ស្របតាមអនុសាសន៍របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា នៅព្រឹកថ្ងៃទី១៦ ខែកញ្ញា ឆ្នាំ២០២៤ បានរៀបចំរថយន្តក្រុងចំនួន៦៥៣គ្រឿង ដើម្បីជូនដំណើរបងប្អូនប្រជាពលរដ្ឋទូទៅដោយឥតគិតថ្លៃ ក្នុងការធ្វើដំណើរទៅជួបជុំគ្រួសារនៅស្រុកកំណើត តាមបណ្ដាខេត្តនានា។ ក្នុងនោះរថយន្តក្រុងពីរាជធានីភ្នំពេញ ឆ្ពោះមកកាន់ខេត្តសៀមរាប មានចំនួនសរុប ១៣៥គ្រឿងបានធ្វើដំណើរមកដល់ចំណតក្នុងបរិវេណមណ្ឌលមន្ទីររដ្ឋបាលខេត្តសៀមរាប ជាបន្តបន្ទាប់ ដែលរៀបចំដោយអាជ្ញាធរខេត្តសៀមរាប នៅប្រមាណម៉ោង១រសៀល ថ្ងៃទី២៩ ខែកញ្ញា ឆ្នាំ២០២៤។
បើតាមប្រជាពលរដ្ឋដែលបានធ្វើដំណើរពីរាជធានីភ្នំពេញ មកកាន់ខេត្តសៀមរាប បានលើកឡើងថា ការធ្វើដំណើរដោយរថយន្តក្រុងរបស់រាជរដ្ឋាភិបាលនេះ មានសុវត្តិភាព ជាពិសេសបានកាត់បន្ថយចំណាយ៉ាងច្រើន ខណៈសេវាដឹកជញ្ជូនឯកជនមានតម្លៃថ្លៃ។ ការឡើងជិះរថយន្តមានភាពងាយ ពុំមានតម្រូវបំពេញបែបបទអ្វីទាំងអស់ គ្រាន់តែប្រាប់អ្នករៀបចំថាយើងចង់ទៅខេត្តណា។ មួយវិញទៀត អ្នកបើកបរមានភាពរួសរាយរាក់ទាក់ រថយន្តមានម៉ាស៊ីនត្រជាក់ និងមានភេសជ្ជចែកជូនថែមទៀត ប្រកបដោយផាសុខភាព។
ព័ត៌មានជាតិ ថ្មីៗ
តាមការបញ្ជាក់ពីអ្នកបើកបររថយន្តក្រុង រថយន្តដែលបានធ្វើដំណើរមកនេះបានបង្ហាញថា ការចេញដំណើរពីរាជធានីទៅតាមបណ្ដាខេត្តនានា នៅថ្ងៃបិណ្ឌទី១២នេះ គឺមានចំនួនច្រើន ខណៈដែលថ្ងៃដំបូងនេះមានការចេញដំណើរពីភ្នំពេញមកសៀមរាប រហូតដល់ទៅជាង ៤០គ្រឿង ដើម្បីបំពេញតម្រូវការបងប្អូនជាពលរដ្ឋយើងមកលេងស្រុកកំណើត ជាពិសេសការមកកំសាន្តនៅខេត្តសៀមរាប។ ជាមួយគ្នានោះការធ្វើដំណើរនេះដែរ សម្រាប់អ្នកបើកបរ រដ្ឋបាលក្រុងបានធ្វើការណែនាំរួចជាស្រេចមុននឹងចេញដំណើរ ត្រូវប្រុងប្រយ័ត្នខ្ពស់ ហើយមិនត្រូវមានសេពគ្រឿងស្រវឹង និងត្រូវសម្រាកឲ្យបានគ្រប់គ្រាន់ផងដែរ។ ក្នុងនោះដែរ លោកក៏សូមការអំពាវនាវទៅដល់បងប្អូនដែលបានទទួលសេវា សូមជួយរក្សាអនាម័យ តាមរយៈការទុកដាក់សម្រាមឲ្យបានត្រឹមត្រូវ។ ដោយឡែកក៏សូមអំពាវនាវដល់បងប្អូនដែលបានធ្វើដំណើរលើដងផ្លូវទាំងអស់ សូមមានការយោគយល់ និងអធ្យាស្រ័យគ្នាពេលធ្វើសំណើរ ដើម្បីចៀសផុតពីគ្រោះថ្នាក់ចរាចរណ៍។
តាមរយៈការផ្ដល់ជូនមធ្យោបាយធ្វើដំណើរសាធារណៈ ដោយមិនគិតថ្លៃនេះ ដែលមានរយៈពេល៦ថ្ងៃគិតចាប់ពីថ្ងៃទី២៩ ខែកញ្ញា ដល់ថ្ងៃទី០៤ ខែតុលា ឆ្នាំ២០២៤នេះ ប្រជាពលរដ្ឋបានសាទរ និងថ្លែងអំណរគុណដល់រាជរដ្ឋាភិបាល ជាពិសេសសម្ដេចធិបតី ហ៊ុន ម៉ាណែត ដែលតែងតែគិតគូរពីសុខទុក្ខប្រជាពលរដ្ឋគ្រប់កាលៈទេសៈ៕ជាមួយគ្នានោះក៏សូមអំពាវដល់ប្អូនមកទទួលយកសេវាធ្វើដំណើរដោយឥតគិតថ្លៃនេះឲ្យបានគ្រប់ៗគ្នា ប៉ុន្តែសូមរក្សាឲ្យបាននូវសណ្ដាប់ធ្នាប់របៀបរាប់រយឲ្យបានល្អប្រសើរផងដែរ៕
អត្ថបទ និងរូបភាព ៖ ប្រន ស្រីនីត ស៊ុំ គីន
កែសម្រួល ៖ ហាំ ម៉េងហួត
