កម្មវិធីទិវាជួបអាណាព្យាបាលសិស្ស និងពិព័រណ៍ស្នាដៃសិស្សប្រចាំឆ្នាំ២០២៤ របស់កម្មវិធី សាលារៀនជំនាន់ថ្មី (NGS)ដើម្បីបង្ហាញជូនដល់សហគមន៍ និងឪពុកម្ដាយ សិស្សនូវលទ្ធផលការងារដែលបានអនុវត្តមួយឆ្នាំសិក្សាកន្លងមក ផ្ដល់ឱកាសឱ្យសិស្សបានបញ្ចេញសមត្ថភាព និងបង្ហាញស្នាដៃដែលពួកគេបានខិតខំសិក្សាស្រាវជ្រាវរយៈពេល១ឆ្នាំ ដែលបានផ្សារភ្ជាប់ទំនាក់ទំនងរវាងសាលារៀន អាណាព្យាបាលសិស្ស និងសហគមន៍ ផ្សព្វផ្សាយឱ្យអាណាព្យាបាល និងសហគមន៍ បានយល់ដឹងអំពីកម្មវិធីសាលារៀនជំនាន់ថ្មី។
កម្មវិធីនេះធ្វើថ្ងៃទី២៧ ខែកញ្ញា ឆ្នាំ២០២៤នេះ នៅអនុវិទ្យាល័យអរញ្ញរង្សី ឃុំកណ្ដែក ស្រុកប្រាសាទបាគង ខេត្តសៀមរាប ក្រោមអធិបតី ឯកឧត្តម ឡោ ឆវណ្ណា អនុរដ្ឋលេខាធិការ ក្រសួងអប់រំ យុវជន និងកីឡា និងតំណាងមន្ទីរ អប់រំ យុវជន និងកីឡា លោកគ្រូ អ្នកគ្រូ មាតាបិតាអាណាព្យាបាល និងសិស្សានុសិស្ស ជាច្រើនរូប។
លោក ព្រឿន ប្រុញ នាយកសាលាអនុវិទ្យាល័យអរញ្ញរង្សី បានឲ្យដឹងថា មានសិស្សចំនួន៤៨០នាក់ ចាប់ពីថ្នាក់ទី៧ ដល់ថ្នាក់ទី៩ ក្នុងនោះសិស្សថ្នាក់ទី៧ចំនួន២០១នាក់ ជាថ្នាក់ដែលបានអនុវត្តកម្មវិធីសាលារៀនជំនាន់ថ្មី។ ដោយឆ្នាំសិក្សា២០២៣- ២០២៤ជាឆ្នាំទី១ ដែលអនុវិទ្យាល័យអរញ្ញរង្សី អនុវត្តកម្មវិធីសាលារៀនជំនាន់ថ្មី នៅកម្រិតសិស្សថ្នាក់ទី៧ មានក្លឹបសិក្សា សរុបចំនួន២២ក្លឹប។ ពិព័រណ៍ស្នាដៃដែលសិស្សបានបង្ហាញទាំង៤៥គម្រោង តាំងបង្ហាញពេលនេះ បញ្ជាក់ពីការរៀន និងបង្រៀនក្នុងបរិបថថ្មី ដែលផ្សាភ្ជាប់រវាង វិជ្ជាសម្បទា ទៅនឹងការអនុវត្តជាក់ស្តែង ដែលនៅពី ក្រោយស្នាដៃនេះគឺសិស្សបានអភិវឌ្ឍនូវបំណិនសម្បទា និងចរិយាសម្បទា ដូចជាបំណិនសម្រាប់ការសិក្សា បំណិនសម្រាប់ការពង្រឹងសមត្ថភាពផ្ទាល់ខ្លួន បំណិនសម្រាប់ការងារ បំណិនសម្រាប់ភាពជាពលរដ្ឋ។
ឯកឧត្តម ឡោ ឆវណ្ណា អនុរដ្ឋលេខាធិការ ក្រសួងអប់រំ យុវជន និងកីឡាមានប្រសាសន៍ថាកម្មវិធីទិវាជួបអាណាព្យាបាលសិស្ស និងពិព័រណ៍ស្នាដៃសិស្ស គឺស្របតាមកំណែទម្រង់វិស័យអប់រំ យុវជន និងកីឡា ដែលរាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដែលចាត់ទុកការអភិវឌ្ឍមូលធនមនុស្សជាអាទិភាពទី១ ក្នុងការពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យា ព្រោះថាធនធាមនុស្សជាកត្តាកំណត់ សង្គមសេដ្ឋកិច្ច និងការប្រកួតប្រជ្រែង។ កម្មវិធីសាលារៀនជំនាន់ថ្មី គឺជាបរិបទថ្មីក្នុងកំណែទម្រង់វិស័យអប់រំ ដែលអ្នកអនុវត្តទាំងអស់ រៀនបណ្ដើរ អនុវត្តបណ្ដើរ បើសិនអនុវត្តទៅជួបបញ្ហារទាមទារការកែលម្អ ទាំងនេះក៏ទាមទារការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំ ស្របតាមពាក្យស្លោកភាពជាដៃគូ រដ្ឋ និងសហគមន៍ ដើម្បីការអប់រំ។
ព័ត៌មានជាតិ ថ្មីៗ
អត្ថបទនិងរូបភាព : ធន់ ពូថេ
កែសម្រួល: ហាំ ម៉េងហួត
