនអបអរទេសចរណ៍ពិភពលោកលើកទី២ ក្រោមប្រធានបទ “ទេសចរណ៍ និងសន្តិភាព” ដោយមានអ្នកចូលរួមប្រមាណជិត ២.០០០នាក់។
លោក ហ្វីលីព សែតកៅ ប្រធានសមាគមក្លឹបទេសចរណ៍សៀមរាប បានដឹងថា ការដង្ហែនេះ គឺដើម្បីជាជំរុញដល់ក្រុមហ៊ុនទេសចរ ក៏ដូចជាប្រតិបត្ដិករទេសចរក្នុងខេត្ដមួយនេះ ឱ្យបញ្ចុះតម្លៃសេវាកម្មទេសចរ ទាំងការស្នាក់នៅ ការធ្វើដំណើរ និងថ្លៃម្ហូបអាហារ ពេញមួយខែកញ្ញានេះ ដើម្បីឱ្យអ្នកទេសចរមកទស្សនាខេត្ដសៀមរាប កាន់តែច្រើននៅរដូវវស្សា ដោយដង្ហែបានក្បួនចេញពីសួនច្បារព្រះរាជដំណាក់ ឆ្ពោះទៅតាមផ្លូវសំខាន់ៗមួយចំនួនក្នុងក្រុងសៀមរាប។ លោកបន្តថា ព្រឹត្ដិការណ៍នេះ មានក្រុមហ៊ុនជាតិ និងអន្ដរជាតិចូលរួមប្រមាណ ៦០ផ្នែក ព្រមទាំងបានបញ្ចុះតម្លៃសេវាកម្មទេសចរណ៍ផងដែរ។ លោកថា ការអបអរទិវាពិភពលោកនេះ ក្រោមប្រធានបទ ទេសចរណ៍និងសន្ដិភាព បើគ្មានសន្ដិភាព ក៏គ្មានទេសចរដែរ។
ក្នុងសារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងឱកាសអបអរសាទរទិវាទេសចរណ៍ពិភពលោក ឆ្នាំ២០២៤ ដែលអានដោយ លោក ង៉ូវ សេងកាក់ អភិបាលរងខេត្ត បានបញ្ជាក់ថា ក្នុងនាមរាជរដ្ឋាភិបាល នីតិកាលទី៧ និងជនរួមជាតិកម្ពុជាទាំងមូល សម្តេច សូមសម្ដែងនូវការអបអរសាទរ និងគាំទ្រយ៉ាងស្មោះស្ម័គ្រចំពោះអង្គការទេសចរណ៍សហប្រជាជាតិ (UN Tourism) ក៏ដូចជាបណ្តាប្រទេស រដ្ឋជាសមាជិក អង្គការជាតិ អន្តរជាតិ និងដៃគូអភិវឌ្ឍនានា ដែលបានយកចិត្តទុកដាក់ខ្ពស់និងទទួលខុសត្រូវលើការអភិវឌ្ឍ កសាង ពិសេសកិច្ចសហប្រតិបត្តិការភាពជាដៃគូ ជាមួយគ្រប់ស្ថាប័ន ដោយផ្តោតទៅលើតួនាទីយ៉ាងសំខាន់នៃកម្លាំងអានុភាពរបស់វិស័យទេសចរណ៍ ក្នុងការជំរុញឱ្យមាននូវឱកាសការងារ ឱកាសនៃការអភិវឌ្ឍសេដ្ឋកិច្ចសង្គម និងឱកាសធ្វើឱ្យជីវភាពរស់នៅកាន់តែប្រសើរឡើងសម្រាប់យើងទាំងអស់គ្នាឆ្ពោះទៅរកការកាត់បន្ថយភាពក្រីក្រជាបណ្តើរៗ និងជាពិសេសបានរួមវិភាគទានយ៉ាងសំខាន់ក្នុងការការពារ និងអភិរក្សធនធានធម្មជាតិ ក៏ដូចជាវប្បធម៌ ប្រពៃណី សាសនា ទំនៀមទម្លាប់របស់យើងទាំងអស់គ្នា ឈានទៅរកសង្គមមួយមានសុខដុមនីយកម្ម ការយោគយល់គ្នា និងប្រកបទៅដោយការស្រឡាញ់ និងគាំទ្រសន្តិភាពពីគ្រប់ស្រទាប់មហាជនដែលសមស្របទៅនឹងប្រធានបទទិវាទេសចរណ៍ពិភពលោកឆ្នាំ២០២៤ «ទេសចរណ៍ និងសន្តិភាព»៕
ព័ត៌មានជាតិ ថ្មីៗ
អត្ថបទ និងរូបភាព៖ លោក យូ វង្ស, បូ សាវី
កែសម្រួល៖ លោក អ៊ុន ណារាជ្យ
