អង្គការទិន្នន័យអំពីការអភិវឌ្ឍ (ODC) និងដៃគូពាក់ព័ន្ធ បានសហការរៀបចំកម្មវិធីកម្ពុជាអាយស៊ីធីខែម ២០២៤ រយៈពេល៣ថ្ងៃ ចាប់ពីថ្ងៃទី០៥-០៧ ខែធ្នូ ឆ្នាំ២០២៤ នៅខេត្តសៀមរាប ពិភាក្សាលើប្រធានបទ ស្ដីពីសន្ទស្សន៍សកលស្តីពីការប្រើប្រាស់បញ្ញាសិប្បនិម្មិតដោយទំនួលខុសត្រូវ ដែលមាន មានអ្នកចូលរួមមកពីវិស័យដែលពាក់ព័ន្ធ រួមមានប្រព័ន្ធផ្សព្វផ្សាយ និងសារព័ត៌មាន អង្គការសង្គមស៊ីវិល ការតស៊ូមតិផ្នែកសិទ្ធិឌីជីថល ច្បាប់ សិក្សាស្រាវជ្រាវឯកជន និងសាកលវិទ្យាល័យប្រមាណ ៣០០នាក់។
បើតាម លោក ធី ទ្រី នាយកប្រតិបត្តិអង្គការទិន្នន័យអំពីការអភិវឌ្ឍ (ODC) និងជាសមាជិកក្រុមប្រឹក្សាយោបល់កម្មវិធីកម្ពុជាអាយស៊ីធីខែម ២០២៤ បានបញ្ជាក់ថា កម្មវិធីនេះធ្វើឡើងរៀងរាល់២ឆ្នាំម្តង ហើយនេះជាលើកទី៣ ខណៈលើកទី១នៅឆ្នាំ២០១៧, លើកទី២ នៅឆ្នាំ២០១៨ និងលើកទី៣ នៅឆ្នាំ២០២២ ដែលកម្មវិធីទាំង ៣លើក រៀបចំឡើងក្នុងខេត្តសៀមរាប ផ្តោតអ្នកចូលរួម និងប្រធានពិភាក្សាជាពិសេសកម្រិតថ្នាក់ជាតិ។
លោក ធី ទ្រី បន្តថា កម្ពុជាអាយស៊ីធីខែម ២០២៤ មានគោលបំណងលើកកម្ពស់ការយល់ដឹងអំពីឱកាស និងការប្រឈមនានានៅក្នុងការធ្វើបរិវត្តកម្មឌីជីថលនៅក្នុងប្រទេសកម្ពុជា ដែលរាជរដ្ឋាភិបាលកម្ពុជា បាននិងកំពុងអនុវត្តដើម្បីអភិវឌ្ឍប្រទេសកម្ពុជាឱ្យក្លាយទៅជាសង្គមសេដ្ឋកិច្ច និងឌីជីថល។ ចូលរួមពង្រឹងអក្ខរកម្មឌីជីថលសម្រាប់ប្រជាជនកម្ពុជា ដោយធ្វើការបង្ហាញ ឬបណ្ដុះបណ្ដាលអ្នកចូលរួមអំពីជំនាញបច្ចេកទេស និងចំណេះដឹងមួយចំនួនដែលមានសារៈសំខាន់ដើម្បីរក្សាសុវត្ថិភាពលើប្រព័ន្ធអ៊ីនធឺណិត និងការពារឯកជនភាព និងសុវត្ថិភាព។ បង្កើតឱ្យមានការពិភាក្សាទៅលើឱកាស និងការប្រឈមនៃបច្ចេកវិទ្យាថ្មីៗនៅប្រទេសកម្ពុជា និងបណ្ដាប្រទេសផ្សេងទៀតនៅតំបន់មេគង្គ សម្របសម្រួលឱ្យមានការបង្កើតនូវដំណោះស្រាយច្នៃប្រឌិតដែលប្រើប្រាស់ឧបករណ៍បច្ចេកវិទ្យាក្នុងការដោះស្រាយបញ្ហារបស់សហគមន៍។
ឯកឧត្តម សំ សិទ្ធិសេរី អគ្គនាយកនៃអគ្គនាយកដ្ឋានបច្ចេកវិទ្យា គមនាគមន៍ និងព័ត៌មាន ក្រសួងប្រៃសណីយ៍ បានជំរុញឱ្យយុវជន ក្រៅពីពីជំនាញដែលខ្លួនស្រឡាញ់ គួរចាប់យកបន្ថែមមួយទៀតលើជំនាញមូលដ្ឋានគ្រឹះនៃឌីជីថល ឬហៅម្យ៉ាងទៀតថា អក្ខរកម្មឌីជីថល ដើម្បីជួយឱ្យយើងក្លាយជាយុវជនសម័យឌីជីថលពេញលេញ ហើយយើងអាចប្រើប្រាស់ប្រព័ន្ធឌីជីថលឱ្យបានត្រឹមត្រូវ យើងអាចស្រាវជ្រាវពីព័ត៌មានពិត និងល្អប្រសើរផងដែរ៕
អត្ថបទ និងរូបភាព៖ លោក ហេង វន្នី
កែសម្រួល៖ លោក អ៊ុន ណារាជ្យ
