សាខាកាកបាទក្រហមកម្ពុជាខេត្តសៀមរាប បានប្រារព្ធទិវាអន្តរជាតិនៃអ្នកស្ម័គ្រចិត្ត ៥ធ្នូ ឆ្នាំ២០២៤ ក្រោមប្រធានបទ “ការពារមនុស្សជាតិ” ក្រោមអធិបតីភាព លោកជំទាវ សុខ ណារ៉ូ ពៅហេង អនុប្រធានគណៈកម្មាធិការសាខា និងមានការចូលរួមពីគណៈកម្មាធិការអនុសាខា អ្នកស្ម័គ្រចិត្ត និងយុវជនកាកបាទក្រហមកម្ពុជា និងអ្នកពាក់ព័ទ្ធជាច្រើនរូបផងដែរ។
ប្រសាសន៍ក្នុងឱកាសនេះ លោកជំទាវ សុខ ណារ៉ូ ពៅហេង បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ប្រាក់ សោភ័ណ ប្រធានគណៈកម្មាធិការសាខា និងសូមចូលរួមអបអរ និងស្ងើចសរសើរចំពោះបងប្អូនអ្នកស្ម័គ្រចិត្ត និងយុវជនកាកបាទក្រហមកម្ពុជាខេត្តសៀមរាប តែងតែចូលរួមយ៉ាងសកម្មក្នុងសេវាកម្មមនុស្សធម៌ ដោយស្មារតីស្ម័គ្រចិត្ត និងទទួលខុសត្រូវ ក្នុងស្ថានភាពដែលបានជួបប្រទះផ្ទាល់ តាមរយៈការផ្តល់សេវាសង្គ្រោះបឋម ដល់ជនរងគ្រោះ ការអប់រំសុខភាពអនាម័យ និងការងារដែលមានប្រយោជន៍ ដល់សហគមន៍ និងសាលារៀនជាដើមផងដែរ។
លោកជំទាវបន្តថា ទិវាអន្តរជាតិនៃអ្នកស្ម័គ្រចិត្ត គឺជាការលើកកម្ពស់ការចូលរួមដោយស្ម័គ្រចិត្តក្នុងការងារមនុស្សធម៌របស់ចលនាអន្តរជាតិកាកបាទក្រហម អឌ្ឍចន្ទក្រហម ក្នុងនាមជាជំនួយការឱ្យអាជ្ញាធរសាធារណៈលើវិស័យមនុស្សធម៌។ សម្រាប់សាខាកាកបាទក្រហមកម្ពុជាខេត្តសៀមរាប នេះជាលើកទី៩ហើយ ដែលយើងប្រារព្ធពិធីនេះ គឺក្នុងគោលបំណងលើកទឹកចិត្ត ជំរុញការលើកកម្ពស់សកម្មភាពមនុស្សធម៌ ជូនចំពោះបងប្អូនអ្នកស្ម័គ្រចិត្ត និងក្មួយៗយុវជនកាកបាទក្រហមកម្ពុជាយើង ដែលខិតខំបំពេញការងាររយៈពេល១ឆ្នាំមកនេះ ដូចទិសស្លោកដែលលើកឡើងថា ”អ្នកស្ម័គ្រចិត្តកាកបាទក្រហមកម្ពុជា ជាឆ្អឹងខ្នងរបស់សមាគមជាតិ” និង ”យុវជនកាកបាទក្រហមកម្ពុជា ជាភ្នាក់ងារនៃការផ្លាស់ប្តូរឥរិយាបទជាវិជ្ជមានក្នុងសង្គម”។
ជាក់ស្តែងកាកបាទក្រហមកម្ពុជា បានពង្រឹង និងពង្រីកកម្លាំងអ្នកស្ម័គ្រចិត្ត ដែលសុទ្ធតែជាកម្លាំងមិនអាចខ្វះបាន ក្នុងការផ្តល់ក្តីសង្ឃឹម និងភាពកក់ក្តៅ ដល់គ្រួសារងាយរងគ្រោះបំផុតបានទាន់ពេលវេលា និងគ្រប់ទីកន្លែង។
អត្ថបទ និងរូបភាព៖ សាខាកាកបាទក្រហមកម្ពុជាខេត្តសៀមរាប
កែសម្រួល៖ លោក ហាំ ម៉េងហួត
