កម្ពុជា-ចិន នឹងសហការរៀបចំពិព័រណ៍ទេសចរណ៍ កម្ពុជា-ចិន រយៈពេល៣ថ្ងៃ នៅលើទឹកដីនៃខេត្តសៀមរាប ដែលពិព័រណ៍នេះនឹងបើកជាផ្លូវការ នៅរសៀលថ្ងៃទី០៦ ខែធ្នូ ឆ្នាំ២០២៤ ក្រោមអធិបតីភាពរបស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍កម្ពុជា ដោយមានការអញ្ជើញចូលរួមពីឯកឧត្តម វ៉ាង វិនពិន (Wang Wenbin) ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជា គណៈអភិបាលខេត្តសៀមរាប ឯកឧត្តមលោកជំទាវ ថ្នាក់ដឹកនាំក្រសួងពាក់ព័ន្ធ ឯកអគ្គរដ្ឋទូត ឯកអគ្គរាជទូតនៃបណ្តាប្រទេសជាមិត្ត និងភាគីពាក់ព័ន្ធជាច្រើនទៀត។
បើតាមសេចក្តីប្រកាសព័ត៌មានរបស់ក្រសួងទេសចរណ៍កម្ពុជា ការជ្រើសរើសយកខេត្តសៀមរាប ធ្វើជាម្ចាស់ផ្ទះទទួលរៀបចំ “ពិព័រណ៍ទេសចរណ៍កម្ពុជា-ចិន”នេះ គឺដើម្បីជំរុញការអនុវត្តយុទ្ធនាការ “ឆ្នាំទស្សនាសៀមរាប ២០២៤” និង “ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤” ដែលនឹងរួមចំណែកធ្វើឱ្យវិស័យទេសចរណ៍កម្ពុជា ជាពិសេសធ្វើឱ្យកំណើនទេសចរនៅខេត្តសៀមរាប កាន់តែមានសន្ទុះឡើងវិញក្រោយវិបត្តិជំងឺកូវីដ-១៩។
ពិព័រណ៍ទេសចរណ៍ កម្ពុជា-ចិន (Cambodia-China Travel Fair) មានគោលបំណងធំៗចំនួន ៤គឺ៖ ទី១.ជំរុញការផ្សព្វផ្សាយសក្តានុពលទេសចរណ៍កម្ពុជាឱ្យកាន់តែទូលំទូលាយទៅកាន់ទីផ្សារចិន, ទី២.ឱកាសបង្កើតធុរកិច្ចទាក់ទាញវិនិយោគគិនចិន ប្រតិបត្តិករទេសចរណ៍ តាមរយៈព្រឹត្តិការណ៍ ទេសចរណ៍នៅកម្ពុជា ទី៣.រៀបចំទស្សនៈកិច្ច (Pre-Post Tour) ជំរុញការផ្សព្វផ្សាយសក្តានុពល និងផលិតផលទេសចរណ៍កម្ពុជា និង៤.ពង្រឹង និងពង្រីកទំនាក់ទំនង និងកិច្ចសហប្រតិបត្តិការល្អក្នុងវិស័យទេសចរណ៍រវាងផ្នែករដ្ឋ-ឯកជន ជាពិសេសជំរុញយុទ្ធនាការ “ឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន ២០២៤” និងយុទ្ធនាការ “ទស្សនាសៀមរាប ឆ្នាំ២០២៤”។
ព័ត៌មានជាតិ ថ្មីៗ
ពិព័រណ៍នេះ អ្នកទិញមកពីប្រទេសចិននឹងទៅទស្សនកិច្ចគោលដៅទេសចរណ៍សំខាន់ៗតាមរយៈកម្មវិធី Pre-tour និង Post-tour កម្មវិធីផ្គូផ្គងអាជីវកម្ម (Business Matching) រវាងវិនិយោគិនចិន-កម្ពុជា កម្មវិធីជំនួបរវាងអ្នកលក់ (Sellers) និងអ្នកទិញ (Buyers) កម្មវិធីសិក្ខាសាលាស្វែងយល់អំពីតម្រូវការ របស់ភ្ញៀវទេសចរចិន ដើម្បីពិភាក្សាផ្លាស់ប្តូរយោបល់ទៅលើកញ្ចប់សេវាកម្មទេសចរណ៍កម្ពុជា-ចិន សំដៅពង្រីកទំនាក់ទំនង និងកិច្ចសហការកាន់តែជិតស្និទ្ធថែមទៀតក្នុងវិស័យទេសចរណ៍រវាងរដ្ឋ និងឯកជន កម្ពុជា-ចិន ជាពិសេស បង្ហាញឱ្យភ្ញៀវទេសចរចិន និងទេសចរអន្តរជាតិ បានឃើញកាន់តែច្បាស់ថា ព្រះរាជាណាចក្រកម្ពុជាគឺពិតជាមានសុវត្ថិភាព សុខសន្តិភាព និងស្ថិរភាពនយោបាយពេញលេញ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
